Efweshe 6 - Libuka Lya Kuyela

Bana na Bahemi

¹ Bana, ombatalenu bahemi benu muli Mwene, ndaba shuma eshe nisho sha kufwanina.

² Ndaba kwatikitwa ngayi, “Lemeeka tatiyobe na mandiyobe.” Nizo ndayano za kutatika zili na shikulupisho.

³ Ndaba shikulupisho ngayi, “Watenda noho, ukekala na mfuywezi, kami ukayoya myaka yayingi hano hanci.”

⁴ Nanenu bahemi, hinga mupilamisha bana benu, ngoboni muba kulishe na ku balela shiwahe kulama ndayano za Mwene.

Bandungo na bahekulyabo

⁵ Enu bandungo, ombatalenu bahekulyenu ba hano hanci, bamoneshenu maleema amanene na mutima umo, nehi kuli Kilishitu.

⁶ Kaliha kushinga kutenda nehi bakakuwahilisha bantu, ngoboni nehi bandungo ba Kilishitu, tendenu shamutima wa Nyambi na mutima umo.

⁷ Tendenu mulimo na mutima umo ngo kuli Mwene, kaliha ku bantu.

⁸ Mukulimuka ngayi Mwene ukapana ku muntu nimwendi ncuungu ndaba ya milimo yendi yayiwahe anatende hinge niye ndungo hinga wakushoboloka.

⁹ Enu bahekulu, tendenu byuma bimo kukwabo, kami shiyenu ku batinisha. Anukenu ngayi enu na bandungo benu muli na Hekulyenu umo uli muyilu, kami niye wakubula shihota.

Bilwisho bya Nyambi

¹⁰ Kumaninina, bawushinda wami, shumenu muli Mwene na mu ngovu zendi zazinene.

¹¹ Vwalenu likebo nimwalyo lya Nyambi, ngayi mutweshe kwimana na kuleya ku shoshoka kwa Shatana.

¹² Ndaba kaliha tukulwa na bantu, ngoboni tukulwa na makunge a myoyo yayibi yili mu mbimbayilu na batulela ba mu kaye na ndayano na ngovu za shikati shino sha mincimpwe.

¹³ Nohobene shimbenu likebo nimwalyo lya Nyambi ngayi mutweshe kwimana na ku shinta ha mutena wawubi na kwimana hinga mwapitakana nimwabyo.

¹⁴ Nohobene, yimanenu, hinga mwalimanga kupwisha ngonehe mukunzi mu zinkanda zenu na kuvwala shifwiko sha kwoloka sha ha kapumpo,

¹⁵ nyumwa yenu ya ku shimikila ncango zaziwahe za ku mwena, yifweke ngo makatulu munavwala.

¹⁶ Shikati nimwasho, mwikale na kukulupila ngo likebo nayo mukatwesha kutakila mivwi ya zinkama nimwazo za mundilo za Shatana.

¹⁷ Tambulenu kupuluka ngo hoshi yenu na mazu a Nyambi ngo mukwale wa Moyo.

¹⁸ Tendenu nimwabyo na kulombela na kulomba kuyavwa kwa Nyambi na kulomba bikati nimwayo hinga mwatwamininiwa mu Moyo, ndaba yanebye hinga mupopa, lombelelenu bakakuyela nimwabo.

¹⁹ Ndombelelenu, ngayi nitongweze bantu ncimpi za ncango zaziwahe na nkanca,

²⁰ hinga ngayi nikwinga nkamba mu mawenge, nili ntumwana wa ncango zaziwahe. Mundombelele ngayi nishimikile ncango zaziwahe na nkanca nehi nafwanina kutenda.

Kushangwisha kwa mamaninino

²¹ Tikikashi ukumitongweza byami nimwabyo nehi nikutenda, nengi kawushinda wakuhakiwa na mukamulimo wa kupwisha muli Mwene, ukamilimukisha byuma nimwabyo.

²² Nikumutuma kukwenu ndaba ya shuma eshe, ngayi enu mulimuke eshe tuli, kami ngayi amishumankanishe mitima.

²³ Nikulomba Nyambi Tate na Yeshu Kilishitu ngayi bapane ku mwena ku bawushinda, shishemo na kukulupila.

²⁴ Nceshe zikale kukwabo nimwabo ba ku haka Mwene wetu Yeshu Kilishitu na shishemo sha kubula kumana.