Ezekiyele 18 - Libuka Lya Kuyela

Nyambi ukuyata mu kupwisha

¹ Nyambi ya Ngula wambile kukwami kami ngayi,

² “Kati nguli eye yikutontolola bishini ku bantu ba mu litunga lya Ishalela? Bahemi banali mikabo yayishashu, ngoboni mayewe a batwanuke ali na muwewe.”

³ Nyambi ya Ngula unakwamba ngayi, “Mwa shikuma nehe nili ami Nyambi wakuyoya, enu mufwako kukaliyavwishayo kami eye nguli mu Ishalela.

⁴ Wumi nimwawo wenga wami, wumi wa hemi, hinge wumi wa mwana, wumi wa muntu nimwendi wenga wumi wami. Ngoboni ou uku bipisha niye ukafwa.”

⁵ “Shinga ndi kuli muntu wamuwahe wa kupwisha, wakulunga na kwombatala.

⁶ Niye wufwako kulemesha tunankishi twa baka Ishalela hinge kulya zinkombela zinatupuliwi ku tuula twakanishiwa. Wakubula Kubipisha na mukaza muntu washenge hinge kulala na mukazi hinga ekala ku nkunka.

⁷ Niye kwongeza wufwako hinge kupukula muntu wamina. Niye ukubweshela eshe a mupanikanga mukakuwila kwinga kalamisho, ukulela bali na nzala na kuvwalika baka wuvwu.

⁸ Kukapana mukuli wa mali ngayi awaneho nkambiko wufwako. Niye ukukana kutenda wubi na kubula shihota ha kuyata byambo nimwabyo.”

⁹ Nyambi ya Ngula unakwamba ngayi, “Ou ukwombatala mazu na kulama ndayano zami shiwahe, nengi wakulunga, kami ukayoya.”

¹⁰ “Ndi muntu nabeleke mwana wa mulume mwizi na kuziha bantu na kutenda byuma bimina bya nehe,

¹¹ biya tatiyendi abulile kutenda. Kami niye walyanga zinkombela ku myanya ya kukanishiwa na Kubipisha kutenda wunjenge na mukaza minendi.

¹² Niye ukwongeza ba kushepwa na kuyiba, ukutenteka ebye akumupanika mukakuwila kwinga kalamisho. Ukulemesha tunankishi na kutenda byawunyengwe.

¹³ Niye ukupana mukuli wa mali ngayi awaneho nkambiko. Muntu wa nehe ukayoya ndi? Byo, wufwako. Niye unatende byuma nimwabyo ebye kwinga byawunyengwe, ukafwa, kami ukanyanciwa niyemwine ha lufu.”

¹⁴ “Haya hamina ndi ou muntu nabeleke mwana wa mulume uli na meho aku mona wubi nimwawo ou atendanga tatiyendi, pe niye ha kukana kutendawo,

¹⁵ na kukana kulemesha tunankishi twa baka Ishalela, hinge kulya nkombela yinatupuliwi ku mwanya wakukanishiwa. Kami ukabula kutenda wunjenge na mukaza minendi,

¹⁶ hinge kuyandisha muntu wamina, hinge kuyiba sha muntu wamina. Niye ufwako kutambula kalamisho ku mukakuwila. Kami ukulela aba bali na nzala na kuvwalika aba bali na wuvwu.

¹⁷ Ukukana kutenda wubi kami wufwako kupanika mukuli wa mali ha nkambiko. Niye ukulama mazu wami na kwombatala ndayano zami, kukafwila wubi wa tatiyendi wufwako, ngoboni ukayoya.

¹⁸ Tatiyendi wukafwila wubi wendi, ndaba wongezanga na kuyiba kami wonzela kutenda byabibi ku muntu nimwendi.

¹⁹ “Ngoboni obe ukwipula ngayi, ‘Shumangani mwana a kubula kuyandila wubi wa tatiyendi?’ Kukumbula oku ngayi mwana niye natende mwayila ndayano na bya kulunga, walamanga lukuwa lwami na kuzikonka shiwahewahe, mwa shikuma ukayoya.

²⁰ Ngoboni ou ukabipisha niye ukafwa. Mwana wufwako kukayandila wubi wa tatiyendi, hinge tata muntu kukayandila wubi wa mwanendi. Zintendelo za muntu wa kulunga zikamuletela wuwahe. Muntu wakuluwa ukayandila kuluwa kwendi.”

²¹ “Ndi muntu wakuluwa ukutenguluka na ku shiya wubi wendi, pe ha kulama ndayano zami na kutenda mwayila ndayano shiwahe, niye ukayoya, kukafwa wufwako.

²² Milandu yendi nimwayo yikayatiwila, pe ukayoya ndaba watendele bya kulunga.

²³ Nyambi ya Ngula ukwipula ngayi, kati mu kuhanganika ngayi ami niku wahilila oho niku mona muntu wakuluwa akufwa? Byo, ami nikushinga ngayi atenguluke mwanga ayoye.

²⁴ “Ngoboni ndi muntu wakulunga ukuleha kutenda byabiwahe na ku balika kutenda byuma nimwabyo byabibi, bya wunyengwe biya batendanga bantu bakuluwa, kati ukayoya ndi? Byo, byabiwahe nimwabyo biya atendele bikavulamiwa. Ukafwa ndaba ya kubula kukulupila kwendi na wubi wendi.

²⁵ Ngoboni enu mukwamba ngayi, ‘Ebye atendanga Nyambi ya Ngula kaliha byabiwahe.’ Yuvwililenu kukwami, enu baka Ishalela, kati enu mu kuhanganika ngayi zintendelo zami zazibi ndi? Kati kaliha zintendelo zenu nizo zazibi ndi?

²⁶ Oho muntu wakulunga ukulehasho kutenda byabiwahe na ku balika kutenda byuma byabibi, pe ukafwa. Mwa shikuma ukafwa ndaba ya wubi anatende.

²⁷ Oho muntu wakuluwa akushiya kutenda byabibi na kutenda bya kulunga na byabiwahe, niye unalamwini wumi wendi.

²⁸ Nohobene ukayoya kukafwa wufwako, ndaba walimukile ebye atendelenga niho atengulukile ku wubi wendi.

²⁹ Haya enu baka Ishalela mukwamba ngayi, ‘Ebye atendanga Nyambi ya Ngula kaliha byabiwahe.’ Kati enu mu kuhanganika ngayi zintendelo zami kaliha zaziwahe ndi? Kati kaliha zintendelo zenu nizo zazibi ndi?”

³⁰ Nyambi ya Ngula unakwamba ngayi, “Nohobene enu baka Ishalela ami nikayata muntu nimwendi wakukwenu kwezekesha na zintendelo zendi. Tengulukenu mufume ku byabibi nimwabyo, kami hinga muleha wubi wenu ngayi uminongeshe.

³¹ Shiyenu wubi nimwawo mwatendelenga, mufutule bihanganiko byenu na mitima yenu kwinga byabipya. Shumangani enu Baishalela mu kushingila kufwa?

³² Nyambi ya Ngula unakwamba ngayi, ami nifwako kushinga muntu wamina ngayi afwe. Tengulukenu mwanga muyoye.”