Baloma 14 - Libuka Lya Kuyela

Hinga wuyatisha kawushinda wobe

¹ Mukobelelenu muntu wakupopa mu kukulupila, hinga mulikananganisha ha bihanganiko byendi.

² Ndaba muntu umo ukuhanganika ngayi, ukutwesha kulya byakulya nimwabyo, ngoboni wamina wakupopa mu kukulupila, ukulya mashiha tuhu.

³ Muntu ukulya nimwabyo hinga anyanca ou ukubula kubilya, kami muntu ukulya mashiha hinga anyanca ou ukulya nimwabyo, ndaba Nyambi unamutambulu.

⁴ Kati obeyani ngayi unyance mukamulimo wa muntu wamina? Hekulyendi niye ukalimuka sha kutenda, ndi uya mukamulimo wendi ukatwesha hinge ndi ukakwanga. Ukatwesha kushumisha ndaba Nyambi ukutwesha kumushumisha.

⁵ Muntu umo ukuhanganika ngayi mutena umo ukupitakana wamina. Wamina ukuhanganika ngayi matena nimwawo alifweka. Muntu nimwendi nafwanini ku yuvwishisha niye mwine.

⁶ Muntu ukulama mutena umo, ukutenda noho kuli Mwene. Muntu ukulya nimwabyo, ukutenda noho mu kulemesha Mwene, ndaba ukukambilila kuli Nyambi ha sha kulya. Ou ukubula kulya nimwabyo ukutenda noho kuli Mwene, ndaba ukukambilila kuli Nyambi.

⁷ Ndaba nimwetu kowa ukuliyoyela niye mwine, kami kowa ukulifwila niye mwine.

⁸ Ndaba hinge tukuyoya, tukuyoyela muli Mwene, kami hinge tukufwa, tukufwila muli Mwene. Nohobene hinge ndi tukuyoya, hinge ndi tukufwa, tuli ba Mwene.

⁹ Ndaba Kilishitu wafwile, kami washangukile, ngayi enge Mwene wa bafu na babomi.

¹⁰ Haya obe ndabangani ukuyata kawushinda wobe? Hinge ndabangani ukuyenesha kawushinda wobe? Ndaba nimwetu tukayimana kumbili ya Nyambi ngayi akatuyate.

¹¹ Ndaba kwatikitiwa ngayi, “Mwene ukwamba ngayi, mwa shikuma ngonehe ami nayoya, bantu nimwabo bakashungumana kukwami, kami zindimi nimwazo ziketabila ngayi ami Nyambi.”

¹² Nohobene muntu nimwendi ukalitontolola niye mwine kuli Nyambi.

Hinga wupukalisha kawushinda wobe

¹³ Nohobene hinga tulinyanca umo na wamina. Kami hinga uyaka shipukalisho mu nzila hinge shuma sha kuwisha kawushinda wobe.

¹⁴ Oho nili muli Mwene Yeshu ninalimuku shiwahe ngayi, kowa sha kulya shinaliziliki nisho shimwine, ngoboni ndi muntu ukuhanganika ngayi shiya sha kulya sha shizila, pe shikwinga sha shizila kukwendi.

¹⁵ Ndi kawushinda wobe ukuyena ndaba yanebye ukulya, pe kaliha uli na kutenda bya shishemo. Hinga unongesha kawushinda wobe ou Kilishitu afwilile na byakulya ebye ukulya.

¹⁶ Eshe mu ku mona ngayi shashiwahe kukwenu, hinga mwitabila wamina kushitoya ngayi sha shibi.

¹⁷ Ndaba Wene wa Nyambi kaliha kulya na kunwa, ngoboni kwoloka na ku mwena na ku wahilila mu Moyo wa Kuyela.

¹⁸ Ndaba muntu ukutendela milimo Kilishitu na shiheka eshe, ukuwahilisha Nyambi, kami bantu ba kumuyemeza.

¹⁹ Nohobene tukonke byuma bya kuleta ku mwena na byuma bya kulishumisha umo na wamina mu kukulupila.

²⁰ Hinga unongesha mulimo wa Nyambi ndaba ya byakulya. Byakulya nimwabyo binetabilishiwi kubilya, ngoboni sha shibi kulya ebye bikupukalisha baminobe.

²¹ Shashiwahe kubula kulya nyama, hinge kunwa waine, hinge kutenda shuma shamina sha kupukalisha kawushinda wobe.

²² Ha byuma ebye ukukulupila, ubilame mukati kobe na Nyambi. Uli na mfuywezi ou ukubula kulinyanca ndaba ya shuma eshe anetabili.

²³ Ngoboni ou uli na nkani hanebye a kulya, ndi ukulya na kubula kukulupila, Nyambi ukamuyata. Ndaba kutenda na kukulupila wufwako. Shuma nimwasho akutenda muntu na kubula kukulupila shenga wubi.