Balevi 4 - Libuka Lya Kuyela

Zintupu za ha wubi wa mapuza

¹ Nyambi ya Ngula wambile kuli Moshesha ngayi,

² “Tongweza Baishalela ngayi, muntu nimwendi uku bipisha na kukiluka mazu a Nyambi ya Ngula na mapuza, uku fwanina kulama kufundiziza oku.

³ “Ndi Mukulwane wa bakankombela nimwabo wakuwabishiwa aku bipisha, ukuleta mulandu ha bantu nimwabo. Nafwanini kuleta nkunzi wamushe wakubula muhendo na ku mu kombelela kuli Nyambi ya Ngula kwinga ntupu ya ha wubi.

⁴ Ukaleta nkunzi ku menginino a Ntanda ya Shikungulukilo na kukambika liboko lyendi ha mutwe wa nkunzi na kumuzihila kuyo ku meho a Nyambi ya Ngula.

⁵ Niho Mukulwane wa bakankombela nimwabo ukashimba mukeza umo wa nkunzi na ku wu twala mu Ntanda ya Shikungulukilo.

⁶ Pe mukankombela ukashonka munwe wendi mu mukeza na ku wu myanzila kumbili ya shibaamba sha kuyela bikati mutanu na bibili.

⁷ Mukankombela ukalamba mukeza wamina ku ncengo za kaala ka incence ku meho a Nyambi ya Ngula, mu Ntanda ya Shikungulukilo. Wingi wa mukeza wa nkunzi nimwawo ukawuyitila ku nceto ya kaala kaya kali ku menginino a Ntanda ya Shikungulukilo oku bahokeshelanga zinkombela.

⁸ Niho mukankombela ukashimbako nkunzi na nkunzi wa ntupu ya ha wubi mazi nimwawo, mazi aya afwikanga bya mukati,

⁹ na mashiye abili na mazi awo na mbalila yayiwahe yaku litima.

¹⁰ Mukankombela ukashimba awa mazi nimwawo naku wahokeshela ha kaala ka kutendesha zinkombela za kuhokesha, ngonehe atendele ku mazi aku nkunzi ou wazihiwile ha nkombela ya kulilumikila.

¹¹ “Ngoboni ukashimba mwayi wa nkunzi na nyama yendi nimwayo na mutwe wendi na mawulu wendi na bya mukati kendi, hamo na wutoko wendi,

¹² pe ukabitutwishila ha munkanda wa munkungwa, ku mwanya wa kuyela na kubiyitila kulilala oku bayitilanga mutoko, pe niko aka hokeshelabyo ha bishinzi bya mundilo.

¹³ “Ndi shikwinga shikungulukilo nimwasho sha baishalela shiya shina bipishi pe shinawana mulandu wakukiluka mazu amo ha mazu a Nyambi ya Ngula na mapuza,

¹⁴ Oho ndi wubi walimukiwakale, shikungulukilo shikaleta nkunzi wamushe kwinga ntupu ya ha wubi. Bakamuleta ku Ntanda ya Shikungulukilo.

¹⁵ Pe bakakutwaminina shikungulukilo bakakambika maboko wabo ha mutwe wendi, pe bakamuzihilako.

¹⁶ Niho mukulwane wa bakankombela nimwabo ukashimba mukeza wendi na kuwu twala mu Ntanda ya Shikungulukilo.

¹⁷ Pe mukankombela ukashonka munwe wendi na kumyanzila kumbili ya shibaamba bikati mutanu na bibili ku meho a Nyambi ya Ngula.

¹⁸ Ukalamba mukeza umo ha ncengo za kaala aka kali mukati ka Ntanda ya Shikungulukilo, pe mukeza ukashalaho ukawuyitila ku nceto ya kaala ka kutendesha zinkombela za kuhokesha, eshe shili ku menginino a shikungulukilo.

¹⁹ Niho ukashimba mazi wendi nimwawo na kuwahokeshela ha kaala.

²⁰ Ukatenda shuma shimo ha nkunzi owe ngonehe atenda na nkunzi wa ntupu ya ha wubi, pe mu nzila eye mukankombela ukatenda nkombela ya kukuliza ha wubi wa bantu pe bakayatiwila wubi wabo.

²¹ Pe ukatutwisha nkunzi ha munkanda wa munkungwa na kumuhokesha, ngonehe akuhokesha ntupu ya ha wubi wendi niyemwine. Eye yinengi nkombela ya kufumisha wubi ha shikungulukilo.

²² “Ndi unengi mukakutwaminina ou unabipishi na kuwana mulandu wakukiluka mazu amo a Nyambi ya Ngula na mapuza,

²³ niho ndi wubi wayuvwanikakale, pe ukaleta shikungwe wa mpongo wakubula muhendo kwinga ntupu.

²⁴ Ukakambika liboko lyendi ha mutwe wa nkunzi wa mpongo na kumuzihila kumbalila ya ku ncelele ya kaala, oku bazihilanga bimuna ba zinkombela za kuhokesha kuli Nyambi ya Ngula. Eye yikwinga ntupu ya ha wubi.

²⁵ Niho mukankombela ukazubika munwe wendi mu mukeza wa shimuna sha ntupu ya ha wubi na ku wu lamba ha ncengo za kaala na ku yitila mukeza ku nceto ya kaala.

²⁶ Pe ukahokeshela mazi nimwawo ha kaala, kwinga ngonehe shiya ahokeshanga mazi a bimuna ba kuzihiwila ha zinkombela za kukuliza. Muntendelo eye mukankombela ukakombelela nkombela ya kwambwililisha ha wubi wa mukakutwaminina pe ukayatiwila ku wubi wendi.

²⁷ “Ndi ukwinga muntu wowa ou unabipishi na kuwana mulandu wakukiluka mazu a Nyambi ya Ngula na mapuza,

²⁸ niho ndi wubi wayuvwanikakale, ukaleta ntupu yendi ya mpongo wa shitole wakubula muhendo.

²⁹ Ukakambika liboko lyendi ha mutwe wa shimuna wa ntupu ya ha wubi na kumuzihila ku mbalila ya ku ncelele ya kaala oku bazihilanga babimuna ba zinkombela za kuhokesha.

³⁰ Pe mukankombela ukazubika munwe wendi mu mukeza wa shimuna na kuwu lamba ku ncengo za kaala, mukeza ukashalaho ukawuyitila ku nceto ya kaala.

³¹ Pe ukafumisha mazi wendi nimwawo, ngonehe shiya bafumishanga mazi a bimuna bazihilanga ha zinkombela za kulilumikila, pe ukawahokeshela ha kaala ngayi livumba mwanga liwahililishe Nyambi ya Ngula. Mu ntendelo eye mukankombela ukakombelela nkombela ya kukuliza ha wubi wa uya muntu pe ukayatiwila.

³² “Ndi muntu ukuleta mbelele kwinga ntupu ya ha wubi, uku fwanina kwinga wa shitole wakubula muhendo.

³³ Ukakambika liboko lyendi ha mutwe wa mbelele wa ntupu ya ha wubi na kumuzihila ku mbalila yaku ncelele ya kaala, oku bazihilanga bimuna ba zinkombela za kuhokesha.

³⁴ Mukankombela ukazubika munwe wendi mu mukeza wa shimuna sha ntupu ya ha wubi na kuwulamba ku ncengo za kaala, pe mukeza ukashalaho ukawuyitila ku nceto ya kaala.

³⁵ Pe mukankombela ukafumisha mazi wendi nimwawo ngonehe shatendiwanga ha kufumisha mazi a mbelele uya wazihiwile ha nkombela ya kulilumikila. Pe niye ukawahokeshela ha kaala hayilu ya zinkombela za byakulya za kuhokesha, zikupanikiwa kuli Nyambi ya Ngula. Mu ntendelo eye mukankombela ukakombelela nkombela ya kukuliza ha wubi wa uya muntu pe ukayatiliwa wubi wendi.”