Efweshe 4 - Libuka Lya Kuyela

Kuliwana hamo mu lutu

¹ Nohobene ami kayili ndaba ya kutendela milimo Mwene, nikumikowamina, ndaba Nyambi wamihanine ngayi mwende ngonehe ku fwanina kwa lukuwa olwe munehaniwi nalwo.

² Mwinge bakakulishepesha na kulilimbwilisha na lukakatila bikati nimwabyo na kulimanina umo na wamina mu shishemo.

³ Likowaminenu umo na wamina mu Moyo wa Kuyela mu kumangiwa kwa ku mwena.

⁴ Kuli lutu lumo na Moyo wa Kuyela umo, nehi kulumbeza kumo oku mwehaniwile nakwo.

⁵ Kuli Mwene umo, kukulupila kumo na kuzubilisha kumo,

⁶ kuli Nyambi umo niye Tata bantu nimwabo, ou uli hayilu ya nimwabo, ukutenda milimo kupitila mu nimwabo, kami uli mu nimwabyo.

⁷ Ngoboni muntu nimwendi kukwetu unatambulu bishemo, kuya na byuma ebye Kilishitu abalakanyine kutapishila bishemo byendi.

⁸ Ndaba kwatikitiwa ngayi, “Oho akandamine kuyilu, watwamininine bantapwa babengi, na kupana bishemo ku bantu.”

⁹ Haya mazu akwamba ngayi, “wakandamine” akutontolola bishini? Akutontolola ngayi ha kutatika washulukile ku zimbalila za ku nceto ya hanci.

¹⁰ Niye washulukile wenga ou bene wakandamine kwakutali kuyilu ya mayilu, ngayi enzalishe byuma nimwabyo.

¹¹ Niye wapanine bishemo ku bantu, ku bamo bantumwana, ku bamina bamiluwe, ku bamina baka ku shimikila, ku bamina balishani na balongeshi.

¹² Mulimo wabo wengile waku longesha bantu ba Nyambi, ndaba ngayi ba kutenda milimo ya ku shimikila na kuzikisha litengo, lutu lwa Kilishitu.

¹³ Hantu nimwetu twize na mutima umo wakukulupila na wa kalimukisho ka Mwana Nyambi ku muntu wakulembuka, ku shipimisho sha mwimo wa kwinzala kwa Kilishitu.

¹⁴ Twafwanini ku shiya kutenda ngo batwanuke, hinga twitabilisha bantu kutwongeza na bilongesha byabo bya mahalo, bikufweka ngo mpepo yikunkwancana noku, noku.

¹⁵ Ngoboni hakwamba kupwisha mu shishemo, tukule mumwendi mu byuma nimwabyo, niye nengi mutwe wa lutu.

¹⁶ Kilishitu ukununga hamo na kwingisha bimamo ngayi bitende milimo hamo shiwahe, oho lukukulisha na ku shuma ndaba ya shishemo.

Wumi wawupya muli Kilishitu

¹⁷ Nohobene mu lizina lya Mwene nikumitongweza ngayi hinga mwikala ngonehe batendanga Bakamatunga ha kutenda kuya na bihanganiko byabo.

¹⁸ Ngana zabo zinashipi, kami banatapuluku ku wumi wa Nyambi ndaba ya wulube uli mumwabo na ndaba ya wushishitwa wa mitima yabo.

¹⁹ Bafwalyo lisheni, banalipana ku lwiholwiho na kutenda byuma bya mazilo nimwabyo na shikala.

²⁰ Ngoboni enu kaliha mwalilongeshele Kilishitu nahiyo.

²¹ Shinga ndi munamuyuvwishi na kulongeshiwa kukwendi, nehi kupwisha kuli muli Yeshu.

²² Mwalilongeshele ngayi shiyenu nyinkalo ya mwaka, eyi yinabipishiwi na mahungu akwongeza.

²³ Kami ngayi mwinge babapya mu mitima na mu bihanganiko byenu.

²⁴ Na kuvwala muntu wamupya, ou unalengiwi na kufweka Nyambi mukwoloka na kuyela kwa kupwisha.

²⁵ Haya shiyenu mahalo. Muntu nimwendi ambe kupwisha na ndambo yendi, ndaba etu tukwinga bimamo bimo kuwamina.

²⁶ Oho ukupilama, hinga utenda wubi, hinga uyitabila ngayi kupilama kwobe kukupukalishe, kami hinga uyitabila ngayi mutena ukulelele hinga wapilama.

²⁷ Hinga upanika mwanya Shatana ngayi akupukalishe.

²⁸ Ou wayibilenga, hinga ayiba kami, ngoboni shinene akalamane na kutenda milimo, ngayi ekale na shuma sha kupanika kukwendi unabulubyo.

²⁹ Mu kanwa kobe hinga mufuma shambo sha mazilo, ngoboni amba shambo shashiwahe sha kuyavwa na ku zikisha, ngayi shitweshe kuyavwa baya ba kuyuvwa.

³⁰ Hinga muyenesha Moyo wa Kuyela, ou munakantiwi kuleta ku mutena wa kukuliza.

³¹ Fumishenu hakati kenu nkoko nimwazo na wukali na kupilama, makosho na lihandu bifume kukwenu.

³² Ngoboni yikalenu na shishemo umo ku wamina na mitima yayiboto na kuliyatila umo na wamina, nehi Nyambi anamiyatili ndaba ya Kilishitu.