Balevi 27 - Libuka Lya Kuyela

Ndayano ha bya zintupu kuli Nyambi ya Ngula

¹ Nyambi ya Ngula wambile kuli Moshesha ngayi,

² “Tongweza bantu ba Ishalela ngayi, oho muntu unapanikiwi kuli Nyambi ya Ngula ha kuhahulula luhaho, uya muntu ukatwesha kulubuka ha kuyumba ndando ya mali amo,

³ mukulwane wa mulume wa myaka 20 kukuma ku myaka 60 ukayumba muwayawaya wa shiliva wakukuma ha 50 ngonehe ndando yalandiwanga yaku ntanda ya shizila.

⁴ Ndi mbuyama ukayumba muwayawaya wa shiliva 30.

⁵ Ndi nengi kanuke wa mulume wa myaka mutanu kukuma naku myaka makumi abili ukayumba mali a muwayawaya wa shiliva makumi abili, pe kami ndi nengi kanuke wa mbuyama ukayumba ndando ya mali likumi a muwayawaya wa shiliva.

⁶ Ndi kanuke wa mulume wa ngonda yimo kukuma ku myaka mutanu ukayumba mali mutanu a muwayawaya wa shiliva, pe kami kanuke wa mbuyama wa ngonda yimo kukuma ku myaka mutanu ukayumba mali ahatu a muwayawaya wa shiliva.

⁷ Ndi mulume uli na myaka ya kupitakana 60 ukayumba ndando ya mali a muwayawaya likumi na mutanu wa shiliva. Kami ndi mbuyama uli na myaka ya kupitakana 60 ukayumba mali likumi a muwayawaya wa shiliva.

⁸ “Ndi mulume ou wakulupishile nengi ncepwe shikuma ha kuyumba ndando eye balandanga, ukaleta ou muntu kuli mukankombela, pe mukankombela ukabwesha ndando munyima kukumisha ku ngovu omu akutweshela kuyumba uya mulume.

⁹ “Ndi luhaho lukwinga lwa shimuna uya ukutambuliwa kwinga nkombela kuli Nyambi ya Ngula, niho zintupu nimwazo zikutwaliwa kuli Nyambi ya Ngula zinengi za kuzila.

¹⁰ Pe mulume ou ukahaha, kaliha wafwanina kuhingishamo shimuna wamina mu nou. Ndi ukatenda noho babimuna wubili wabo bakenga ba Nyambi ya Ngula.

¹¹ Ngoboni ndi luhaho lukwinga lwa shimuna wakubula kuyela, wakubula kutambuliwa kwinga ntupu kuli Nyambi ya Ngula, pe muntu ukatwala shimuna kuli mukankombela.

¹² Pe mukankombela ukatoya ndando yayo ku wuwahe wa shimuna hinge ku kubipa kwendi, pe ndando yikenga ya mamaninino.

¹³ Ndi muntu ukushinga kukuliza shimuna wendi, uku fwanina kuyumba, ndando iya atoyele mukankombela na kuyakaho nkambiko ya kukuma ku makumi abili ha mwanda na mwanda.

¹⁴ “Oho muntu ukufungwila litala lyendi kuli Nyambi ya Ngula, mukankombela ukatoya ndando ngo ku wuwahe walyo hinge shifwekesha sha kubipa kwalyo pe ndando yikenga ya mamaninino.

¹⁵ Ndi ou muntu wafungwile litala ukushinga kuli kuliza kami ngayi abweshe litala lyendi, uku fwanina kuyumba ndando iya atoyele mukankombela ku lilanda ku yakaho nkambiko ya kukuma ku wingi wa makumi abili ha mwanda na mwanda, pe likenga litala lyendi.

¹⁶ “Ndi muntu ukufungwila mbalila ya mfuba yendi ya ku shwanina kuli Nyambi ya Ngula, ndando yikenga kuya ku wingi wa mbuto yiya yikakuniwamo, ha ndando ya likumi lya mali a muwayawaya wa shiliva ku makilo makumi abili a luku.

¹⁷ Ndi ukufungwila mfuba wanguwangu ha kumana kwa mwaka wakushoboloka wa myaka 50 ndando yikenga ya nzimba.

¹⁸ Ngoboni ndi unayifungulu oho kwapitakale shikati, mukankombela ukalaba wingi wa myaka ya kushala hantu ku mwaka wakushoboloka wa myaka 50 wakumbili na kuhenyesha ndando munyima.

¹⁹ Ndi muntu ou wafungwile mfuba ukushinga kubwesha mfuba yendi, ukafwanina kuyumba ndando yayo na kuyakaho nkambiko ya kukuma ku makumi abili na mwanda umo. Pe yikenga yendi.

²⁰ Ngoboni ndi ukulandisha ku muntu washenge na kubula kutatika taha kuyibwesha kuli Nyambi ya Ngula, pe ukayawa ngovu za kubwesha.

²¹ Ngoboni ku mwaka wa kushoboloka myaka 50 wa kumbili mfuba yiyo yikenga ya kuyela kuli Nyambi ya Ngula, niyo yikenga likona lya bakankombela.

²² Ndi muntu ukufungwila mfuba kuli Nyambi ya Ngula, mfuba iya analanda yabula kwinga ya ku shwanina,

²³ pe mukankombela ukayaka ndando yayo kukuma ku wingi wa myaka hantu ku mwaka wakushoboloka, pe muntu ukafwanina kuyumba ndando iya yatoyiwile ha mutena uyo kwinga ya shizila kuli Nyambi ya Ngula.

²⁴ Kami mwaka wakushoboloka wa myaka 50, mfuba yikaboka kuli mwine wayo oku ayilandile yenga likona lyendi hinge lya bazukulyendi.

²⁵ Zindando nimwazo zikatoyiwa kukuma ku zindando zalandiwanga za ku ntanda ya shizila.

²⁶ Shimuna wakutatika kuhemuwa wenga wa Nyambi ya Ngula niku mwaka, nohobene kowa muntu wakumufungwila kami kukwendi kwinga ntupu ya kupana na kufunga. Namani wakutatika kuhemuwa, hinge mwana mbelele wakutatika kuhemuwa, hinge mwana mpongo wakutatika kuhemuwa nimwabo bakenga ba Nyambi ya Ngula.

²⁷ Ngoboni wakutatika kuhemuwa waku shimuna wakubula kuyela mwanga alandiwe kami na ndando balandanga na kuyakaho nkambiko makumi abili ha mwanda na mwanda. Ndi kuyibwesha ufwako ukutwesha kulandishiwa ku muntu washenge ha ndando balandanga.

²⁸ Ngoboni muntu kaliha wafwanina kulandisha hinge kubwesha ebye anafungwili sha nzimba kuli Nyambi ya Ngula, hinge ndi nengi muntu hinge ndi shimuna, hinge mfuba yendi ya ku shwanina. Byuma nimwabyo byabula kwitabilishiwa bikenga bya Nyambi ya Ngula mwayile mwaka.

²⁹ Kowa muntu ou unabulu kwitabilishiwa, ukabweshiwa kami, muntu wa noho unafwanini kuzihiwa.

³⁰ “Wingi wa mbuto yateziwi mu mfuba, hinge ya mikabo ya ku mitondo, shimo ku likumi shikwinga sha Nyambi ya Ngula, shinengi sha shizila kuli Nyambi ya Ngula.

³¹ Ndi muntu ukushinga kubwesha bimo hahabyo, uku fwanina kuyumba ndando iya balandanga na kuyakaho nkambiko ya kukuma ku makumi abili ha mwanda umo na umo.

³² Kami umo ku babimuna likumi ukwinga wa Nyambi ya Ngula. Oho babimuna ba kulabiwa, umo ha likumi na likumi ukwinga wa shizila kuli Nyambi ya Ngula.

³³ Pe nimwabo kukahatila Nyambi ya Ngula bafwako nohobene ngayi babimuna ba kuyonda mwanga bahatiweho, kami kaliha wafwanina kutambashana. Ndi ukatambashana shimuna umo na wamina, pe nimwabo ubili wabo bakenga ba shizila kuli Nyambi ya Ngula, pe kutwesha kubabwesha kami ufwako.”

³⁴ Awa niwo mazu aya Nyambi ya Ngula atongwezele Moshesha ha lipili lya Shinayi ku bantu ba Ishalela.