Ezekiyele 12 - Libuka Lya Kuyela

Bilimukisho bya kwiza kwa wuntapwa

¹ Nyambi ya Ngula wambile kukwami ngayi,

² “Mwana muntu, obe uli mukati ka bantu ba kukufutulukila, bali na meho aku mona ngoboni kumoneshesha bafwako, bali na matu akuyuvwa ngoboni ku yuvwishisha bafwako.

³ “Wuluno, mwana muntu, manga shikuta ngonehe atendanga mukakuholama, yanga ku bantapwa shikati sha mwana, enda ngonehe ntapwa kufuma mwanya wamina na kuya ku mwanya wamina nimwabo ba ku mona. Kampe bakayuvwishisha ngayi banengi bakakumfutulukila.

⁴ Oho kushili mwana manga shikuta shobe sha ku wuntapwa, ngayi batweshe kuku mona. Leha ba kumonenga oho ukukatuka mazolo, ngonehe shiya wayilenga mu wuntapwa.

⁵ Oho nibo bashili kuku mona, tubula litubwa ha kembi pe utwitishilemo byuma byobe.

⁶ Leha ba kumonenga oho ukuyaka byuma byobe ha shifuzi, pe ututike ha munkanda mu mincimpwe meho wobe hinga a zimanana, mwanga ukabule ku mona oku ukufuma. Eshe ukatenda shikenga shilimukisho ku baka Ishalela.”

⁷ Pe natendele eshe antongwezele Nyambi ya Ngula kubitenda. Ha mutena uyo namangile shiputu shami ngonehe ntapwa, ku mazolo oho kwashipile na tubwile litubwa ha kembi na maboko wami. Natutwishile shiputu shami ha munkanda na kuyaka ha shifuzi shami oho nibo bamona.

⁸ Oho kwashile lumenemene Nyambi ya Ngula wambile ku kwami ngayi,

⁹ “Mwana muntu, wuluno Baishalela bakakufutulukila bali na kukwipula ngayi, ‘Bishini uli na kutenda?’

¹⁰ Batongweze ebye nikwamba ami Nyambi wa Makunge ngayi, ‘Elye lizu lya mwene Zendekiya ukulela mu Yelushalema na Baishalela nimwabo bakwikala kuyo.’

¹¹ Batongweze ngayi ebye unatende shinengi shilimukisho kunebye bikatendiwa kukwabo, nibo bakenga bakakuholama na bantapwa.

¹² Mwene Zendekiya ou uli na ku balela ukalitwika shiyeko shendi mu mincimpwe pe ukatina na kututikila mu litubwa bamutubwilile ha kembi. Niye ukazimanana ku meho wendi na kubula ku mona oku akufuma.

¹³ Nikatandubula lunyimbwa kami hahendi pe nikamukwatilamo. Niho nikamutwala ku Mbambiloni, oku akufwila kwakubula ku mona liya litunga.

¹⁴ Nikapanzanishila babilolo bamu shipango shendi mu zimbalila nimwazo, bakakumubela na bakakumulama, pe bantu bakabashingashinga ngayi babazihe.”

¹⁵ Oho nikabapanzanishila mukati ka mikoka yashenge na mu matunga ashenge pe bakalimuka ngayi Ami nili Nyambi ya Ngula.

¹⁶ Ngoboni nika shiyaho babashe ba kulingana aba bakapuluka ku nzita, kukapande na malweli, ngayi bakalitabile wubi wabo ku mikoka nimwayo bakaya. Niho bakalimuka ngayi Ami nili Nyambi ya Ngula.

Shilimukisho sha Muluwe mukakukanka

¹⁷ Nyambi ya Ngula wambile kukwami ngayi,

¹⁸ “Mwana muntu, kanka oho ukulya, pe tetema na kutina oho ba kunwa.

¹⁹ Amba ku bantu bamu litunga liya ngayi, ‘Eshe nisho akwamba Nyambi wa Makunge ku bantu bekala mu Yelushalema na mu litunga lya Ishalela. Nibo bakankanga oho bakalya na kutetema na kutina oho ba kunwa mema. Litunga lyabo likapukuliwa likashala nahiya, ndaba muntu nimwendi wekala muyo afwazo ndayano.

²⁰ Minzi iya yinenzala bantu wuluno yikalobeshiwa, kami na litunga likafutuka lipembe. Niho bakalimuka ngayi Ami nili Nyambi ya Ngula.’”

Mazu a Nyambi ya Ngula Akalinzalishilila

²¹ Nyambi ya Ngula wambile kukwami ngayi,

²² “Mwana muntu, kati shumangani bantu baishalela ba kubokela bokela eye nguli ngayi, ‘Shikati shili na kumana, kami kulubulula kunengi kwa ntalu.’

²³ Haya batongweze ebye Ami Nyambi ya Ngula nikwamba hahabo ngayi, nikamanisha eye nguli. Bafwako kami kukayibokela bokela mu Ishalela. Batongweze ngayi shikati shinakumu, kami kulubulula nimwako kukenga kwa kupwisha.

²⁴ “Mukati ka Baishalela mufwako kukekala bimono bya mahalo hinge kulubulula kuya kukatwaminina bamiluwe kwa mahalo.

²⁵ Ami Nyambi ya Ngula nikamba kukwabo, kami ebye nimwabyo nikamba bikatendiwa. Kufwako kukekala kami kwihala, mu shikati shenu sha kuyoya enu bakakumfutulukila, nikatenda nimwasho eshe nambile kukwenu.” Eshe nisho anakwamba Nyambi ya Ngula.

²⁶ Nyambi ya Ngula wambile kukwami ngayi,

²⁷ “Mwana muntu, Baishalela bakuhanganika ngayi bimono byobe na kulubulula kwobe bishili hahatali.

²⁸ Haya batongweze, ebye nibyo akwamba Nyambi ya Ngula ngayi, ‘Nifwako kami kukehala, nimwabyo ebye nikamba bikatendiwa.’”