Ezekiyele 2 - Libuka Lya Kuyela

Nyambi ukwihana Ezekiyele

¹ Niho nayuvwile lizu likwamba ngayi, “Obe mwana muntu katuka, Ami nikushinga kwamba kukwobe.”

² Oho lizu lyambilenga, moyo wa Nyambi wenginine mumwami na kumpindwisha ku mawulu wami, kami ami nayuvwile lizu lizamina kwamba ngayi,

³ “Mwana muntu nilinakukutuma ku baka Ishalela, aba bankanine na kumfutulukila. Nibo na bankakazabo bashili kutenda wubi kukuma na kulelo.

⁴ Nibo bengile ba mitima yayikalu kami bafwako kundemeeka. Ami nili na kukutuma ngayi ukabatongweze osho nili na kwamba kukwabo, Ami Nyambi ya Ngula.

⁵ Bakakufutulukila ndi bakakuyuvwilila hinge ndi bafwako, nibo bakalimuka ngayi muluwe wekalilenga mukatikabo.

⁶ “Ngoboni obe mwana muntu hinga ubatina, hinge shuma shamina bakamba. Hinge ndi bakakuzinguluka ngonehe mihengela, hinge ndi nikwo kukenga ngo kwikala mukati ka batupilili. Hinge noho hinga utina hinga kutampwa na byuma bakamba.

⁷ Obe ukambe kukwabo ebye nimwabyo nikukutongweza kubitenda, hinge ndi nibo bakakuyuvwilila hinge ndi bafwako. Hanganika ngayi nibo banengi bakakumfutulukila.

⁸ Obe mwana muntu, yuvwilila kuneshe nikukutongweza. Hinga winga wankani ngonehe nibo. Yahama, pe ulye ebye nika kupanika.”

⁹ Ami namonene liboko lya kumine kukwami, nilyo lya kwatile libuka lya kuzenga.

¹⁰ Lyazengwinine liya libuka lya kuzenga, namonene ngayi kwekalile bya kutikita ku nciza naku nciza, mazu a malila na mbingo na ku shunga.