Balevi 9 - Libuka Lya Kuyela

Aloni ukutupula zinkombela

¹ Ha mutena wa mutanu na ahatu amanine, kwashileko Moshesha wehanine Aloni na bana bendi na bakakutwaminina ba Ishalela.

² Wambile kuli Aloni ngayi, “Shimba nkunzi wamushe na shikungwe wa mbelele baya bakubula muhendo, kami ubakombelele kuli Nyambi ya Ngula. Uya nkunzi ukwinga ntupu ya ha wubi na uya shikungwe wa mbelele uya ukwinga nkombela ya kuhokesha.

³ Pe utongweze bantu ba Ishalela ngayi, ‘Bashimbe mpongo wa ntupu ya ha wubi na namani wa mwaka umo na mwana mbelele wa mwaka umo, baya bakubula muhendo, baha nkombela ya kuhokesha.

⁴ Kami nkunzi na shikungwe wa mbelele baha nkombela ya kulilumikila. Baku fwanina kubakombelela kuli Nyambi ya Ngula na ntupu ya mpeka ya ku vwela na mazi. Baku fwanina kutenda nehe ndaba Nyambi ya Ngula ukuliholola kukwabo lelo.’ ”

⁵ Pe baletele byuma nimwabyo biya abatongwezele Moshesha kumbili ya Ntanda ya Shikungulukilo, pe shikungulukilo nimwasho shakungulukilileko na kulemesha Nyambi ya Ngula.

⁶ Moshesha wambile kuli Aloni ngayi, “Nyambi ya Ngula namitongweze ngayi mutende ebye nimwabyo pe maleema a wuwahe wendi mwanga aholoke kukwenu.”

⁷ Niho Moshesha kami ambile kuli Aloni ngayi, “Henyena ku kaala ukombelele ntupu ya ha wubi wobe na nkombela yobe ya kuhokesha pe ukakuliza wubi wobe obe mwine na wubi wa bantu. Leta nkombela ya bantu, pe ukaba kulize, ngonehe eshe ambile Nyambi ya Ngula.”

⁸ Niho Aloni ahenyenene ku kaala na kuziha nkunzi wamushe ou wengile wa ntupu ya ha wubi wendi niye mwine.

⁹ Bana bendi bamuletelele mukeza, pe washonkelemo munwe wendi, pe walambileho mukeza umo ku ncengo za kaala, pe wayitilile mukeza uya washalileho ku nceto ya kaala.

¹⁰ Niho ahokeshele mazi ha kaala na mashiye na bihaha bya mazi aku litima ngonehe Nyambi ya Ngula atongwezele Moshesha,

¹¹ ngoboni wahokeshele nyama na shitembe ha munkanda wa munkungwa.

¹² Pe wazihile shimuna uya wengile wa ntupu ya ha wubi wendi niyemwine. Bana bendi bamuletelele mukeza, pe wa wu myanzilile ha zimbalila za kaala nimwazo zinaa.

¹³ Bamupanikile mutwe na bimamo byamina bya shimuna, pe wabihokeshelele ha kaala.

¹⁴ Niho ayoweshele bya mukati na bilama kami, wabihokeshelele ha kaala hayilu ya nkombela ya kuhokesha.

¹⁵ Oho amanishile, watwalile zinkombela za bantu. Washimbile mpongo uya wengile wa nkombela yaha kuyelesha bantu, pe wa muzihile naku mukombelela, ngonehe shiya atendele ha ntupu ya ha wubi wendi niyemwine.

¹⁶ Waletele kami shimuna wa nkombela ya kuhokesha pe kami wamukombelelele ngonehe bamufundizizile.

¹⁷ Watwalile kami ntupu ya mpeka na kushimba muhunga wa liboko lya kwinzala na kuwu hokeshela ha kaala. Eshe shengile kufungila hamo na nkombela yakuhokesha yaha mutena ha mutena.

¹⁸ Wazihile nkunzi na shikungwe wa mbelele kwinga nkombela ya bantu ya kulilumikila. Bana bendi bamuletelele mukeza, wawumyanzilile ha zimbalila za kaala nimwazo zinaa.

¹⁹ Pe Aloni walongele mazi a nkunzi na a shikungwe wa mbelele na mushila wa mazi na mazi akufwika bya mukati na mashiye na bihaha bya mazi aku litima,

²⁰ hayilu ya tupumpo twa bimuna, pe wabitwalile nimwabyo ku kaala. Wahokeshele mazi ha kaala,

²¹ ngoboni tupumpo na bilama bya shilyo wabiyengayengeshele kwinga nkombela yakuyengayengesha kuli Nyambi ya Ngula, kwinga ya bakankombela ngonehe abatongwezele Moshesha.

²² Oho Aloni amanishile zinkombela nimwazo pe wakatwilile maboko wendi ha bantu pe wabafuywelele, niho afumineko.

²³ Moshesha na Aloni benginine mu Ntanda ya shikungulukilo, pe oho batutikile bafuywelele bantu, kami wuwahe wa Nyambi ya Ngula waholokele ku bantu nimwabo.

²⁴ Babazumukile tuhu Nyambi ya Ngula wa tumakale mundilo, wahokeshele nkombela nimwayo na bimamo bya mazi ha kaala. Oho bantu babimonene, nimwabo batangalile pe bashinkamine hanci na kulamba.