Ezekiyele 19 - Libuka Lya Kuyela

Lwimbo lwa malila

¹ Nyambi ya Ngula wantongwezele ngayi nimbilile lwimbo lwa malila bamyene babili Baishalela.

² Mandiyobe wengile shimbwi wa mukazi, wekalilenga mu litanga lya bimbwi. Niye walelele bana bendi mukati ka mihempela ya babimbwi babalume.

³ Walelele umo ku bana bendi na kumulongesha kuyomba, niho afutukile kwinga mukakulya bantu.

⁴ Bakamatunga oho bayuvwile byendi, bamukwatilile mu liteke. Bamuyakile mu shiyengelele niho bamutwalile ku Engepita.

⁵ Oho amonene ngayi bihanganiko byendi bya ntalu, walelele mwanendi wamina niho engile shimbwi wamukali.

⁶ Oho akulile shikuma, wendelenga na baminendi babimbwi. Niye walimukile sha kuyomba pe wafutukile mukakulya bantu.

⁷ Niye wanongeshele bipata, na kulobesha minzi. Bantu ba mu litunga bekalile na bowa shikati nimwasho oho abuluminenga

⁸ Matunga alikungulwile na kumulwisha, bezile kufuma noku noku, niho batandubwile tunyanzi twabo twa ku yombesha, bamukwatilile mu liteke lyabo.

⁹ Nibo bakwatile na kahanto niho bamuyakile mu shiyengelele na kumutwala kuli mwene wa Mbambiloni, niho bamuyakile mu tolongo. Mwanga kubuluma kwendi kubule kuyuvwanika kami ha mapili amu Ishalela.

¹⁰ Mandiyobe wengile ngonehe mukolobozi wa shinyanca, wakuniwile mumfuba yekalile kwakwipi na mushinzi. Watutwishile myahi yayingi na kuyima mikabo ndaba kwekalile mema amengi.

¹¹ Myahi ya mikolobozi ya shinyanca yengile ya ku shuma, kami yakulile kwinga miwana ya wene. Mikolobozi ya shinyanca yakulile na kutaliha shikuma na kukuma ku makumbi. Muntu nimwendi wamonene mabizi wawo na wutali wawo.

¹² Ngoboni wazulilewo mu kupilama na kuwu yumbila hanci. Mpepo yaku mushamuko yayumishile mikabo yawo. Myahi yawo yapamokeleko, niyo yayumine niho yahokeshiwile.

¹³ Haya niyo ya kuniwile mu libelelengwa, muli litunga lya kuyuma lya kubula mema.

¹⁴ Lishina lya mukolobozi wa shinyanca lya kwatile mundilo, mundilo wahokeshele myahi yawo na mikabo. Myahi yawo yifwako kami kukashuma, yifwako kukenga miwana ya wene. Olwe lunengi lwimbo lwa malila, lunembiliwi kakengi shikuma.