Baloma 2 - Libuka Lya Kuyela

Nyatilo ya Nyambi

¹ Nohobene, kawushinda wami, obe ukuyata baminobe bya kuliyawila ufwabyo, ndaba oho ukuyata baminobe, ukuliyata obe mwine, ndaba watendanga byuma biya wayatanga baminobe.

² Ngoboni tukulimuka ngayi kuyata kwa Nyambi kwenga kwa kupwisha ku baya ba kutenda byuma bya noho.

³ Ngoboni obe mukakuyata aba ba kutenda bya noho, kati na nobe kami watendanga byuma biya batendanga baya ukuyata. Ukuhanganika ngayi ukapanza ku kuyata kwa Nyambi ndi?

⁴ Kati ukulimbulula shishemo sha Nyambi shashinene na kubomba kwendi na kutatilila kwendi ndi? Kati kaliha ukulimuka ngayi shishemo sha Nyambi shi ku kutwaminina ku kutenguluka ndi?

⁵ Ngoboni uli na mutima wawukalu shikuma, kami uli na ku nenehesha kashushwilo kobe ha Mutena wa wukali wa Nyambi oho kuyata kwakwoloka kukaholoka.

⁶ Nyambi ukapana muntu na muntu kwezekesha na milimo yendi.

⁷ Baya bali na lunzewe lwa kutenda byabiwahe, bakushinga wuwahe na maleema na kubula ku bola, pe Nyambi ukabapana wumi wa mwaya myaka.

⁸ Ngoboni ku bakankani na bakakukana kupwisha, ngayi bakonke bya kutengama, Nyambi ukabakalihila na kubapilamina.

⁹ Kukekala makalikiza na makando ku muntu nimwendi ukutenda wubi. Kutatika taha na Bayunda niho ku Bakamatunga.

¹⁰ Ngoboni Nyambi ukapana wuwahe na maleema na ku mwena, ku muntu nimwendi ukutenda byabiwahe. Kutatika taha na Bayunda niho ku Bakamatunga.

¹¹ Ndaba Nyambi kaliha wekala na shihota.

¹² Bakamatunga batendele wubi kwakubula Ndayano za Moshesha bakanonga kami kwakubula mulao wa Moshesha. Kami Bayunda batendele wubi hinga bekala na Ndayano za Moshesha, bakayatiwa kami na Ndayano za Moshesha.

¹³ Ndaba kaliha ngayi baya ba kuyuvwa mulao wa Nyambi nibo bakenga bakwoloka ku meho wendi, ngoboni baya bakwombatala nibo bakenga bakwoloka.

¹⁴ Ndaba oho Bakamatunga baya babula mulao wa Nyambi, ndi munyoyelo yabo ya shihemwa hiba kutenda ebye ukwamba mulao, pe ebye ba kutenda, bikenga mazu a Nyambi yabo nibo bamwine, hinge ndi mazu a Nyambi bafwawo.

¹⁵ Ebye ba kutenda, biku monesha ngayi biya bili mu mulao wa Nyambi, byatikitiwa mu mitima yabo. Shikeketima shabo bo kami shiku ba paka, pe bihanganiko byabo ha shikati shamina bikubayatisha, kami ha shikati shamina bikubemanina.

¹⁶ Nohobene kuya na ncango zaziwahe eze ni ku shimikila, nisho kukekale ha Mutena uyo oho Nyambi akayata bihanganiko bya bantu bya kulimba, kupitila muli Yeshu Kilishitu.

Bayunda na mazu a Nyambi

¹⁷ Haya obe ndi ukulitumba obe mwine ngayi uli Kayunda, kami ukukulupila mu mulao wa Nyambi na kuliyemeza muli Nyambi,

¹⁸ pe ukulimuka ebye akushinga Nyambi ngayi ubitende, kami unalilongeshe mu mazu a Nyambi ngayi uhate byabiwahe.

¹⁹ Unalikulupishi obe mwine ngayi uli mukakutwaminina tushishitwa na lumuni lwa baya bali mu mincimpwe,

²⁰ uli mukakufundiziza bakuyeba na mukaku longesha batwanuke. Unalimuku shiwahe ngayi mu mulao wa Nyambi, muli kalimukisho na kupwisha.

²¹ Nohobene oho uli na ku longesha baminobe, kati na nobemwine uli na kulilongesha ndi? Obe uku shimikila ngayi, “Hinga muyiba.” Kati obe wayibanga ndi?

²² Obe ukwamba ngayi, “Hinga mutenda wumambe.” Kati obe watendanga wumambe ndi? Obe wazimba tunankishi, kati obe wayibanga bya mu matala akulemeshela tunankishi ndi?

²³ Obe mukakuliyemeza na mulao, ngoboni waletanga lisheni kuli Nyambi ha kukiluka mulao wendi.

²⁴ Nehi kwatikitiwa ngayi, “Lizina lya Nyambi lina kuhanduliwa ku Bakamatunga ndaba yanenu Bayunda.”

²⁵ Mwa shikuma mukanda ukuyavwa, ndi ukwombatala mulao wa Nyambi, ngoboni ndi obe ukukiluka mazu a Nyambi, pe ukwinga ngo kaliha waya ku mukanda.

²⁶ Nohobene wakubula kuya ku mukanda ndi ukulama mazu a mulao wa Nyambi, kati Nyambi kaliha ukalabila uya muntu ngo uya waya ku mukanda ndi?

²⁷ Mukamatunga ndi ukwombatala mulao wa Nyambi ukamiyata hinge ndi enu muli na mazu atikitiwa kami mwaya ku mukanda. Ukamiyata ndaba mu kukiluka mulao wa Nyambi.

²⁸ Ndaba Kayunda mwine, kaliha ou ukwinga tuhu Kayunda ha munkanda, kami mukanda waine, kaliha ou ukutendiwa tuhu ha munkanda ku lutu.

²⁹ Ngoboni Kayunda wa kupwisha, muntu uya nengi Kayunda na mukati. Nohobene na mutima wendi unayi ku mukanda mu moyo, kaliha na mazu atikitiwa tuhu. Muntu wanehe, kaliha ukuyemeziwa ku bantu, ngoboni ukuyemeziwa kuli Nyambi.