Balevi 5 - Libuka Lya Kuyela

Milandu yikushingiwila zintupu zaha wubi

¹ “Ndi muntu unehaniwi ku nkuta mu kutontolola byambo, ngoboni abulu kutontolola ebye amona hinge ebye ayuvwa pe unabipishi ukalileyekamo niyemwine.

² “Ndi muntu umo ukukwata shuma shimo sha shizila na mapuza, ngonehe kayamana wakufwa, hinge shimuna wakufwa, hinge bya kulikoka hanci, pe nabipi uli na mulandu oho walimukakale ebye anatende.

³ “Ndi muntu umo ukukwata shuma shimo sha kubula kuyela sha ku muntu na mapuza uli na mulandu oho walimukakale ebye anatende.

⁴ “Ndi muntu umo ukunyankupisha kulihaha na lyezela na kanwa kendi ngayi ukatenda byabiwahe hinge byabibi pe uli na mulandu oho walimukakale ebye anatende.

⁵ “Oho muntu akuwana mulandu, ndi una bipishi shuma shimo hakati ka byuma ebye, uku fwanina kulitabila wubi wendi.

⁶ Kami ngonehe kubweshela kwa ha wubi wendi, ukuleta kuli Nyambi ya Ngula nkombela ya mbelele wa shitole hinge mpongo kwinga ntupu ya ha wubi. Mukankombela ukakombelela nkombela ya kufumisha wubi wendi.

⁷ “Ndi muntu kutwesha kuwana mbelele hinge mpongo ufwako na fwanini kuleta matela abili hinge bankilimba babili kuli Nyambi ya Ngula kwinga bya kuyumba ha wubi wendi, umo waha ntupu ya ha wubi, pe wamina wa nkombela ya kuhokesha.

⁸ Ukabileta kuli mukankombela pe niye ukakombelela kayoni ka ntupu ya ha wubi. Ukakondolola mukoshi wako na kubula ku zumuna mutwe wako,

⁹ na ku myanzila mukeza umo ku mbalila nimwayo ya kaala kwinga ntupu ya ha wubi, pe mukeza ukashalaho ukawuyitila ku nceto ya kaala kwinga ntupu ya ha wubi.

¹⁰ Niho ukatupula kayoni ka wubili kwinga nkombela ya kuhokesha, kuya na kufundiziza. Mu ntendelo eye mukankombela ukatupula nkombela ya ku mu kuliza uya muntu pe ukayatiliwa.

¹¹ “Ndi muntu kutwesha ufwako matela abili hinge bankilimba, ukatupula kilo imo ya muhunga wakulembuka kwinga ntupu ya ha wubi. Kaliha wafwanina kuyitilaho mazi a olive hinge kuyakaho incence hahayo, ndaba yinengi ntupu ya ha wubi, kaliha ntupu ya mpeka.

¹² Pe ukayileta kuli mukankombela, niho mukankombela ukaleta muhunga wakwinzala liboko kwinga ntupu ya shanukisho kuli Nyambi ya Ngula. Niho ukayihokesha ha kaala kwinga ntupu ya byakulya. Yikenga ntupu ya ha kuliyelesha wubi.

¹³ Mu ntendelo eye mukankombela ukatupula zinkombela za kukuliza ha wubi nimwawo atendele, pe ukayatiliwa. Muhunga nimwawo ukushalaho ukenga wa mukankombela. Ngonehe shatendiwanga ha ntupu ya ha mpeka.”

Zintupu za ha kuhingishila

¹⁴ Nyambi ya Ngula wambile kuli Moshesha ngayi,

¹⁵ “Ndi muntu ukatenda wubi na mapuza na kukwanga kuyumba bya ku fwanina kuli Nyambi ya Ngula, ukafwanina kuleta shikungwe wa mbelele hinge mpongo wakubula muhendo kwinga ntupu yaha mulandu. Ndando ya uya kayamana yikezekiwa na ndando ya kayamana ukashingiwa ku Shikungulukilo sha Kuliwanina.

¹⁶ Nafwanini kuyumba mulandu anakwanga kuyakaho nkambiko ya shitika sha makumi abili. Niho mukankombela ou ukatupula uya kayamana kwinga wakukuliza ha wubi wa uya muntu, pe ukayatiwila wubi wendi.

¹⁷ “Ndi muntu nimwendi ukabipisha na mapuza wakukiluka mazu a Nyambi ya Ngula, ukawana mulandu pe ukalileyekamo niye mwine.

¹⁸ Uku fwanina kuleta kuli mukankombela shikungwe wa mbelele hinge wa mpongo wakubula muhendo kwinga ntupu ya kukuliza. Ndando yendi yiku fwanina kukuma ha ndando ya toyiwa ha kulanda. Mukankombela ukakombelela nkombela ya kulyambwililisha ha mulandu wa muntu, pe ukayatiwila wubi wendi.

¹⁹ Yinengi ntupu ya kukuliza ha mulandu ou atendele kuli Nyambi ya Ngula.