Eshita 2 - Libuka Lya Kuyela

Eshita ukwinga Lihano

¹ Biya oho byapitile, kupilama kwa mwene Zekishi kwamanine, pe wahanganikile hanebye atendele Vashiti naneshe atwalile mpupo ya lihano.

² Nohobene bankongo bamo ba mwene baha mutima bayongwele ngayi, “Shumangani ukubula kuhata ha batunkanga babawahe?

³ Ukutwesha kwimika babilolo mu matunga nimwawo na kubatongweza ngayi balete batunkanga babawahe nimwabo kuno ku litala lya bambuyama muno mu lukena lwalunene lwa Shusha. Mwanga ubayake mu maboko a ntatula Hengayi, ou uli na ngovu na bambuyama bobe, pe baleliwe shiwahe na ku bahongozola na mazi.

⁴ Niho ukahateho kankanga ou ukushinga shikuma na kumwinga Lihano mu mwanya wa Vashiti.” Mwene wahanganikile ngayi mwa shikuma oku kubela kwakuwahe, pe watendele noho.

⁵ Kwekalile mulume wa Kayunda mu lukena lwalunene lwa Shusha, lizina lyendi Mondikayi, mwana Yayila, waku mushobo wa Mbenjamani, muzukulya Kishi ou wengile tata Shimeyi.

⁶ Mwene Nembukandineza wamu Mbambiloni watwalile Mwene Yekoniya waku Yunda hamo na ba lupashi lwa Mondikayi na bamina ba ishalela mu wuntapwa kufuma ku Yelushalema.

⁷ Wekalile na mufwala wendi Eshita, ou wekalile na lizina lya Shihebelu ngayi Handasha. Ha lufu lwa bahemi bendi, Mondikayi wamushimbile na kumulela ngo mwanendi wakulibelekela. Eshita wengile kankanga wamuwahe shikuma kami wekalile na shifwekesha shashiwahe.

⁸ Mwene wafundizizile ngayi, batunkanga babengi batwaliwe ku Shusha na Eshita wekalile hakati kabo. Naniye kami bamuyakile mu musheke wa wene mu kulamiwa kuli Hengayi, ou wengile mukulwane ku matala a bambuyama.

⁹ Hengayi wakolwele Eshita pe wamuyakileko shikuma. Kaliha wehalile kumupana byakulya bya ku fwanina na kumuhongozola. Niho amupanikile mwanya wawuwahe mu litala lya bambuyama na kumupanika batunkanga mutanu na babili babawahe ba ku musheke wa mwene ngayi bamutendelelenga milimo.

¹⁰ Haya Eshita kaliha walitontolwelele ngayi wenga Kayunda, ndaba Mondikayi wamutongwezele ngayi alimbe.

¹¹ Ha mutena ha mutena Mondikayi wayilenga kumbili ya shipango sha litala lya bambuyama, ngayi alimuke eshe anapinduku Eshita na neshe shikatendiwa kukwendi.

¹² Shikati sha kulihongozola kwa batunkanga kwashimbile mwaka wa nzimba, bawabilenga mazi a miila mu zingonda mutanu na yimo, kami bawabilenga mazi akunuka shiwahe a lukumba mu zingonda mutanu na yimo. Kufuma haya batunkanga batwaliwilenga umo kuli Mwene Zekishi.

¹³ Oho kankanga na kankanga afuminenga ku litala lya bambuyama lya ku musheke watweshele kuvwala shivwalo nimwasho eshe ashingile.

¹⁴ Ku mazolo kankanga wayilenga mu litala lya mwene, pe lumenemene wayilenga ku litala lyashenge na kulamiwa kuli ntatula Shayashingazi mukulwane wakulama bakaza mwene bakwinginina. Pe uya mukazi wakwinginina kaliha wabokele kami kuli mwene, ndele ndi niye amushinge shikuma na kumwipula lizina lyendi.

¹⁵ Shikati sha Eshita sha kuya kuli mwene sha kumine, Eshita mwana Ambihayile, mufwala wa Mondikayi, ou wamulelelenga na kumwinga ngo mwanendi wakulibelekela. Eshita wakomokeshelenga bantu nimwabo baya bamumonenenga. Oho shikati shendi sha kumine, Eshita wavwalile tuhu nehe amubelele Hengayi ntatula wa mukulwane wakulama bambuyama.

¹⁶ Nohobene mu mwaka wa mutanu na yibili wakulela kwa Mwene Zekishi, mu ngonda wawulikumi, ngonda wa Tebeti, Eshita bamuletele kuli Mwene Zekishi mu musheke.

¹⁷ Mwene wamuhakile shikuma kupitakana eshe ahakile batunkanga bamina, kami wamuyamizizile na kumuhaka. Pe Mwene Zekishi wamuvwalikile munana wa wene ku mutwe na kumwinga lihano mu mwanya wa Vashiti.

¹⁸ Niho mwene apingile shimbo shashinene sha mayambwayambwa akulemeka Eshita, pe wehanine babilolo bendi nimwabo na bakakwendesha litunga. Niho mwene ayakile mutena wakukatala wa litunga nimwalyo na kutapila bishemo bya ku fwanina ku wene.

Mondikayi ukupulwisha wumi wa Mwene

¹⁹ Oho batunkanga baba kungulwile hamo kami, Mondikayi wemikiwile kwinga mukakwendesha milimo.

²⁰ Ngoboni Eshita, kaliha walitontolwele ngayi wenga Kayunda. Ndaba Mondikayi wamutongwezele ngayi hinga atongweza muntu hinge umo, wombatalile ngonehe amwombatalilenga ha kumu lela oho ushili mushimbi.

²¹ Ha shikati oho Mondikayi engile muka mulimo waku musheke, Mbingitani na Teleshi, bantatula babili bamu musheke aba balaminenga ku menginino a tumpenci twa mwene, bekalile na nzimbo kuli mwene Zekishi, pe bamubebele ngayi bamuzihe.

²² Oho Mondikayi ayuvwileko, watongwezele Lihano Eshita. Eshita niho atongwezele mwene eshe atoshele Mondikayi.

²³ Niho kwekalile kushingishisha, pe shawaniwile ngayi shambo eshe shengile sha kupwisha, nohobene aba balume babili babashwangile ku bitondo. Byuma ebye nimwabyo byatikitiwile mu likota lya wene ku meho a mwene.