Ezekiyele 13 - Libuka Lya Kuyela

Mazu akushushula bamiluwe babalume ba mahalo

¹ Nyambi ya Ngula wambile kukwami ngayi,

² “Mwana muntu, kanangana bamiluwe ba mu Ishalela aba ba kulubulula byabo, aba ba kulilubulwila byabo, pe batongweze ngayi, ‘Yuvwililenu ku lizu lya Nyambi ya Ngula.’

³ Eshe nisho akwamba Nyambi wa Makunge ngayi, makando ku bamiluwe bakuyeba aba ba kulitendela mwayila ngana zabo na kulitendela bimono byabo.

⁴ Enu baka Ishalela, bamiluwe benu banafweke ngonehe bamimbwe bali mu mapembe.

⁵ Kaliha banakandama ha kembi ngayi bakawahishe, hinge ngayi batendulule kembi aha kanabipi ngayi Ishalela akatweshe kwimana ha mutena wa nzita ya Nyambi ya Ngula.

⁶ Bimono byabo bya kwongeza na kulubulula kwabo kwa mahalo. Bali na kwamba ngayi, ‘Elye nilyo lizu lya Nyambi ya Ngula,’ ngoboni Ami kaliha na batumine, ba kutatilila ngayi ebye bakuhanganika bikwinga bya kupwisha.

⁷ Ngoboni Ami nikubatongweza ngayi, ‘Obyo bimono mu ku mona binengi bya mahalo na kulubulula mukutenda kunengi kwa kwongeza. Enu mukwamba ngayi anengi mazu a Nyambi ya Ngula, ngoboni Ami kaliha nambile kukwenu.’

⁸ “Nohobene, Nyambi ya Ngula unakwamba kukwabo ngayi, ‘Nikumikanangana ndaba ebye mukwamba binengi bya mahalo na bimono byenu binengi bya kwongeza.

⁹ Wuluno nikashushula bamiluwe muli na bimono bya mahalo na kulubululanga byuma bya ku shanwisha. Bafwako kukekalako oho bantu bami bakakunguluka hinge kutikitiwa mazina wabo mu libuka lya baka litala lya Ishalela, hinge kukaboka mu litunga lya Ishalela, kami enu mukalimuka ngayi Ami nili Nyambi ya Ngula.’

¹⁰ “Bamiluwe aba ba kushanwisha bantu bami, ndaba bakwamba ngayi, ‘Ku mwena’ Oho niko kowa ku mwena, bantu bami banemiki kembi ka mamanya akunyenkana, ngoboni aba bamiluwe ba kulambululaho na mushombela wakutuba.

¹¹ Batongweze ngayi kembi kakawa hanci, nikatuma mvula wa mikukila. Likandavula ukalokelaho na mpepo yayinene yikapepokelaho.

¹² Haya ndi kaya kembi kakuwa, kati bantu bafwako kukamba kukwenu ngayi, ‘Haya wuwahe ulikuti wakulambulula oku unatende?’

¹³ “Nohobene Nyambi ya Ngula ukwamba ngayi, ‘Mu kupilama kwami nikatuma mpepo yayinene, mvula wa mikukila na likandavula mu kulobesha kembi.

¹⁴ Nikashiwula kembi aka mwalambulwile, nikakawishila hanci ngayi mwimbi wako ukashale hanahiya. Oho lukena lukashiwuka mukafwila mu nceto yalwo, niho muntu nimwendi ukalimuka ngayi Ami nili Nyambi ya Ngula.’

¹⁵ “Kembi nanobo bakalambwilile na mushombela wakutuba bakayuvwa wulemu wakupilama kwami. Niho nikamba kukwenu ngayi, ‘Kembi kanawu na nanobo bakalambwilile banawilikumo,

¹⁶ bamiluwe bamu Ishalela aba balubulwile bya Yelushalema na ku mona bimono ngayi kuli ku mwena, oho niko ku mwena kowa.’ Eshe nisho akwamba Nyambi wa Makunge.”

Mazu akushushula bamiluwe ba bambuyama ba mahalo

¹⁷ Nyambi ya Ngula wambile ngayi, “Mwana muntu, tilamina bambuyama mukati ka bantu bobe, aba ba kulubulula byuma bya mu mitima yabo. Nyanca ebye bali na kutenda,

¹⁸ pe ubatongweze ebye akwamba Nyambi ya Ngula ngayi, ‘Makando ku bambuyama, enu mwatungilile mukalo muntu na muntu na kutenda bikongo bya kulimanga muntu nimwendi ku mutwe, ngayi bikale na ngovu ha wumi wa bantu. Enu mukushinga kutendesha ngovu za wumi na lufu ha bantu bami ha nceshe zenu bene.

¹⁹ Enu muli na kuhandula hambili ya bantu bami, ngayi enu mutambule bitandalisho bya kwinzalisha mu maboko byabishe bya ncongamincale na ncankuncanku zazishe za mankende. Enu mukushinga kuziha bantu bakubula ku fwanina kufwa na ku shiya bantu babomi bakubula ku fwanina kuyoya nohobene enu mu ku shimikila bya mahalo ku bantu bami nibo ba kumikulupila.’”

²⁰ Haya eshe nisho ali na kwamba Nyambi ya Ngula ngayi, “Ami nazimbi mikalo iya mu kuliyavwishanga ha kulama wumi na lufu. Nikabihomonako ku maboko wenu na kuleha bantu ngayi bapanze baya mwashingilenga kulama.

²¹ Nikahomona bikongo byenu na kuleha bantu bami bapanze ku ngovu zenu. Niho enu mukalimuke ngayi Ami nili Nyambi ya Ngula.

²² “Ndaba ngayi enu muli na kulwisha bihanganiko byami, mu kukanisha bantu babawahe na mahalo wenu na kukanisha hinge bantu bababi mu kukoweza wumi wabo mu kufuma ku wubi.

²³ Nohobene, bimono byenu bya mahalo na kulubulula kwenu kwa mahalo bikamana. Nikalamwina bantu bami mu maboko wenu, nohobene mukalimuke ngayi Ami nili Nyambi ya Ngula.”