Ezekiyele 11 - Libuka Lya Kuyela

Nyambi ukushushula Yelushalema

¹ Moyo wa Nyambi wankatwile na kuntwala ku lipangati lya ku mushamuko wa Litala lya Nyambi ya Ngula. Kuyo kwakwipi na lipangati namonene balume 25, hakati kabo namonene bantwamina babili ba matunga ba Yazaniya mwana Azula na Pelatiya mwana Mbenaya.

² Nyambi ya Ngula wambile kukwami ngayi, “Mwana muntu, aba nibo bantu ba kuyongola byabibi na kubela bantu na mazu amabi a kuluwa.

³ Bali na kwamba ngayi, ‘Shikati sha kuzika shilolo shikumine, olu lukena lunafweke ngo nyungu ya kutelekela. Nanetu tulishiwahe ngonehe nyama yilimo.’

⁴ Nohobene, mwana muntu lubulula mu kubanyanca.”

⁵ Moyo wa Nyambi ya Ngula wantengulwile, pe Nyambi ya Ngula wantongwezele kutwala lizu ku bantu ngayi, “Enu baka Ishalela Ami nikulimuka ebye mukwamba nanebye muli na kuhanganika

⁶ Munazihi bantu babengi muno mu lukena, mu zinzila munenzala na mituntu ya bantu ba kufwa.

⁷ “Nohobene, eshe nisho akwamba Nyambi ya Ngula, eyo, olu lukena lunengi nyungu ya kutelekela, ngoboni nyama yikenga yiti? Mituntu ya nobo bantu mwazihile. Ngoboni Ami nikamiyumbila ha munkanda wa lukena.

⁸ Kati enu mukutina mukwale ndi? Ami nikaleta balume bakamikwale mu kumilwisha. Eshi nisho anakwamba Nyambi ya Ngula.

⁹ Nikamitutwisha ha munkanda wa lukena na kumipana ku bayeni ngayi mwanga nikamishushule.

¹⁰ Mukazihiwa mu nzita mu litunga lyenu kukakuma na nginza ya Ishalela, enu nimwenu mukalimuka ngayi Ami nili Nyambi ya Ngula.

¹¹ Lukena luno lufwako kukenga nyungu, kami enu mufwako kukenga nyama. Nikamiyata nimwako oku mukekala mu litunga lya Ishalela.

¹² Pe mukalimuka ngayi Ami nili Nyambi ya Ngula ndaba kaliha mwalamine na kwombatala ndayano zami, ngoboni enu mwalamine ndayano za matunga aya anamizinguluku.”

¹³ Oho nalubulwilenga, Pelatiya mwana Mbenaya wawile hanci na kufwa. Niho nashinkamine hanci hinga na kinka lupala hanci na kubilikiza ngayi, “Byo, obe Nyambi ya Ngula, Kati obe ukaziha muntu nimwendi ou washalile mu Ishalela ndi?”

Shikulupisho sha Nyambi ku bantapwa

¹⁴ Nyambi ya Ngula wambile kukwami ngayi,

¹⁵ “Mwana muntu, bantu bekala mu Yelushalema bali na kwamba byobe nanebye bya baminobe Baishalela bali mu wuntapwa. Nibo bakwamba ngayi, ‘Bantapwa balikwakutali na kulemesha Nyambi ya Ngula. Etu watupaniki wuheti wa litunga.’”

¹⁶ Nyambi ya Ngula ukwamba ngayi, “Nohobene tongweza baminobe bantapwa ebye nili na kwamba. Ami nabatumine kuya mukwikala ku mikoka yayingi naku bapanzanishila ku matunga ali kwakutali. Ngoboni, ha kashikati kakashe, Ami nikabetabilisha kundemesha ku matunga oku bapanzanina.

¹⁷ “Nohobene batongweze eshe nikwamba Ami Nyambi wa Makunge ngayi, ‘Nikamifumisha ku matunga nimwawo oku namipanzanishilile, pe nikamipana litunga lya Ishalela.’

¹⁸ Oho bakaboka, bakafumisha nimwabyo bya mazilo na tunankishi twa wunyengwe bakawana.

¹⁹ Nikabapana mutima wawupya na bihanganiko byabipya. Nikafumisha mutima wabo wa limanya na kubapanika mutima wawuntu,

²⁰ ngayi bakatweshe kulama na kwombatala lukuwa lwami. Bakenga bantu bami nami kami nikenga Nyambi yabo.

²¹ Ngoboni nikashushula bantu aba bashinga kulemesha bya mazilo, tunankishi twa wunyengwe. Nikabashushula kunebye batendele.” Eshe nisho anamba Nyambi ya Ngula.

Wuwahe wa Nyambi ukufuma mu Yelushalema

²² Niho baya makelumbi atatikile kutuka na mawili ayile nawo. Wuwahe wa Nyambi wa Ishalela wekalile hayilu yabo.

²³ Niho wuwahe wa Nyambi ya Ngula wafumine ku lukena, wayile na kutulila ku lipili lyekalile ku mushamuko.

²⁴ Mu shimono, moyo wa Nyambi ya Ngula wankatwile muyilu na kumbwesha ku bantapwa bekalile mu Mbambiloni. Niho shiya shimono shayile.

²⁵ Niho natongwezele bantapwa nimwabyo byuma biya Nyambi ya Ngula amoneshele.