Balevi 26 - Libuka Lya Kuyela

Mfuywezi hakwombatala

¹ Nyambi ya Ngula wambile ngayi, “Hinga mukatenda tunankishi, hinge kwimika bifwekesha hinge zimpangwa za mamanya akubaza mukulemesha, ndaba ami Nyambi yenu.

² Mukalame matena ami aku katala na ku lemeeka mwanya ou bandemeshelenga. Ami Nyambi ya Ngula.

³ Ndi mukenda mu zintambo zami na kwombatala kufundiziza kwami,

⁴ nikamitumina mvula ha shikati sha kufwanina, ngayi litunga mwanga likayime mbuto na mitondo yikayime mikabo.

⁵ Mbuto yenu yikavula shikuma pe mukateza tezee, oho shikati sha kubuya mikabo shikakuma kami mukabuya mikabo buyee naku shikati sha ku shanga mbuto. Mukekala na byakulya byabingi, pe mukatwesha kwikala shiwahe mu litunga lyenu.

⁶ Nikamwenesha litunga lyenu, pe mukatwesha kulala na kutwesha kubula kutina muntu. Nikatanda tunzama twatukali mu litunga lyenu, kami kukekala nzita kufwako.

⁷ Mukenga bakakukoma bamalamo benu. Muka baziha na mukwale.

⁸ Bantu mutanu hakati kenu bakatwesha kutampwisha mwanda umo wa bantu. Ba mwanda bakatanda ba likulukazi limo. Bamalamo benu bakazihiwa na mikwale kumbili yenu.

⁹ Nikamifuywela na kumipana bana babengi, nikalama Kulimama kuya nalimamine nenu.

¹⁰ Kuteza kwenu kukenga kwakwingi, pe byakulya byenu bikamanisha mwaka, kami hinge noho mukekala na kuyumba ebye mwatezele mwaka mu bishete byenu ngayi muwane mwanya wakuyaka byabipya.

¹¹ Nikekala hakati kenu mu Ntanda yami ya kuzila, kami kukamifutamina nifwako.

¹² Nikekala hamo nanenu, nikenga Nyambi yenu, kami enu mukenga bantu bami.

¹³ Ami Nyambi ya Ngula, Nyambi yenu namifumishile mu litunga lya Engepita ngayi mwanga mukabule kwinga bandungo babo. Napokwele ngovu ziya zamikwatilenga kwinga bandungo na kumi leha hi mwenda na kukitangila.”

Kashushwilo kaha kubula kwombatala

¹⁴ Nyambi ya Ngula wambile ngayi, “Ndi kwombatala kufundiziza kwami mufwako, mukashushuliwa.

¹⁵ Ndi mukakiluka ha kukana kukonka zintambo zami na kwombatala mazu wami na kufundiziza kwami, kulimama kuya nalimamine nenu,

¹⁶ pe nikamishushula. Nikamitampwisha nimwenu na wulweli wakubula kutwesha kupangiwa na mashikashika aya akamiyingisha wushishitwa na Kubipisha wumi wenu. Mukakuna mbuto yenu, ngoboni kukamiwahila yifwako, ndaba bamalamo benu bakamikoma na kulya ebye mwa kunine.

¹⁷ Nikamifutulukila ngayi mwanga mukafomoke, kami obo bamizimba bakamilela, nohobene muketukanga hinge ndi kowa muntu wakumitanda.

¹⁸ “Hinge ndi hanebye nimwabyo mushili kubula kunyombatala, nikanenehesha kashushwilo kenu bikati mutanu na bibili ndaba ya wubi wenu.

¹⁹ Nikafwomona kuliyemeza kwenu kwakukalu, kukekala mvula kami kufwako, pe litunga lyenu likayuma nkwaa ngonehe limanya.

²⁰ Milimo yenu nimwayo yayikalu mukatenda yikaya mwowa, ndaba litunga lyenu kukayima mbuto lifwako na mitondo kukayima mikabo bifwako.

²¹ “Ndi mushili kuzamina kunkanangana na kukana kunyombatala nikahanyisha kashushwilo kenu kami bikati mutanu na bibili ndaba ya wubi wenu.

²² Nikatuma tunzama twatukali hakati kenu kami tukaziha bana benu na kulobesha bimuna byenu, pe tukashiyaho tuhu babashe ngayi zinzila zenu zikabundale.

²³ “Ndi ha naka kashushwilo nimwako enu mushili kukana kunyuvwilila na kuzamina kuhandula.

²⁴ Niho ami nikamifutulukila na kumishushula bikati mutanu na bibili byabikalu shikuma kupitakana bikati bya kutatika ndaba ya wubi wenu.

²⁵ Nikaleta nzita hahenu ya kumishushula aha munapokolo kulimama kwetu, pe ndi mukalikungwila mu minzi yenu ngayi mupuluke, nikatuma wulweli hahenu wakubula kutwesha kupangiwa, kami mukakandikiziwa kulishisha ku bamalamo benu.

²⁶ Nikapupisha byakulya byenu, nohobene bambuyama likumi mwanga bakaliwanine tuhu ku kabalu kamo kakuyohela mankende, nimwawo awa bakalitapilawo mukatikabo, pe oho mwalyawokale nimwawo, mushili kami kuyuvwa nzala.

²⁷ “Ndi hanebye nimwabyo enu mushili kuzamina ku handula na kukana kunyombatala,

²⁸ mu wukali wami nikamifutulukila pe kami nikatenda kashushwilo kenu kakabi shikuma, bikati mutanu na bibili kupitakana bikati bya kutatika ndaba ya wubi wenu.

²⁹ Nzala yenu yikenga yayinene shikuma ngayi mukalya bana benu babalume naba babambuyama.

³⁰ Nikalobesha myanya yenu ya kulemeshela ha kukankalala na kunyemuna tuula twenu twa incence na kuyumba mituntu yenu hayilu ya tunankishi twenu twowa. Nikekala na wunyengwe wawunene,

³¹ pe nikafutula minzi yenu kwinga mapembe, nikalobesha myanya yenu ya kulemeshela, pe kukayuvwa livumba lyaliwahe lya zinkombela zenu nifwako.

³² Nikalobesha litunga lyenu kulungu ngayi bamalamo aba balimo bakalikomokela kukulobeshiwa oku.

³³ Nikaleta nzita hahenu na kumipanzanishila mu matunga ashenge na mukwale hinga wekala ha nyima yenu. Litunga lyenu likashala ha nahiya. Minzi yenu yikashala mapembe.

³⁴ “Niho litunga likalikuwa myaka yayo ya kukatala shikati nimwasho osho mukabule ku lima. Shikati shiya mukekala mu wuntapwa mu litunga lya bamalamo benu, pe litunga lyenu likakatala na ku wahilila.

³⁵ Shikati nimwasho litunga likalikuwa myaka yalyo ya kukatala, yiya mwabulilenga ku lipanika kukatala oho mwekalilengamo.

³⁶ Nikengisha bowa bamo benu obo bakekala mu wuntapwa ngayi ncwalo za libizi na mpepo zikamitinisha na kwituka. Muketuka ngo muli na kutandiwa na banzita, kami mukaya na kuliwilawila tuzizi oho kamalamo kowa ukumitanda.

³⁷ Mukalituntula umo na wamina oho kowa muntu ukumitanda, pe kukatwesha kulwisha kamalamo wenu mufwako.

³⁸ Mukafwila mu wuntapwa pe litunga lya bamalamo benu likamimina.

³⁹ Ha naba bakapanza hakati kenu mu litunga lya bamalamo benu bakalambama ndaba ya wubi wenu na wubi wa bankakazenu.

⁴⁰ “Ngoboni ndi bazukulyenu bakalitabila wubi wabo na wubi wa bankakazabo, aba bankananganine na kumfutulukila,

⁴¹ naku nconkomona, pe nisho shiya na bafutukililile na kubatandila mu wuntapwa mu litunga lya bamalamo babo. Niho ndi bazukulyabo bakalilimbwilisha na kuyumba mulandu wabo waha wubi wabo nawa kumfutulukila,

⁴² pe nikanuka Kulimama kwami na Yakobo na Ishaki na Abulahama, pe nikanuka shikulupisho shami na kupana bantu bami litunga.

⁴³ Ngoboni ha kutatika, litunga likafwanina kutanda bantu balyo, ngayi mwanga likalikuwe kukatala kwalyo. Pe ba ku fwanina kuyumba mulandu nimwawo wakukana mazu wami na zintambo zami.

⁴⁴ Ngoboni hinge noho, oho bashili mu litunga, lya bamalamo babo, kuka bashiya hinge kuka balobesha nifwako, kutina nimanisha Kulimama kwami nanibo. Ami Nyambi ya Ngula, Nyambi yabo.

⁴⁵ Nikanuka kulimama kuya nalimamine na bankakazabo oho namoneshelenga ngovu zami ku matunga nimwawo ha kufumisha bantu bami mu litunga lya Engepita, ngayi mwanga, Ami Nyambi ya Ngula nikenge Nyambi yabo.”

⁴⁶ Nimwazo eze zinengi ndayano na mazu na kufundiziza kuya Nyambi ya Ngula ambile ku bantu ba Ishalela, kupitila muli Moshesha ha lipili lya Shinayi.