Baloma 11 - Libuka Lya Kuyela

Nceshe za Nyambi ha Ishalela

¹ Haya nikwipula ngayi, kati Nyambi unakana bantu bendi ndi? Byo, kaliha noho! Ndaba amibene nili Kaishalela, muzukulya Abulahama, waku mushobo wa Mbenjamani.

² Nyambi kaliha nakana bantu bendi, aba ahatile ha kutatika. Kati kulimuka ebye byatikitiwa biya ambile Eliya mufwako ndi? Eliya walambilile kuli Nyambi ha shilawiza Baishalela ngayi,

³ “Mwene, banapununu bamiluwe bobe na ku shiwula tuula twobe, ami tuhu nashalako ninkayami, kami banakushinga kunziha.”

⁴ Ngoboni Nyambi wamukumbwile nahiti? Wamukumbwile ngayi, “Naliholekele bantu 7,000 baya banabulu ku shintama kumbili ya Mbaalu.”

⁵ Kushili noho na ku shikati shino, kuli bamo babashe aba banashalako baya Nyambi anahata ndaba ya nceshe zendi.

⁶ Unabahata ndaba ya nceshe zendi, kaliha ngayi ndaba yanebye banatende. Shinga nceshe za Nyambi ku bantu zezanga kwezekesha nanebye banatende, pe shinga nceshe zendi kaliha nceshe.

⁷ Nahiti haya? Bantu ba Ishalela kaliha bawanine ebye bashingilenga, ndele tuhu kanzunga kakashe ka bakakuhatiwa, nibo bawanine ebye bashingilenga. Bamina bengile babinkwange.

⁸ Ngonehe kwatikitiwa ngayi, “Nyambi wabapanine moyo wakulembalala na meho a kubula ku mona na matu a kubula kuyuvwa, kukuma na mutena wa lelo.”

⁹ Na Ndavita wambile ngayi, “Mwanga bakwatiwe na kumangiwa ku mayambwayambwa abo, mwanga bapukale ngayi bashushuliwe!

¹⁰ Mwanga meho abo ashipe ngayi babule ku mona, mwanga myongo yabo yinyongame bikati nimwabyo.”

¹¹ Haya nikwipula ngayi kati Bayunda banapukala ngayi bawe hanci, pe babule kupindukamo ndi? Byo, kaliha noho! Ngoboni ndaba batendele wubi, kupuluka kunezi ku Bakamatunga, ngayi mwanga Bayunda bayuvwe lihungu.

¹² Wubi wa Bayunda unalete wuheti mu kaye, kami wuncepwe wabo mu moyo unalete wuheti ku Bakamatunga. Haya ndi Bayunda nimwabo bakayuvwa Nyambi, nka pe kukekala wuheti wawingi shikuma.

Kupuluka kwa Bakamatunga

¹³ Haya nikwamba kukwenu Bakamatunga, ndaba nili ntumwana ku Bakamatunga, kami nikuyemeza mulimo wami.

¹⁴ Nohobene kampe nikayuvwisha lihungu bawushinda wami Bayunda ngayi mwanga niyoyesheko bamo.

¹⁵ Ndaba ndi kukaniwa kwa Bayunda kunaleteshe ngayi bantu ba mu kaye balyambwilile na Nyambi, haya Nyambi akatambula Bayunda, kukamoneka ngo ku shanguka kwa bafu.

¹⁶ Ndi shibunku sha kutatika sha linkende shinatupuliwi kuli Nyambi, pe linkende nimwalyo linayele. Ndi mipishi ya mutondo yinayele, pe mutondo nimwawo unayele.

¹⁷ Enu Bakamatunga, munafweke ngo mwahi wa mutondo wa Olive wa mu lishaka uya unanungiwi ku mutondo wa olive wa mu mfuba uya unatemiwi myahi. Haya munawanako shitapilo sha ngovu za moyo mu wumi wa Bayunda.

¹⁸ Nohobene hinga muhanganika ngayi munapitakana myahi iya yinatemiwi. Anukenu ngayi enu kushumisha mipishi mufwako, ngoboni mipishi niyo yikumishumisha.

¹⁹ Kampe mukwamba ngayi, “Myahi yatemiwile ngayi enu mwanga munungiweko.”

²⁰ Mwa shikuma nohobene. Yatemiwile ndaba ya kubula kukulupila, enu munayakiwiko ndaba ya kukulupila. Hinga muliyemeza, ngoboni yikalenu na bowa.

²¹ Ndaba ndi Nyambi wabulile kutetelela myahi ya shihemwa, keyenu kutina abula kumitetelela nanenu kami.

²² Nohobene monenu shishemo na wukali wa Nyambi. Wenga wamukali ku baya banawu, ngoboni uli na shishemo kukwobe, ndi ukwikalilila mu nceshe zendi. Ndi kutenda noho wufwako na nobe kami ukatemiwa.

²³ Na Bayunda kami, ndi ba kutenguluka, pe hiba kukulupila, bakayakiwa muya bekalilenga, ndaba Nyambi ukutwesha ku banungila kami.

²⁴ Ndaba enu Bakamatunga munafweke ngonehe mwahi wa mutondo wa olive wa mu lishaka uya unanungiwi ku mutondo wa olive ya mu mfuba na shiheka sha kubula kwinga sha shihemwa. Bayunda banafweke ngonehe mutondo wa olive wa mu mfuba, pe shikenga shawangu shikuma kuli Nyambi ngayi akanungile iya myahi ku mutondo kuya yafumine.

Nceshe za Nyambi ha bantu nimwabo

²⁵ Bawushinda wami, kaliha nikushinga ngayi mwikale mu wulube waneye ncimpi, kutina muhanganika ngayi muli ba kukeya. Kukaluha mutima kwa bantu ba Ishalela kaliha kukenga kwa shikati nimwasho, ngoboni kukamana oho likunge lya kwinzala lya Bakamatunga lyakeza kuli Nyambi.

²⁶ Pe Baishalela nimwabo bakapuluka, ngonehe kwatikitiwa ngayi, “Mulamwini ukafuma mu Ziyoni, pe ukafumisha mashewinizi ku bazukulu ba Yakobo.

²⁷ Oku niko kulimama kwami nanibo, oho nikayatila wubi wabo.”

²⁸ Ndaba Baishalela banakana ncango zaziwahe bengakale bamalamo kuli Nyambi ndaba yanenu Bakamatunga. Ngoboni ndaba ya kuhatiwa, banengi ba kuhakiwa ndaba ya batatizabo.

²⁹ Ndaba Nyambi kaliha wafutukanga ndi nehana muntu, kami kaliha wamuyangulanga bitandalisho.

³⁰ Ndaba enu Bakamatunga, ku mwaka kaliha mwengile bakakukulupila Nyambi, ngoboni wuluno munatambulu nceshe, ndaba ya kubula kwombatala kwa Baishalela.

³¹ Nohobene, wuluno nanibo kami banabulu kwombatala, ngayi mwanga batambule nceshe za Nyambi ngonehe mwazitambwile nanenu.

³² Ndaba Nyambi unashinkili bantu nimwabo mu wuntapwa wakubula kwombatala, ngayi abayuvwile nceshe nimwabo.

Kuyemeziwe Nyambi

³³ Wuheti wa Nyambi na ngana zendi na kalimukisho kendi eshi bya nonka! Yani ukutwesha kutontolola bifungo byendi? Yani ukutwesha ku yuvwishisha zinzila zendi?

³⁴ Nehi kwatikitiwa ngayi, “Yani walimuka bihanganiko bya Mwene? Yani ukutwesha kumubela?

³⁵ Kati yani wakoloteshele Nyambi shuma, ngayi Nyambi mwanga amubweshelesho?”

³⁶ Ndaba byuma nimwabyo niye wabilengele, kami byuma nimwabyo byekalako ndaba niye niko ekala, kami byenga byendi. Nyambi ayemeziwe mwaya myaka! Ameni.