Ezekiyele 16 - Libuka Lya Kuyela

Yelushalema wakubula kukulupila

¹ Nyambi ya Ngula wambile kukwami kami ngayi,

² “Mwana muntu, monesha Yelushalema nyinkalo yendi ya wunyengwe eye anatende.

³ Tongweza Yelushalema ebye akwamba Nyambi ya Ngula kukwendi ngayi, ‘Obe wahemuwilile mu litunga lya Kenaani, tatiyobe wengile Kaamoli na mandiyobe wengile Kahita

⁴ Oho wahemuwile, kowa muntu waketwile nkowa yobe hinge kukuyowesha, hinge kukulomba mushele, hinge kukuvungila mu makwiza.

⁵ Kowa muntu wamina wekalile na nceshe hahobe ngayi atende ebye byuma. Oho wahemuwile kowa muntu wakuhakile, ba kuyumbilile ha munkanda.

⁶ “ ‘Niho napitile hahepi nakumonene hi wulivuluwa mu mukeza wobe. Ami nakutongwezele ngayi, “Obe ukayoya oho wekalile na mukeza nahiyo.

⁷ Ami nakukulishile ngonehe mbuto ya mu mfuba ya kulela shiwahe,” wakulile shiwahe na ngovu na wutali pe wengile kankanga. Mabele wobe atendiwile shiwahe na huki zobe za kulile, ngoboni obe wekalile muhelengwa.

⁸ “ ‘Oho napitilenga kami namonene ngayi shikati shobe shakumakale sha kulihaka. Ami nafwikile muhelengwa wobe na lyambangubo lyami na kukulupisha ku kuhaka. Ee nalimamine maluwo na nobe, pe obe wengile wami.’ Eshe nisho anamba Nyambi ya Ngula.

⁹ “ ‘Niho nashimbile mema na kukuyowesha mukeza, pe naku wabile mazi.

¹⁰ Nakuvwikile bivwalo bya kutangatanga nakupanikile makatulo a mwayi wakunyuka shiwahe na kaponda kakumutwe ka likwiza lya kulelema lyaliwahe na likwiza lya shimbombo.

¹¹ Nakuvwikile bya kuliyenga, mankunda na mukali.

¹² Nakuvwikile linkunda lya mu muzulu na mankunda aku matu na munana wawuwahe wakuvwala ku mutwe wobe.

¹³ Obe wekalile na bya kuliyenga bya ngolinde na bya shiliva, kami shikati nimwasho obe wavwalilenga likwiza lya kulelema lyaliwahe lya kubalanga na makwiza a shimbombo. Walilenga mankende a muhunga wakulembuka, pe wekalile na wushi na mazi a olive a kulya. Wuwahe wobe wabyazimilenga, pe obe wengile ngo lihano.

¹⁴ Mpupo ya wuwahe wobe yakwayanine mu matunga nimwawo, niwo wengile wuwahe ndaba nakubumbile shiwahe shikuma.’ Eshe nisho anamba Nyambi ya Ngula.

Kuyoya kwa Yelushalema kwa lwiholwiho

¹⁵ “ ‘Ngoboni obe wakulupilile mu wuwahe wobe kami waliyavwishile mpupo yobe kutenda wunjenge na muntu nimwendi ukwiza kukwobe.

¹⁶ Watendeshelenga makwiza wobe amina mu kuyenga zimbalila zobe za kulemeshela, pe kuyo walipanikile, ku muntu nimwendi ngo uli walwiholwiho. Shuma shanoho kaliha shafwanina kutendiwa, kami shifwako kukatendiwa.

¹⁷ Obe washimbile shiliva na bya kuliyenga bya ngolinde biya nakupanikile, watendeshelenga mu kubumba bifwekesha bya balume na kutenda nabyo wumambe.

¹⁸ Obe washimbile bivwalo bya kubalanga biya nakupanikile na kubivwika bibumbwabumbwa, pe watupwilenga kukwabo mazi na wanga wa livumba lyaliwahe ou nakupanikile.

¹⁹ Washimbile byakulya nakupanikile, muhunga wakulembuka na mazi a olive na wushi, ngoboni obe watupwilebyo mukwinga nkombela ngayi uliyuvwashane na tunankishi.’ Eshe nisho anamba Nyambi ya Ngula.

²⁰ “ ‘Pe kami washimbile bana babalume na naba babakazi aba wambelekelele na ku batupula kwinga nkombela kutunankishi. Kati kaliha shengile shuma sha shibi ha kubula kukulupila kukwami,

²¹ na kushimba bana bami na kubakombelela ku tunankishi ndi?

²² Mu kuyoya kwobe kwa kuyenesha kwinga walwiholwiho kaliha wanukilenga wanuke wobe, oho wekalilenga muhelengwa, na kulivuluwa mu mukeza wobe.’ ”

²³ Nyambi ya Ngula wambile ngayi, “Makando wobe! Makando wobe, watendele byabibi nimwabyo kuyo. Wawezelele ku kuluwa kwobe,

²⁴ ku nzila nimwayo walitendelele myanya ya kulemeshela tunankishi na ku tendelako lwiholwiho.

²⁵ Obe walambile wuwahe wobe na ntiti, walipanikilenga ku muntu nimwendi ou wezilenga kukwobe, kami wengile walwiholwiho shikuma ha mutena ha mutena.

²⁶ Obe ukutenda wunjenge na Baengepita bandambo bobe banaliwahishili kulala na nobe, kami obe unampilamishi ndaba ya lwiholwiho lwobe.

²⁷ Haya ami natandubulu liboko lyami mu ku kushushula na ku kuyangula shitapilo shobe sha mfuywezi. Nakupaniki mu maboko a Bafwilishitina aba ba kuzimba bali na wunyengwe na ntendelo yobe yayibi.

²⁸ Ndaba obe wabulile kumanisha nyumwa ku baminobe, wetukilenga kukonka Baashiliya, wengile walwiholwiho wabo, ngoboni nibo babulile kumanisha nyumwa.

²⁹ Obe kami wengile lwiholwiho ku baka Mbambiloni, uya mukoka wabakamikwebo, ngoboni babulile kumanisha nyumwa.”

³⁰ Eshe nisho akwamba Nyambi ya Ngula ngayi, “Obe unatende nimwabyo ebye ngonehe mukazi walwiholwiho wakubula lisheni.

³¹ Ha nzila nimwayo watendeleho mwanya wakulemeshela tunankishi na kutenda bya lwiholwiho. Ngoboni kaliha washinganga mali ngonehe baminobe bakalwiholwiho.

³² Obe unafweke ngonehe mukazi ou watendanga wumambe na bayeni kupitakana ku haka mukokwendi.

³³ Balume bayumbanga mali ku bambuyama nimwabo balwiholwiho, ngoboni obe wapanikilenga bishemo ku ba kuhakiwa bobe nimwabo na ku bazika kanwa ngayi beze mu kufuma kuti na kuti mukutenda nobe bya lwiholwiho.

³⁴ Obe unalishiyi na baminobe balwiholwiho, kowa muntu wakushingilenga ngayi utende nendi bya lwiholwiho. Obe wayumbilenga mali kaliha nibo ku kuyumba mali. Nohobene obe unalishiyi na baminobe.”

Kuyata kwa Nyambi ha Yelushalema

³⁵ “Nohobene, obe mbuyama walwiholwiho, yuvwa ebye akwamba Nyambi ya Ngula.

³⁶ Eshe nisho akwamba Nyambi ya Ngula ngayi, obe walivulile kami wekalile muhelengwa, ngonehe walwiholwiho walipanikile obe mwine kunaba wahaka na kutunankishi twobe twa wunyengwe, pe wazihile banabobe kwinga nkombela kutunankishi.

³⁷ Haya mona, nika kungulula hamo nimwabo bayo wahaka na bayo wazimba, baya watendelenga nabo bya lwiholwiho. Nikaba kungulula kufuma kuzimbalila nimwazo kwiza na kukuzinguluka ku kuyaka mukati, pe haya ami nika kuvwula bivwalo ngayi bakamone muhelengwa wobe.

³⁸ Nikakunyanca ha wumambe na kuziha watendanga, mu kupilama na mu wukali wami nika kushushula na lufu.

³⁹ Nikakupanika mu maboko wabo, pe nibo bakashiwula myanya oku watendelenga bya lwiholwiho na kulemesha tunankishi. Nibo bakakuvula bivwalo byobe na bya kuliyenga na kukushiya muhelengwa.”

⁴⁰ Bakaleta likunge lya bantu kwiza mu kukulwisha, bakakupuha mamanya na kukuketozola na mikwale yabo.

⁴¹ Bakahokesha matala wobe na kukushushula hambili ya bambuyama babengi ngayi bamone kashushwilo kobe. Nikakulehesha kwinga mbuyama walwiholwiho na kukulehesha kuyumbanga ba kuhakiwa bobe.

⁴² Niho kupilama kwami kukamana, pe kami nifwako kuka kuyuvwila lihungu, nikamwena kami nifwako kukapilama.

⁴³ Ndaba obe unavulama matena a undumbana wobe, ngoboni unampilamishi na byuma nimwabyo ebye unatendenga. Haya mona, nika kubweshela nimwabyo watendanga ha mutwe wobe. Shumangani kami unawezeleleko byuma bya lwiholwiho ku byuma bya wunyengwe watendenga? Eshe nisho anamba Nyambi ya Ngula.

Mwana wayambulanga mandiyendi

⁴⁴ “Obe Yelushalema bantu bakaliyavwishanga eye nguli hahobe ngayi, ‘Mwana wayambulanga mandiyendi.’

⁴⁵ Obe uli mwana wa mukazi wa mandiyobe, ou washiyile mukokwendi na bana bendi. Obe unafweke ngo bawushinda wobe bazimbile bakokwabo na banababo. Mandiyobe wengile Kahita na tatiyobe wengile Kaamoli.

⁴⁶ Yayiyobe wengile Shamaliya ou uli ku ncelele hamo na minzi yendi na mukonzowobe wengile Shondoma ku mabukubuku hamo na minzi yendi.

⁴⁷ Obe wetabilile kukonka mu myanza yabo na kufwekesha ntendelo yabo ya wunyengwe ndi? Byo, mu shikati tuhu shashishe obe watendelenga byabibi kubapitakana.”

⁴⁸ Nyambi ya Ngula ukwamba ngayi, Nehi nili ami Nyambi Wakuyoya, yayiyobe Shondoma na minzi yendi kaliha banabipishi ngonehe unatende obe na minzi yobe.

⁴⁹ Shondoma na bana bendi babambuyama batendele wubi wakuliyemeza, bekalile na byakulya byabingi shikuma, bekalile shiwahe ngoboni kaliha bayavwile bancepwe na bakakuyanda.

⁵⁰ Bengile bakakuliyemeza na kutenda byuma bya wunyengwe ku meho wami, niho na balobeshele.

⁵¹ Shamaliya kaliha watendele wubi hinge wakulingana shitika sha wubi ou unatende, ngoboni obe unatende wubi wakupitakana yayiyobe na mukonzo wobe. Ntendelo yobe yayibi ha ku kufwanikiza nabo yinabahololo kwinga bakulunga.

⁵² Haya obe mwine, uku fwanina kuyuvwa lisheni, obe unahololo mukonzo wobe kwinga wakubula wubi. Wubi wobe wawunene shikuma kupitakana bawushinda wobe, nohobene nibo ba ku moneka ngo bantu bakubula mulandu na nobe kami wamoneshele bawushinda wobe ngo kaliha watende wubi, ukayuvwa lisheni.

Yelushalema na Shondoma na Shamaliya bakababwesha

⁵³ Nyambi ya Ngula wambile kuli Yelushalema ngayi, “Nikatangamisha Shondoma na minzi yendi na Shamaliya na minzi yendi. Nikakutangamisha na nobe kami,

⁵⁴ ukekala na lisheni obe mwine na kuyena ku nimwabyo ebye unatende. Pe kuyena kwobe kukamonesha bawushinda wobe wuwahe wabo.

⁵⁵ Ngoboni oho Shondoma na Shamaliya bakaboka na kwikala ngonehe eshe bekalilenga mwaka na nobe kami ukekala shiwahe nehi wekalilenga mwaka.

⁵⁶ Yelushalema, kati obe kaliha wahengamininenga Shondoma oho waliyemezelenga

⁵⁷ oho wubi uya watendele shilolo umoneke ndi? Haya obe unafweke ngonehe niye, baka Endoma, bafwilishitina na bandambo bobe ba kuzimba bali na kukuhengamina.

⁵⁸ Enu mu ku fwanina kuyanda ha biheka na ha byuma bya wunyengwe ebye mwatendele.” Eshe nisho anamba Nyambi ya Ngula.

Kulimama kwa mwaya myaka

⁵⁹ Nyambi ya Ngula ukwamba ngayi, “Nikakushushula kuya naneshe shakufwanini, ndaba wavulamine bikulupisho byobe na kukiluka kulimama.

⁶⁰ Ngoboni nikanuka kulimama kwami natendele na nobe ha wundumbana wobe, kami nikazika nobe kulimama kwa mwaya myaka.

⁶¹ Niho ukanuka nyinkalo yobe ya mwaka, ukayuvwa lisheni wakatambula bawushinda wobe, wamukulwane na wakanuke. Na kubapana kukwobe kwinga ngonehe banabobe babambuyama, hinge noho oku kaliha niko kulimama kwami na nobe.

⁶² Nikahangulula kulimama kwami na nobe, pe obe ukalimuka ngayi Ami nili Nyambi ya Ngula.

⁶³ Nikakuyatila wubi wobe nimwawo watendele, pe ukabyanuka na kuyena shikuma ufwako kukayahamisha kanwa kobe. Eshe nisho akwamba Nyambi ya Ngula.”