Baloma 6 - Libuka Lya Kuyela

Kwikala na wumi muli Kilishitu

¹ Haya tukwamba bishini? Kati tukuzamina mu wubi ngayi nceshe za Nyambi zihanye ndi?

² Nyambi akane, etu tunafu ku wubi, tukuyoya nahiti mu wubi?

³ Kati kulimuka mufwako ngayi etu nimwetu oho twazubilishiwile muli Yeshu Kilishitu twazubilishiwile mu lufu lwendi ndi?

⁴ Nohobene oho twazubilishiwile, twafwile hamo nendi na kufundiwa hamo nendi, ngayi nehi Kilishitu ashangukile ku bafu na ngovu za Tate nahiyo netu kami mwanga twikale na wumi wawupya.

⁵ Ndaba ndi mu kuzubilishiwa tunafu hamo na Kilishitu, nohobene, tukaliwanika hamo nendi mu ku shanguka kwendi.

⁶ Tukulimuka ngayi nyinkalo yetu ya mwaka yakolekiwile ha shishempakano hamo na Kilishitu, ngayi lutu lwa wubi lukanonge, pe hinga twinga kami bandungo ku wubi.

⁷ Ndaba ngayi muntu unafu, pe unashoboloko ku ngovu za wubi.

⁸ Wuluno ndi tunafu hamo na Kilishitu, tukukulupila ngayi tukayoya hamo nendi kami.

⁹ Tukulimuka ngayi Kilishitu washangukile ku bafu, kami kukafwa wufwako. Lufu lufwazo ngovu hahendi.

¹⁰ Ndaba lufu afwile, lwengile lufu lwa ku wubi, kami wafwile tuhu kamo. Pe wumi akuyoya, ukuyoyela kuli Nyambi.

¹¹ Nahiyo kami nenu mulilabe ngayi munafu ku wubi, ngoboni muli na kuyoyela kuli Nyambi kupitila muli Yeshu Kilishitu.

¹² Nohobene hinga mwitabila ngayi wubi uhete zinyutu zenu ziya zikabola, kami hinga mwombatala mahungu a wubi.

¹³ Hinga mupana shimamo sha lutu lwenu ku wubi, ngayi shitende milimo ya kutengama. Ngoboni lipanikenu kuli Nyambi, ngonehe bantu bengile ba kufwa, haya bali na wumi. Kami panenu bimamo byenu nimwabyo kuli Nyambi, ngayi bitende milimo ya kwoloka.

¹⁴ Wubi kutwesha kumi heta wufwako, ndaba kaliha muli mu nceto ya ndayano, ngoboni muli mu nceto ya nceshe za Nyambi.

Bandungo ba byakwoloka

¹⁵ Haya nahiti? Kati tukatenda wubi ndaba ngayi kaliha tuli mu nceto ya ndayano ngoboni tuli mu nceto ya nceshe za Nyambi ndi?

¹⁶ Kati kulimuka mufwako ngayi ndi mu kulitupula ku muntu ngayi mwinge bakakumwombatala ngonehe bandungo, pe mukwinga bandungo ba uya mukwombatala ndi? Mukutwesha kwinga bandungo ba wubi ukuleta lufu, hinge mu kutwesha kwinga bakakwombatala Nyambi mwanga mwingiwe bakulunga.

¹⁷ Tukukambilila kuli Nyambi, ndaba hinge ndi mwengile bandungo ba wubi, ngoboni munombatala na mitima yenu nimwayo kupwisha kuli biya mwatambwile.

¹⁸ Mwashoboloko ku wubi, haya mwafutukakale bandungo ba byakwoloka.

¹⁹ Nikwamba na shiheka sha wuntu ndaba ya kupopa kwenu. Mwaka mwapanine bimamo byenu ku wulungo wa bya mazilo na kutenda bya wubi. Haya litupulenu ngayi mwinge bandungo ba Nyambi ba byakwoloka mwanga mutende bya kuyela.

²⁰ Oho mwengile bandungo ba wubi, kaliha mwawahililishile Nyambi.

²¹ Haya munawanaho bishini ha kutenda byuma ebye muli nabyo na lisheni? Ndaba lufu niwo mamaninino a byuma bya nehe.

²² Ngoboni wuluno mwashoboloko ku wubi, pe himuli bandungo ba Nyambi, ngayi mwanga muyeleshiwe, pe mwikale na wumi wa mwaya myaka.

²³ Ndaba kuhola kwa wubi kwenga kufwa, ngoboni shishemo sha Nyambi aholeshanga shenga wumi wa mwaya myaka muli Mwene wetu Yeshu Kilishitu.