Balevi 3 - Libuka Lya Kuyela

Zinkombela za kulilumikila

¹ “Oho muntu ukukombelela umo ha zingombe zendi kwinga nkombela ya kulilumikila kuli Nyambi ya Ngula, yiku fwanina kwinga ya nkunzi hinge ya shitole wafwanina kutupula wakubula muhendo.

² Ou muntu ukakambika liboko lyendi ha mutwe wa shimuna na kumuzihila ku menginino a Ntanda ya Shikungulukilo. Niho bakankombela bana ba Aloni, bakayitila mukeza ha zimbalila za kaala nimwazo zinaa.

³ Pe bakaleta bimamo ebye nimwabyo bya shimuna kwinga nkombela ya byakulya ya kuhokesha kuli Nyambi ya Ngula, mazi nimwawo a bya mukati,

⁴ na mashiye abili na mazi awo na mbalila yayiwahe ya ku litima.

⁵ Pe bakankombela bana ba Aloni bakahokesha ebye nimwabyo ha kaala hamo na zinkombela za kuhokesha ziya zili hayilu ya nkuni ha mundilo. Niyo yinengi nkombela ya kuhokesha, pe livumba lya neye nkombela ya byakulya bya kuwahililisha Nyambi ya Ngula.

⁶ “Ndi muntu ukutupula kwinga nkombela ya kulilumikila kuli Nyambi ya Ngula, hamina nkombela wa shikungwe hinge wa shitole, ngoboni uku fwanina kwinga wakubula muhendo.

⁷ Ndi ukukombelela mbelele kwinga ntupu, ukamulete ku meho a Nyambi ya Ngula.

⁸ Pe ukakambika liboko lyendi ha mutwe wa mbelele na kumuzihila kumbili ya Ntanda ya Shikungulukilo. Bakankombela bakayitila mukeza wendi kuzimbalila nimwazo za kaala zinaa.

⁹ Niho mukankombela uku fwanina kuleta nkombela ya kulilumikila kwinga nkombela ya kuhokesha kuli Nyambi ya Ngula. Uku fwanina kukombelela mazi na mushila wa mazi nimwawo waku ketwila kwakwipi na mongo na mazi nimwawo akufwika bya mukati nimwabyo,

¹⁰ na mashiye abili hamo na mazi awo na mbalila yayiwahe yaku litima. Ebye bikafumishiwa,

¹¹ pe mukankombela ukabihokesha ha kaala. Yikenga nkombela yayiwahe ya kuhokesha kuli Nyambi ya Ngula.

¹² “Ndi muntu ukukombelela mpongo kwinga ntupu, amulete kuli Nyambi ya Ngula,

¹³ ukambike maboko ha mutwe wa mpongo na kumuzihila kumbili ku menginino a Ntanda ya Shikungulukilo. Niho bakankombela bana ba Aloni bakayitila mukeza kuzingwilisha kaala.

¹⁴ Mukankombela uku fwanina kuleta bimamo ebye bya shimuna kwinga ntupu ya byakulya ya kuhokesha kuli Nyambi ya Ngula, mazi nimwawo a bya mukati,

¹⁵ na mashiye abili na mazi awo na mbalila yayiwahe yaku litima.

¹⁶ Pe mukankombela ukabihokeshela ebye nimwabyo ha kaala kwinga nkombela ya byakulya ya kuhokesha, livumba lyaliwahe likawahililisha Nyambi ya Ngula. Mazi nimwawo akenga a Nyambi ya Ngula.

¹⁷ Kaishalela kaliha wafwanina kulya mazi hinge mukeza, awa anengi mazu a kulamiwa mwaya myaka ku bihemunwino bya Baishalela nimwabyo, oku nimwako bakekala.”