Biblia Todo Logo
Bìoball air-loidhne

- Sanasan -

Efweshe 3 - Libuka Lya Kuyela


Mulimo wa Paulu ku Bakamatunga

1 Ndaba ya shuma eshe, ami Paulu kayili ka Yeshu Kilishitu nikumilombelela ndaba ya nenu Bakamatunga.

2 Kuyuvwa mwayuvwile bya milimo ya nceshe za Nyambi atupanikile, ya ku shimikila nceshe zendi.

3 Nyambi waholwele ncimpi zendi kukwami. (Nehi natikitile mwaka muwipi,

4 oho mu kulaba ebye, mukalimuka ngayi niku yuvwishisha ncimpi za Kilishitu.)

5 Ncimpi eze bantu ba ku mwaka kaliha bazilimukile, ngoboni Nyambi ha shikati shino unazihololo mu Moyo wa Kuyela ku bantumwana bendi ba kuyela na ku bamiluwe.

6 Ncimpi eze za kupitila mu ncango zaziwahe, Bakamatunga nabo kami banafwanini kutambula shitapilo sha shikulupisho shendi muli Kilishitu Yeshu.

7 Nyambi wamfutwile kwinga mukamulimo, wa ncango zaziwahe eze na nceshe za Nyambi zapanikiwile kukwami na ntendelo ya ngovu zendi.

8 Hakati ka bantu ba Nyambi nimwabo ami nili mukala wabo, ngoboni Nyambi wampanikile ou mulimo ngayi nishimikile mukati ka Bakamatunga wuheti wakubula kumana wa Kilishitu,

9 na ku monesha bantu nimwabo ncimpi za Nyambi eze zaholekiwile, Nyambi, niye Shakalenga ou walengele byuma nimwabyo, waholekele ncimpi eze bikati bya kunyima.

10 Wuluno ukushinga ngayi kupitila mu litengo, wene na batulela ba mu myanya ya muyilu kulimukiwe ngana za Nyambi za kulishiyashiya.

11 Nyambi watendele ebye ngayi kutendiwe ebye afungile muli Kilishitu Yeshu Mwene wetu.

12 Mumwendi tunakanca na kuhenyena kuli Nyambi na kukulupila.

13 Nohobene nikushinga ngayi hinga mupopa ndaba ya makando ami kukwenu ndaba kunyima ya nimwabyo kukeza wuwahe kukwenu.


Kuhaka kwa Kilishitu

14 Ndaba ya shuma eshe, nikushintama ku manungo na kulombela kuli Tate,

15 kukwendi mikoka nimwayo ya muyilu na hanci bikutumbiwa na lizina lyendi.

16 Nyambi wa bikomokesho na wuwahe. Nikulomba ngayi amishumishe mwinge bandongesha ba kukalamana.

17 Kami ngayi Kilishitu ekale mu mitima yenu ndaba ya kukulupila, ngayi enu muhalabe mipishi mu shishemo.

18 Nikulomba Nyambi ngayi, hamo na bakakuyela nimwabo, ngayi muyuvwishishe mu wunene na mu wutali, kukankama na kunonka kwa shishemo sha Kilishitu.

19 Mwa shikuma nikumilombelela ngayi mulimuke shiya shishemo sha Kilishitu sha kupitakana kulimuka kwa muntu, ngayi mwinzale na kwinzala nimwako kwa Nyambi.

20 Na ngovu zendi zikutenda milimo mumwetu, ukutwesha kutenda byabingi kupitakana ebye mu kulomba hinge kubihanganika.

21 Nyambi atambule wuwahe mu litengo na muli Kilishitu Yeshu mwaya myaka, kwakubula kumana! Ameni.

Libuka Lya Kuyela © Bible Society of Zambia, 2020.

Bible Society of Zambia
Lean sinn:



Sanasan