Balevi 8 - Libuka Lya Kuyela

Kwimikiwa kwa bakankombela

¹ Nyambi ya Ngula wambile kuli Moshesha ngayi,

² “Twala Aloni na bana bendi ku menginino a Ntanda ya Shikungulukilo pe ulete bivwalo bya mukankombela na mazi akuwaba na nkunzi wamushe wa ntupu ya ha wubi na bikungwe babili ba bambelele na ntumba ya mankende a kubula mumena.

³ Niho wihaneko likunge nimwalyo ku menginino a Ntanda ya Shikungulukilo.”

⁴ Pe Moshesha watendele nehe amutongwezele Nyambi ya Ngula, oho likunge lya bantu lya kungulukile ku Ntanda,

⁵ wambile kukwabo ngayi, “Eshe nikushinga kutenda haya shinengi eshe anamba Nyambi ya Ngula.”

⁶ Pe Moshesha waletele Aloni na bana bendi kwiza mu kubayowesha na mema.

⁷ Wavwalikile Aloni shikobelo na lyambangubo na kaponda mulukanda lwendi. Niho amuvwalikile kakobelo ka shizila, pe wakamangile na mukunzi wawuwahe waku shinta.

⁸ Niho amuvwalikile kambandingwa kaha kapumpo na kuyakamo Ulimi na Tumimi.

⁹ Pe wayakile kahoshi ka likwiza lya kuzenga ku mutwe wendi, kumbili wayakileko lipapi lya kance lya ngolinde, lya ku monesha ngayi Aloni unafungiliwili kuli Nyambi ya Ngula, ngonehe Nyambi ya Ngula atongwezele Moshesha.

¹⁰ Niho Moshesha ashimbile mazi akuwaba, wawabishile ha Ntanda ya Shikungulukilo na byuma nimwabyo biya byekalilemo, pe mu ntendelo eye wafungwilile nibyo kuli Nyambi ya Ngula.

¹¹ Washimbileho mazi amo pe wawamyanzilile ha kaala bikati mutanu na bibili na byuma bya ku kaala nimwabyo, hamo na lizawo na kapona kalyo, ngayi mwanga bifunguliwile kuli Nyambi ya Ngula.

¹² Niho afungwilile Aloni ha kumuyitila mazi akuwaba ha mutwe wendi.

¹³ Niho kami Moshesha aletele bana ba Aloni kumbili na kubavwalika bikobelo nakubamanga tuponda mu zinkanda zabo na kubazenga tuhoshi ku mitwe yabo, ngonehe eshe amutongwezele Nyambi ya Ngula.

¹⁴ Niho Moshesha aletele nkunzi wa ntupu ya ha wubi, pe Aloni na bana bendi bakambikile maboko wabo ha mutwe wa uya nkunzi.

¹⁵ Moshesha wamuzihile na kushimbako mukeza umo na munwe wendi, wawulambile ku ncengo za kaala, ngayi mwanga abayeleshe. Niho ayitilile mukeza ou washalileho ku nceto ya kaala. Mu ntendelo eye wakafungwile na kukakuliza.

¹⁶ Moshesha washimbile mazi nimwawo akufwika bya mukati na mahaha bya mazi aku litima na mashiye abili hamo na mazi wawo na kubihokeshela ha kaala.

¹⁷ Washimbile ebye byashalile ku nkunzi na shitembe shendi na mila na wutoko na kubihokeshela ha munkanda wa munkungwa, ngonehe eshe amutongwezele Nyambi ya Ngula.

¹⁸ Niho kami Moshesha aletele shikungwe wa mbelele wa nkombela ya kuhokesha, pe Aloni na bana bendi bakambikile maboko wabo ha mutwe wa shikungwe.

¹⁹ Moshesha wamuzihile pe wayitilile mukeza ha zimbalila nimwazo zinaa za kaala.

²⁰ Oho amanishile kuketozola shikungwe wa mbelele bituntula, Moshesha wahokeshele mutwe na bituntula na mazi.

²¹ Pe oho bya mukati na bilama byayoweshiwile na mema, Moshesha wahokeshele shikungwe wa mbelele wa nzimba ha kaala, kwinga nkombela ya kuhokesha ya byakulya kuli Nyambi ya Ngula. Pe livumba lya nkombela eye likuwahilisha ku mutima, nkombela ya kukombelela na mundilo kuli Nyambi ya Ngula, ngonehe amutongwezele Nyambi ya Ngula.

²² Niho Moshesha aletele shikungwe wa mbelele wakufungwila, ou wengile shikungwe watendishiwile ha kubawabisha, kami Aloni na bana bendi bakambikile maboko wabo ha mutwe wa shikungwe.

²³ Moshesha wamuzihile pe washimbileho mukeza umo na kuwulamba kunkumo ya litu lya Aloni lya shilyo naha munwe wa shala waku liboko lyendi lya shilyo naha linyenca lyendi lyalinene lya ku liwulu lyendi lya shilyo.

²⁴ Niho aletele bana ba Aloni kumbili, pe wayakile mukeza umo ku zinkumo za matu wabo a shilyo naha minwe yabo na byaala bya ku maboko wabo a shilyo naha manyenca aku mawulu wabo a shilyo. Niho Moshesha ayitilile wingi wa mukeza ha zimbalila za kaala nimwazo zinaa.

²⁵ Washimbile mazi a shikungwe wa mbelele na mushila na mazi wawo na mazi nimwawo akufwika bya mukati na bihaha bya mazi aku litima na mashiye abili na mazi wawo na shilama sha shilyo.

²⁶ Niho ashimbile mupumpa umo wa mankende amu ntanda a kubula mumena afunguliwile kuli Nyambi ya Ngula na mupumpa umo wa kuvuba na mazi na linkende limo lyalihehu, pe wabiyakile hayilu ya mazi na shilama sha ku shilyo.

²⁷ Wayakile ebye byakulya nimwabyo mu maboko a Aloni na bana bendi, pe babiyengayengeshele kwinga nkombela ya kuyengayengesha kuli Nyambi ya Ngula.

²⁸ Niho Moshesha afumishile byakulya ku maboko wabo na kubihokeshela ha kaala hayilu ya nkombela ya kuhokesha, kwinga nkombela ya ha kuwabisha. Eye yengile nkombela yakuhokesha ya byakulya kuli Nyambi ya Ngula. Livumba lya nkombela eye likuwahililisha Nyambi ya Ngula. Nkombela ya kukombelela ha mundilo kuli Nyambi ya Ngula.

²⁹ Niho Moshesha ashimbile kapumpo pe wakayengayengeshele kwinga nkombela yaku yengayengesha kuli Nyambi ya Ngula. Nisho shengile shitapilo sha Moshesha sha shikungwe wa mbelele kubafungwila kuli Nyambi ya Ngula. Moshesha watendele byuma nimwabyo ngonehe amutongwezele Nyambi ya Ngula.

³⁰ Moshesha washimbile mazi amo akuwaba na mukeza umo uya wekalile ha kaala, wawumyanzilile hali Aloni naha bivwalo byendi naha bana bendi naha bivwalo byabo. Mu ntendelo eye wafungwilile Aloni na bivwalo byendi na bana bendi na bivwalo byabo kuli Nyambi ya Ngula.

³¹ Niho Moshesha atongwezele Aloni na bana bendi ngayi, “Twalenu nyama ku menginino a Ntanda ya Shikungulukilo, mukayiteleke, pe mukayilileko na mankende aya ali mu ntumba ya nkombela ya ha kuwabisha, ngonehe alayelele Nyambi ya Ngula.

³² Mukahokesha nyama na mankende aya anashalaho.

³³ Enu kukafuma ku menginino a Ntanda ya Shikungulukilo matena mutanu na abili mufwako hantu matena akumikundika anamana.

³⁴ Nyambi ya Ngula wantongwezele kutenda ebye ngonehe eshe twatendakale lelo, ngayi mwanga nikamikulize mu kufumisha wubi wenu.

³⁵ Munafwanini kwikala ku menginino a Ntanda ya shikungulukilo mwaana na wushiku matena mutanu na abili. Ngayi mukatendenga ebye Nyambi ya Ngula anamba mwanga mukabule kufwa. Ebye nibyo Nyambi ya Ngula antongwezele.”

³⁶ Nohobene Aloni na bana bendi batendele byuma nimwabyo biya alayelele Nyambi ya Ngula kuli Moshesha.