Baloma 3 - Libuka Lya Kuyela

¹ Kati Bayunda banapitakana nahiti Bakamatunga? Kati mukanda ukuyavwa nahiti?

² Nimwabyo byabiwahe. Ha mu ntanzi, Nyambi wambile mazu wendi ku Bayunda.

³ Mwa shikuma bamo ku Bayunda kaliha bakulupilile. Haya ndaba ya kubula kukulupila kwabo, pe kupwisha kwa Nyambi kunamana ndi?

⁴ Byo, kaliha noho! Nyambi wenga wa kupwisha, hinge ndi muntu nimwendi ukwinga wa mahalo. Nehi kwatikitiwa ngayi, “Obe Nyambi mwanga bantu balimuke ngayi wambanga bya kupwisha, kami kowa wakupitakana kuyata kwobe.”

⁵ Haya ndi kutengama kwetu kuku monesha shiwahe ngayi Nyambi wenga wakwoloka, pe tukutwesha kwamba ngayi Nyambi kaliha uli na kutenda shiwahe oho akutushushula ndi? (Nikwamba ngonehe bambanga bantu nimwabo.)

⁶ Byo, kaliha noho! Ndi Nyambi kaliha wakwoloka, pe ukayata kaye nahiti?

⁷ Haya ndi mahalo wami aku monesha kupwisha kwa Nyambi na kuhanyisha wuwahe wendi, pe ami bishini nikuyatiwa ngonehe mukawubi?

⁸ Ndabangani tukubula kwamba ngayi, “Tuyenunga tutende wubi mwanga wuwahe wize?” Bantu bamo banatuhandulu na kutumangilila byambo ngayi nisho twambanga. Bakayatiwa ngonehe kunabafwanini.

Kowa muntu wakwoloka

⁹ Haya hinahiti? Kati etu Bayunda tunapitakana Bakamatunga ndi? Byo, kaliha noho! Tunamba mwaka ngayi Bayunda na Bakamatunga, nimwabo bali na wubi.

¹⁰ Ngonehe kwatikitiwa ngayi, “Kowa muntu wa kulunga, kowa hinge umo,

¹¹ kowa mukaku yuvwishisha, kowa mukakushingishisha Nyambi.

¹² Bantu nimwabo banashanuku banafutamini Nyambi, nimwabo hamo banayi ku byabibi, kowa hinge umo ukutenda byabiwahe, kowa hinge umo.

¹³ Mulibu wabo unengi shinzimbi sha kuyahama, bakwongeza na zindimi zabo, ku nceto ya mivumbo yabo kuli wuhungu ngonehe wa bampili.

¹⁴ Tunwa twabo tunenzala na matuka na mazu amabi.

¹⁵ Mawulu abo etukanga shawangu kuya na kuyita mukeza.

¹⁶ Babipishanga na kunongesha nimwako oku bakuya.

¹⁷ Kulimuka nzila ya ku mwena bafwako.

¹⁸ Kuyuvwila Nyambi bowa ku meho wabo bafwako.”

¹⁹ Wuluno tukulimuka ngayi byuma nimwabyo bili mu ndayano bikwamba kukwabo bali mu nceto ya ndayano ngayi kanwa nimwako kakamweneshiwa, pe kaye nimwako kakekala na mulandu ku meho a Nyambi.

²⁰ Nohobene kowa muntu hinge umo ukolokeshiwa ku meho a Nyambi ha kutenda ebye ndayano zikushinga, ndaba mu ndayano nimo bantu balimukilanga ngayi banatende wubi.

Eshi Nyambi akwolokesha muntu kukwendi

²¹ Ngoboni wuluno nzila ya Nyambi ya kwolokesha bantu kukwendi kwakubula Ndayano za Moshesha. Niyo nzila iya zapakile ndayano na bamiluwe bayipakile.

²² Nikwo kwoloka kwafumanga kuli Nyambi, kuya kwezanga ku baya nimwabo banakulupili muli Yeshu Kilishitu. Nyambi watendanga ebye ku baya nimwabo bakwitabila muli Kilishitu, ndaba kowa kutapuluka.

²³ Ndaba nimwabo banatende wubi, pe banashalili ku wuwahe wa Nyambi.

²⁴ Ngoboni bakwolokeshiwa tuhu na nceshe za Nyambi, mu kulamwina oku kuli muli Yeshu Kilishitu.

²⁵ Nyambi wamutupwile, ngayi na mukeza wendi, mwanga enge shihingo sha wubi wa bantu bakukulupila mumwendi. Nyambi watendele ebye ngayi amoneshe kwoloka kwendi, ndaba ku mwaka watatililile, pe wayatililile wubi wa bantu.

²⁶ Watendele ebye ngayi amoneshe kwoloka kwendi ha shikati shino ngayi niye wa kupwisha kami niye ukwolokesha ou nimwendi ukukulupila muli Yeshu.

²⁷ Haya kuliyemeza kuli kuti? Kunafumishiwi. Ndaba ya bishini? Ndaba ya kwombatala ndayano ndi? Byo, ngoboni ndaba ya kukulupila.

²⁸ Nohobene tukulimuka ngayi muntu ukwolokeshiwa kuli Nyambi na kukulupila, kaliha na kwombatala ndayano.

²⁹ Kati Nyambi wenga tuhu Nyambi wa Bayunda ndi? Kati kaliha niye kami Nyambi wa Bakamatunga ndi? Mwa shikuma niye kami Nyambi wa Bakamatunga.

³⁰ Ndaba kuli tuhu Nyambi umo pele, niye ukwolokesha bakamukanda na kukulupila, kami niye ukwolokesha Bakamatunga na kuya kukulupila kumo.

³¹ Haya tukumanisha ndayano nanoku kukulupila ndi? Byo, kaliha noho, ngoboni tukushumisha ndayano.