Baloma 12 - Libuka Lya Kuyela

Kilishitu nalete wumi wawupya

¹ Nohobene bawushinda nikumilomba na nceshe za Nyambi, ngayi mutupule zinyutu zenu, zinge nkombela ya kuyoya na ya kuyela iya yikuwahililisha Nyambi. Eshe nisho munafwanini kulemesha Nyambi mu moyo.

² Kami hinga mulifweka na nyoyelo ya bantu ba muno mu kaye, ngoboni lehenu Nyambi afutule bihanganiko bya mitima yenu. Pe mukatwesha kulimuka bifungo bya Nyambi, bifungo byendi byenga byabiwahe, byenga bya kuwahilisha, kami byenga bya kulembuka.

³ Ndaba nikwamba na nceshe eze zapanikiwile kukwami, pe muntu nimwendi mukati kenu, hinga alihanganika ngayi wamunene kupitakana eshe ali. Ngoboni nafwanini kuliyata niye mwine kwezekesha na kukulupila kuya anamupana Nyambi.

⁴ Ndaba nehi tuli na bimamo byabingi mu lutu lumo, nohobene, kaliha ngayi ebye bimamo nimwabyo byatendanga mulimo umo.

⁵ Nanetu kami hinge ndi tuli babengi, tunengi lutu lumo muli Kilishitu, kami nimwetu tuli bimamo bya umo na wamina.

⁶ Tuli na bishemo bya kutapuluka, kwezekesha na nceshe ziya zinapanikiwi kukwetu. Ndi tunapanikiwi ngayi twinge bakakulubulula lizu, pe tunafwanini kulubulula kwezekesha na kukulupila kwetu.

⁷ Ndi kutenda milimo, pe tendenu milimo, ou napanikiwi ku longesha, alongeshe.

⁸ Ou napanikiwi ngayi enge mukakushumankanisha baminendi, abashumishe. Ou napanikiwi ngayi enge mukakupana baminendi, apane na mutima umo, ou napanikiwi kutwaminina, atwaminine na ku shoshoka. Ou napanikiwi nceshe, atende na ku wahilila.

⁹ Shishemo shibule shishweka. Zimbenu byabibi, kakatilenu byabiwahe.

¹⁰ Lihakenu shikuma na shishemo sha wushinda, kami lipanenu maleema shikuma umo na wamina.

¹¹ Hinga mwinga wuvwa mu milimo, yikalenu na ntukumina mu moyo, tendelenu milimo Mwene.

¹² Wahililenu oho mu kulumbeza, yikalenu na lunzewe mu makalikiza, kami lombelenu shikati nimwasho.

¹³ Litapishilenu biya muli nabyo na bakakukulupila baya banabibulu. Tekeshenu bayeni.

¹⁴ Fuywelenu aba ba kumiyandisha. Bafuywelenu, hinga muba kumangiza.

¹⁵ Wahililenu na baya ba ku wahilila, lilenu na baya ba kulila.

¹⁶ Yikalenu na mutima umo ku umo na wamina. Hinga muliyemeza, ngoboni yikalenu na mutima wakutwesha kuliwanika hamo na bantu tuhu ba nahiya. Hinga mulimona kukeya.

¹⁷ Hinga mubweshela wubi na wubi. Tendenu byabiwahe ku meho a bantu nimwabo.

¹⁸ Ndi shikutwesheka, enu munafwanini kwikala mu ku mwena na bantu nimwabo.

¹⁹ Enu bahoni bami, hinga mubweshela wubi enu bamwine, ngoboni bashiyenu mu wukali wa Nyambi. Ndaba kwatikitiwa ngayi, “Kubweshela milandu kwenga kwami, nikababweshela, nisho akwamba Mwene.”

²⁰ Nohobene ndi mukankole wobe uli na nzala, mupane bya kulya alye, ndi uli na linyontwa, mupane mema anwe. Ndaba ndi ukwinga noho, ukamukungwila mashanga a mundilo ha mutwe wendi.

²¹ Hinga uleha wubi ngayi ukukone, ngoboni tenda wuwahe mwanga ukone wubi.