Ezekiyele 1 - Libuka Lya Kuyela

Ezekiyele Ukwihaniwa 1:1—3:27 Litanda lya Nyambi

¹ Ha mutena wa mutanu mu ngonda ya wunaa mu mwaka wa 30, oho nekalilenga na Bayunda bekalile mu wuntapwa kunkumo ya mushinzi wa Kemba mu litunga lya Mbambiloni, liyilu lya shinkulukile, pe namonene shimono sha Nyambi.

² Ha mutena wa mutanu ku ngonda mu mwaka wa mutanu oho mwene Yehoyakini atwaliwile mu wuntapwa,

³ Nyambi ya Ngula wambile kuli mukankombela Ezekiyele, mwana Mbuzi, kunkumo ya mushinzi wa Kemba mu litunga lya Mbambiloni na ngovu za Nyambi zekalile hahendi.

⁴ Ami Ezekiyele, natilaminine pe namonene mpepo ya nkuli hiyiza kufuma ku ncelele. Lumuni lwa munikilenga kufuma ku likumbi lyalinene, liyilu lya zingulukilenga lya byaziminenga. Lumuni lwamunikilenga shuma shamina sha byaziminenga ngonehe lubemba.

⁵ Hakati ka mpepo ya nkuli namonene osho shamonekelenga ngonehe bibumbwabumbwa binaa, bekalile na shifwekesha sha wuntu,

⁶ ngoboni umo na umo kukwabo wekalile na zimpala zinaa na mbando zinaa.

⁷ Mawulu wabo engile a kwoloka, ngoboni bekalile na mpazi ngonehe bankunzi. Bibumbwabumbwa byabyaziminenga ngonehe lubemba lwa kulomba.

⁸ Mukufungilako ku zimpala zabo zinaa na ku mbando zinaa, umo na umo wekalile na maboko anaa a wuntu kuzimbalila zabo mu nceto ya mbando zabo.

⁹ Mbando zibili za shibumbwabumbwa na shibumbwabumbwa zatandubukilenga ngayi bibumbwabumbwa mwanga binge litengelekeza na kuliwanika ku tunyenca twa mbando zabo. Oho bendelenga, bendelenga nehe muhoko wakubula kutengulula zinyutu zabo.

¹⁰ Shibumbwabumbwa nimwasho shekalile na zimpala zinaa za mishoboshobo. Kwekalile lupala lwa wuntu hambili, ku shilyo kwekalile lupala lwa shimbwi, ku shimoho lupala lwa nkunzi na kunyima lupala lwa ngonga.

¹¹ Mbando zibili za shibumbwabumbwa nimwendi zakatukile niho zalikwatile na zinkumo za mbando za bibumbwabumbwa twa kulundamina na mbando zamina zibili za livungilile ha zinyutu zabo.

¹² Shibumbwabumbwa nimwendi watilaminine kuzimbalila nimwazo zinaa, pe haya muhoko kaliha watweshele kufutuka ngayi uye oku nimwako washingilenga.

¹³ Hakati ka bibumbwabumbwa hekalile shuma shamina shamonekele ngonehe kubanga kwa lumuni, shendelenga noku noku. Mundilo ukubanga na kuyilu na kutintola hahe za lumuni.

¹⁴ Bibumbwabumbwa nibo bamwine bendelenga mantenganyima na kumbili ngonehe lumuni.

¹⁵ Oho natilamininenga ku bibumbwabumbwa binaa namonene mawili anaa hinga akwata hanci, limo munkumo ya lyamina nimwalyo.

¹⁶ Mawili nimwawo anaa alifwekele, pe limo na limo lyabyazimine ngonehe limanya lya ndando yayinene. Pe mukati ka liwili na liwili mwekalile lyamina lyalilamikile nalyo.

¹⁷ Oho makelumbi endelenga ayile mu zimbalila nimwazo na kubula kufutoka.

¹⁸ Mibalo ya mawili yengile yayinene pe afwikiwile na meho.

¹⁹ Okwo nimwako bibumbwabumbwa bendelenga na mawili kami endelenga nabo, pe kami ndi bibumbwabumbwa ba kukatuka kufuma hanci, nohobene na mawili kami akatukilenga.

²⁰ Bibumbwabumbwa bayilenga nimwako oku bashingilenga na mawili kami atendele shiwahe osho batendelenga bibumbwabumbwa ndaba bibumbwabumbwa batengwililengawo.

²¹ Shikati nimwasho bibumbwabumbwa byendelenga hinge bemanine, hinge batukililenga muyilu, mawili atendelenga noho naniwo shiwahewahe, ndaba ngayi bibumbwabumbwa nibyo byawatengulwilenga.

²² Hayilu ya mitwe ya bibumbwabumbwa hekalile shuma shamina shiya shamonekele ngonehe shiluli shatendiwile na shimoneno sha kubyazima. Shengile sha kukomokesha.

²³ Mu nceto ya shiluli shibumbwabumbwa nimwasho shatandubwile mbando zibili kuneze zekalile kwakwipi nazo na kufwika lutu lwendi na mbando zendi zamina zibili.

²⁴ Nayuvwile miyoyo yatendelenga mbando zabo ha kutuka. Yavuminenga ngonehe mungunina wa liwate, ngonehe miyoyo ya bakanzita yayinene ngonehe lizu lya Mpandashilanga. Oho nibo balehelesho sha kutuka, bavungilenga mbando zabo,

²⁵ ngoboni kwekalilenga tuhu kuvuma kwafuminenga ku shiluli hayilu ya mitwe yabo.

²⁶ Hayilu ya shiluli hekalile shuma shimina shiya shamonekelenga ngonehe litanda lya kutendiwa ku mamanya a shafwila na shifwekesha sha muntu wekalilengaho.

²⁷ Namonene ngayi shuma shamonekele ngo lukanda lwendi sha byaziminenga ngonehe shondo sha kubeya na mundilo, pe ku nceto yendi wamonekele ngo mundilo. Kubyazima oku kwamuzingulukile.

²⁸ Lumuni lwekalile na mishombela nimwayo ya nkongolo wamu makumbi, nisho wamonekele wuwahe wa Nyambi ya Ngula. Oho namonene eshe nawililile kukinka lupala hanci.