Baloma 13 - Libuka Lya Kuyela

Milimo tunafwanini kutenda ku bakakulela litunga

¹ Muntu nimwendi ombatale bakakulela litunga. Ndaba kowa wene wakubula kufuma kuli Nyambi, aba bamyene baliko Nyambi niye unabetabilishi ngayi bekaleko.

² Nohobene niye ukukana wene, ukukana ebye anemiki Nyambi. Pe niye ukukana, ukulishingishila kuyatishiwa niye mwine.

³ Ndaba bakakulela, kaliha batinishanga bakakutenda milimo yayiwahe, ngoboni bakakutenda milimo yayibi. Ukushinga ngayi ubule kwikala na bowa wakutina bamyene ndi? Tenda shiwahe, pe bakakuyemeza.

⁴ Ndaba benga bakamilimo ba Nyambi, pe wenga mulimo wabo ngayi bakuyavwe. Ngoboni ndi ukutenda shibi, tina, ndaba bali na ngovu za kukushushula. Batulela benga bakamilimo ba Nyambi, pe bashushulanga bakakutenda wubi ku monesha wukali wa Nyambi.

⁵ Nohobene mu ku fwanina kwombatala batulela, kaliha ndaba ya wukali wa Nyambi, ngoboni ndaba ya shikeketima.

⁶ Ndaba yanebye, munafwanini kutela mutelo kami, ndaba batulela benga bakamilimo ba Nyambi, pe unengi mulimo wabo kutenda ebye.

⁷ Nohobene bapanenu nimwabyo binafwanini, panenu mutelo kukwendi uku fwanina mutelo, patalenu kukwendi uku fwanina kupatalisha, panenu maleema kukwendi uku fwanina maleema na kuyemeza ou uku fwanina kuyemeziwa.

Milimo ya muntu kuwamina

⁸ Hinga mwikala na mukuli ku umo na wamina, ngoboni lihakenu umo na wamina. Ndaba niye uku haka wamina unenzalishilili ndayano.

⁹ Ndaba ndayano zikwamba ngayi, “Hinga utenda wumambe, hinga uziha, hinga uyiba, hinga ulishoza shuma shaminobe,” nimwabyo ebye bili mu ndayano zikwamba ngayi, “Haka ndambo yobe ngonehe walihaka obe mwine.”

¹⁰ Ndaba ndi uku haka muntu, kutwesha kumutenda byabibi wufwako. Nohobene kulihaka kunengi kwinzalishilila ndayano.

¹¹ Tendenu noho, ndaba munalimuku ngayi shikati shinakumu ngayi enu mupinduke mu tulo. Ndaba kupuluka haya kuli hahepi nanetu kupitakana ngonehe twakulupilile ha muntanzi.

¹² Wushiku uli na kuya na kumana, nohobene mutena uli hahepi. Haya tushiye milimo ya mincimpwe, pe tuvwale makebo a mwaana.

¹³ Twende shiwahe ngonehe bantu bakwenda mu mwaana, hinga kwikala ngwaluke na kukolwa, hinga kwikala lwiholwiho na likenkemi, hinga kwikala nkani na mwili.

¹⁴ Ngoboni livwikenu Mwene Yeshu Kilishitu, shiyenu kukobokela mahungu a wuntu, ngayi mubule kutenda bifungo byawo.