Balevi 7 - Libuka Lya Kuyela

Zinkombela zaha kukuliza

¹ “Eze nizo ndayano zaha zintupu zaha kukuliza, eze nizo zinengi za kuyela shikuma.

² Shimuna waha nkombela eye ukazihiwila hambalila ya ku ncelele ya kaala, oku bazihilanga babimuna ba zinkombela za kuhokesha, kami mukeza ukamyanziliwila ku zimbalila nimwazo zinaa za kaala.

³ Mazi wendi nimwawo akafumishiwa na kukombeleliwa ha kaala, mushila na mazi wawo na mazi akufwika bya mukati

⁴ na mashiye abili na mazi wawo na bihaha bya mazi bya ku litima.

⁵ Mukankombela ukahokeshela mazi nimwawo ha kaala kwinga nkombela ya byakulya ya kuhokesha na mundilo kuli Nyambi ya Ngula. Niyo yinengi ntupu ya kukuliza.

⁶ Balume nimwabo ba ku mapashi a bakankombela ba ku fwanina kuyilya, ngoboni yiku fwanina kuliwila mu mwanya wa kuyela ndaba yinengi ya kuyela shikuma.

⁷ “Kuli lundayano lumo luya lukukundama nimwako ku ntupu yaha wubi na ntupu yaha kukuliza, nyama yikenga ya mukankombela ou ukatupula ntupu ya ku lyambwililisha ha wubi.

⁸ Mwayi wa shimuna wakukombelela kwinga nkombela ya kuhokesha ukenga wa mukankombela ou ukukombelela nkombela.

⁹ Ntupu nimwayo yiya yikayohiwa ha shivulu hinge kuyohiwa ha shinzoyo hinge ha luhalo yikenga ya mukankombela ou ukayitupula kuli Nyambi ya Ngula.

¹⁰ Ngoboni zintupu nimwazo hinge ndi za ku vwela na mazi, hinge za kuyuma nimwazo zikenga za bakankombela bana ba Aloni, ziku fwanina kutapiwa hakati kabo ngayi bakakone.”

Zinkombela za kulilumikila

¹¹ “Eze nizo ndayano zaha zinkombela za kulilumikila zikaletiwa kuli Nyambi ya Ngula.

¹² Ndi muntu ukakombelela eye nkombela ya kukambilila kuli Nyambi, ukaleta shimuna hamo na ntupu ya mankende a kubula mumena na mipumpa yayiliti ya kuvuba na muhunga waku vwela na mazi a olive, hamo na mankende amahehu akuyoha.

¹³ Mukukambika, ku ntupu yendi ya kulilumikila ukatupula mipumpa ya mankende akuyoha a mumena.

¹⁴ Ukaleta shitapilo shimo sha mushobo na mushobo wa mankende kwinga mukungwila wa shishemo shashinene kuli Nyambi ya Ngula, shikenga sha mukankombela ou ukashimba mukeza wa shimuna na kumyanzila ku kaala.

¹⁵ Nyama ya shimuna yiku fwanina kuliwa ha mutena ha mutena uya bakayikombelela, kowa nyama yikashalaho kukuma ku lumenemene.

¹⁶ “Ndi muntu ukaleta nkombela ya kulilumikila ya kuhahulula luhaho, hinge ndi kwinga ntupu ya shifungo shendi niyemwine, yikaliwa ha mutena uya bakayikombelela ngoboni ndi yimo yikashalaho yikafwanina kuliwa ha mutena uya ukalundamina.

¹⁷ Nyama nimwayo yiya yikashalaho ya nkombela kukuma ku mutena wawuhatu yikafwanina kuhokeshiwa.

¹⁸ Ndi yimo yikaliwa ha mutena wawuhatu, Nyambi kukatambula oyo nkombela ya nowo muntu ufwako. Nkombela kuka labiwa ku mikuli yendi yifwako ngoboni yikahanganikiwila kwinga yayibi, kami nimwendi ukalyako ukalileyekamo niyemwine.

¹⁹ “Nyama nimwayo ya kukombelela yikakuntula ku shuma shinge shiti hinge shiti sha kubula kuyela, kaliha yikafwanina kuliwa ngoboni yikahokeshiwe. Muntu nimwendi wa kuyela akalye tuhu ku nyama ya nkombela,

²⁰ ngoboni muntu nimwendi mukakutenda bya kubula kuyela ukalyayo, kukahanganikiwila kwinga umo wa bantu ba Nyambi ufwako.

²¹ Kami ndi muntu nimwendi ukalya nyama ya nkombela eye oho wakwatakale shuma sha kubula kuyela, shinge sha ku muntu hinge sha ku kayamana, kami ukafumishiwa ha bawushinda wendi.”

²² Nyambi ya Ngula wambile kuli Moshesha ngayi,

²³ “Tongweza ba Ishalela ngayi, hinga mulya mazi nimwawo a zingombe, hinge a bambelele hinge a bampongo.

²⁴ Mazi a shimuna uya wakulifwila hinge wakuzihiwa ku kanzama, ku fwanina kuliwa afwako, ngoboni uku fwanina kutendeshiwa mu nzila yashenge.

²⁵ Muntu nimwendi ukalya mazi a shimuna uya ukapanikiwa kwinga ntupu ya byakulya ya kuhokesha ha mundilo kuli Nyambi ya Ngula, ukafumishiwa ha bantu bendi.

²⁶ Pe nimwako oku ali muntu, kaliha wafwanina kulya mukeza wa kayamana hinge wa kayoni.

²⁷ Muntu nimwendi ukalya mukeza, muntu wa noho ukafumishiwa ku bawushinda wendi.”

²⁸ Nyambi ya Ngula wambile kuli Moshesha ngayi,

²⁹ “Amba ku bantu ba Ishalela, muntu nimwendi ou ukapana ntupu ya kulilumikila uku fwanina kuleta shitapilo shayo kwinga nkombela ya shishemo shashinene kuli Nyambi ya Ngula.

³⁰ Ukayileta na maboko wendi niye mwine kwinga nkombela ya byakulya ya kuhokesha na mundilo kuli Nyambi ya Ngula. Ukaleta mazi a shimuna hamo na kapumpo kendi, kami ukayengayengesha kapumpo kwinga nkombela ya kuyengayengesha kuli Nyambi ya Ngula.

³¹ Mukankombela ukahokeshela mazi ha kaala ngoboni kapumpo kakenga ka bakankombela Aloni na bana bendi.

³² Shilama sha shilyo shikapanikiwa kuli mukankombela kwinga nkombela ya ha kulilumikila.

³³ Umo waku bana ba Aloni ou ukupana nkombela ya mukeza wakulilumikila na mazi ukekala na shitapilo sha shilama.

³⁴ Kapumpo ka shimuna kaya kakayengayengeshiwa kakenga shishemo, shashinene hamo na shilama sha shilyo, bikenga shishemo shiya anashimbi Nyambi ya Ngula ku bantu ba Ishalela na kupanika ku bana ba Aloni. Eshe nisho bantu ba ishalela bakafwanina kutendanga ku bakankombela bikati nimwabyo bikeza kumbili.

³⁵ “Eshe shinengi shitapilo sha Aloni na bana bendi, aba banahatiwi kwinga bakankombela kuntendela milimo.

³⁶ Nyambi ya Ngula niye walayelele ba ishalela ngayi bapanikenga ebye kuli bakankombela, ha mutena uyo ba wabishiwile. Ndayano eze kukafutuka zifwako, bakafwanina kuzombatala ku mikoka nimwayo.”

³⁷ “Eze nizo ndayano zaha zinkombela za kuhokesha na zintupu za mpeka na zinkombela zaha kuliyelesha na zinkombela za kufungwilisha bakankombela na zinkombela za kukuliza.

³⁸ Nyambi ya Ngula wambile kuli Moshesha mu libelelengwa kuyo ku lipili lya Shinayi ha mutena owo atongwezele bantu ba Ishalela kuleta zintupu zabo kuli Nyambi ya Ngula.”