Eshita 4 - Libuka Lya Kuyela

Mondikayi ukunyepa kuyavwiwa kuli Eshita

¹ Oho Mondikayi alimukile nimwabyo biya byatendiwile, watabwele bivwalo byendi na kukola ku mutima. Niho avwalile bicancolo na kulifukwila mutoko ku mutwe, pe waketwile lukena hakati, haya na kulila na kukuwela shikuma,

² hantu noho ezile ku menginino a musheke. Niye kaliha wenginine mukati ndaba kowa muntu wakuvwala bicancolo wetabilishiwile kwingina mukati.

³ Mu matunga nimwamo, muya babilikile ndayano za mwene, mwekalile kulila mukati ka Bayunda. Bazilile kulya na kulila shikuma na kukwizoka, kami babengi mukati kabo bavwalile bicancolo na kulala ha mutoko.

⁴ Oho bakamilimo ba Eshita ba batunkanga na bantatula bamutongwezele eshe atendele Mondikayi, Eshita walinyengele shikuma. Pe watuminine Mondikayi bya kuvwala bimo ngayi avwale kupitakana kuvwala bicancolo, ngoboni niye kaliha wabitambwile.

⁵ Niho Eshita ehanine Hataki, umo ku bantatula bamu musheke ou ahatile mwene kwinga mukamulimo wa lihano, pe wamutongwezele kuya kuli Mondikayi na kwipwiziza ngayi shumangani eshe shinamwizilili.

⁶ Hataki watutikilile kuli Mondikayi mu lukena ku menginino a musheke.

⁷ Mondikayi wamutongwezele byuma nimwabyo biya byatendiwile kukwendi na wingi wa mali awa a kulupishile Hamani kuyaka mu mfuma ya wene ngayi Bayunda nimwabo bazihiwe.

⁸ Mondikayi wapanikile Hataki liñwati lya ndayano ziya zabilikiwile mu Shusha, kuyaka mutena wakulobeshiwa kwa Bayunda. Mondikayi wamutongwezele ngayi alitwale kuli Eshita mu kumutontwelela eshe bikwenda byuma na kumulomba ngayi aye kuli mwene na kumunyepa ngayi ayuvwile nceshe ha bantu ba lihano.

⁹ Niho Hataki abokele kuli Eshita na kumutongweza ebye ambile Mondikayi,

¹⁰ Pe Eshita wabweshele lizu kuli Mondikayi ngayi,

¹¹ “Bankongo nimwabo bamwene hinge bantu ba kulimuka eze ndayano, kowa ukuya mukwingina mukati ka shipango na ku mona mwene kwakubula kwihaniwa, uya muntu nafwanini kuzihiwa, ndele ku uya muntu akukatwila mwene muwana wendi wa ngolinde, pe uya muntu kukazihiwa wufwako. Ngoboni yengakale hi ngonda kufuma haya anyihanine mwene.”

¹² Oho Mondikayi atambwile lizu lya Eshita,

¹³ wamutuminine lizu lya kumubela ngayi, “Hinga uhanganika ngayi ukapanza ku Bayunda bamina ndaba ngayi uli mu lukena.

¹⁴ Ndi uku mwena tuhu nee ha shikati sha kufweka ngonehe eshe, kuyavwa kukafuma kuyilu kwiza mu kuyavwa Bayunda, kami bakapulwishiwa, ngoboni obe ukafwa na ba lupashi lwa tatiyobe bakamana. Haya yani ukulimuka, kampe hamina nisho shaleteshele ngayi uyekiwe kwinga lihano, ndaba ya shikati sha kufweka ngonehe eshe.”

¹⁵ Niho Eshita abweshele lizu kuli Mondikayi kami ngayi,

¹⁶ “Yanga ukakungule Bayunda nimwabo hamo mu Shusha. Kazilenu kulya byakulya pe mukandombelele. Hinga mulya hinge kunwa shuma shimo ha matena ahatu wushiku na mwaana. Bakamilimo bami ba batunkanga hamo na nami tukalizila kulya hamo nanenu. Ebye byapita nikaya kuli mwene, hinge ngayi kunengi kulwisha ndayano za mwene. Ndi niku fwanina kufwa ha kutenda noho, pe nikafwenga tuhu.”

¹⁷ Niho Mondikayi ayile, pe watendele ngonehe amutongwezele Eshita.