Balevi 25 - Libuka Lya Kuyela

Mwaka wakukatala kwa litunga

¹ Nyambi ya Ngula wambile kuli Moshesha hayo ha lipili lya Shinayi ngayi,

² “Tongweza bantu ba Ishalela eze ndayano ngayi, oho mukengina mu litunga elye ali na kumipana Nyambi ya Ngula, mukalemeeke Nyambi ya Ngula na kubula kulima mafuba wenu ha mwaka wa mutanu na yibili.

³ Mukakuna mafuba wenu, pe mukashanza mafuba wenu a shinyanca na kukungula mbuto yenu nimwayo ha myaka mutanu na umo.

⁴ Ngoboni mu mwaka wa mutanu na yibili ukenga wakukatala kwa litunga, mwaka wafunguliwila kuli Nyambi ya Ngula. Hinga mukashanga mafuba wenu, hinge ku tetela mikolobozi yamu mafuba wenu a mikabo ya shinyanca.

⁵ Hinga mukateza mbuto yangwila, hinge kubuyisha mikabo yaku mikolobozi yenu ya shinyanca ya kubula ku tetela, unengi mwaka wakukatala kwa litunga.

⁶ Hinge ndi mwaka uyo litunga likabula kulimiwa, likapana byakulya kukwenu naku bandungo benu naku bakamilimo benu naku mapukwenda aba mwazika nabo,

⁷ naku bimuna byenu naku tuyamana twalishaka twa mu litunga lyenu. Bakalya byuma nimwabyo biya bikamena.”

Mwaka wa Kushoboloka

⁸ “Mukalabe bikati mutanu na bibili kuvulisha na myaka mutanu na yibili, wingi wayo nimwayo yikwinga myaka 49.

⁹ Niho ha mutena wawulikumi wa ngonda ya mutanu na zibili ha mutena wakukuliza, mukatume muntu akashibe mpandula mu litunga nimwamo.

¹⁰ Mu ntendelo eye mukemika mwaka wawu 50 naku wuyaka kunkumo na ku shimikila ku shoboloka mu litunga nimwalyo ku bantu bazikamo. Ukenga mwaka wa ku shoboloka, oho muntu na muntu ukaboka ku wuheti wendi naku ba lupashi lwendi.

¹¹ Hinga mukakuna mafuba wenu, hinge kuteza mbuto yiya yangwila ya kulimenena, hinge kubuyisha mikabo ku mafuba wenu a shinyanca a kubula ku shanziwa.

¹² Mwaka nimwawo ukenga wa kuyela kukwenu, mukalyanga tuhu ebye bya kubula kukuna, bikayimanga mu mafuba wenu.

¹³ “Mu mwaka ou wakushoboloka muntu nimwendi ukaboka ku litunga lyendi.

¹⁴ Niho oho mukalandisha mfuba ku minenu wa ka Ishalela hinge ku landa mfuba kukwendi, hinga mukamukeyela.

¹⁵ Oho ndando yikemikiwa kutwala ha wingi wa myaka mfuba yikatwesha kuyima mbuto oho shilolo mwaka wakulubula ukume.

¹⁶ Ndi yili na myaka yayingi ndando boni yikaya hayilu, ngoboni ndi yili tuhu na myaka yayishe ndando kami yikaboka ku nceto, ndaba ngayi ebye binalandishiwi nilwo tuhu lukahu lwa tutikanga muya mu mfuba.

¹⁷ Hinga mukakeyela minenu wa Kaishalela, ngoboni mukatine Nyambi, ndaba Ami Nyambi ya Ngula, Nyambi yenu.”

Byabikalu mu mwaka wakukatala

¹⁸ “Nohobene mukende mu zintambo zami namu kufundiziza kwami ngayi mwanga mukekale shiwahe mu litunga.

¹⁹ Litunga likayima mbuto yalyo, kami mukawana ebye mwa shinga kulya nimwabyo, pe mukekala shiwahe.

²⁰ Ngoboni ndi mukepula ngayi, ‘Tukalyanga bishini ku mwaka wa mutanu na abili ndi kubula kukuna mafuba, kami kukungula mbuto tufwako?’

²¹ Nyambi ya Ngula ukafuywela litunga ha mwaka wa mutanu na umo ngayi mwanga litunga likalete byakulya bya ku fwanina kulya ha myaka yihatu.

²² Oho mukakuna mafuba wenu ha mwaka wa mutanu na yihatu, mukekala na kulya ebye mwatezele ha mwaka wa mutanu na umo. Kami mukekala na kulya kwa ku fwanina hantu mbuto eye mukakuna uya mwaka yinateziwi.”

Bya kulibweshela

²³ Kaliha munafwanini kulandishilila limvu ndaba kaliha lyenga lyenu, nilyo linengi lyami, kami enu munafweke ngo bayeni na mapukwenda aba banetabilishiwi kulimamo.

²⁴ Oho limvu linalandishiwi, ngovu za mwine walyo wakutatika kulilanda kami na kulibwesha zikafwanina kulimukiwa.

²⁵ Ndi minenu wa Kaishalela ukenga wakuyanda pe ukakandikiziwa kulandisha mbalila ya limvu lyendi, kawushinda wa ha mutima ukali kuliza.

²⁶ Muntu wakubula kawushinda wakulikuliza, pe kampe kumbili niye mwine ukenga wakuliwanina, ukekala na byuma pe uku fwanina kuli kuliza kami.

²⁷ Ha shambo shiyo ukafwanina kuyumbila muntu ou walilandile mali anafwanini ku myaka yiya yinashalili hantu mwaka wakushoboloka wakumbili unakumu, oho akatwesha kubwesha mbalila ya limvu lyendi.

²⁸ Ngoboni ndi ukabula mali aku fwanina kubweshela kami, likekala mu ngovu za nowo walilandile hantu ku mwaka wakushoboloka mwaka wa 50 wakumbili. Ha mwaka uyo nilyo lika boka kami ku mwine walyo wakutatika.

²⁹ Ndi muntu ukalandisha litala mu munzi wa kembi, uli na ngovu za ku fwanina kulibweshela kami mu mwaka wakutatika kubalika ku mutena uya alilandishile.

³⁰ Ngoboni ndi kulibweshela kami mu mwaka tuhu umo ufwako, ukayawa ngovu za kuheta kami liya litala, pe litala likenga wuheti wa mukakulanda mwaya myaka kami naku bihemwinino byendi, kukaboka ha mwaka wa kushoboloka bifwako.

³¹ Ngoboni matala aha munzi wakubula kembi anengi ngonehe mafuba. Mwine wawo wakutatika uli na ngovu za kuwabwesha kami, pe akabokeshiwa mu mwaka wakushoboloka.

³² Hinge kwingi noho Balevi bali na ngovu za kukubweshela wuheti wabo mu minzi yabo shikati nimwasho.

³³ Ndi litala lya mu munzi wa kembi linalandiwi ku kalevi, kami kuboka lifwako, liku fwanina ku bokeshiwa mu mwaka wakushoboloka myaka 50, ndaba matala a Balevi baheta mu minzi enga wuheti wabo mwaya myaka hakati ka bantu ba Ishalela.

³⁴ Ngoboni mabuyishilo azinguluka ku minzi ya Balevi kukalandishiwa afwako, niwo wunengi wuheti wabo mwaya myaka.

Bya kupana mikuli bancepwe

³⁵ Ndi minenu Kaishalela mwazika nendi hahepi unashepwe, kami kutwesha kuliwanina niye mwine ufwako, mu ku fwanina kumupana ngonehe mwapananga bayeni na mapukwenda ngayi mwanga akazamine kwikala nanenu hahepi.

³⁶ Hinga mukayumbisha nkambiko, ngoboni mukatine Nyambi yenu pe mukalehe minenu Kaishalela akekalenga na nenu hahepi.

³⁷ Hinga mukamupana mukuli wa mali wa kumushingila nkambiko, hinga muka mu keyela ha byakulya biya mukamulandisha.

³⁸ Ami Nyambi ya Ngula, Nyambi yenu, ou wamifumishile mu litunga lya Engepita ngayi mwanga nimipane litunga lya Kenaani, kami ngayi nikenge Nyambi yenu.

Kushoboloka kwa bandungo

³⁹ Ndi minenu mwazika nendi wa kaishalela wengakale hi waku shepwa shikuma, ha kulilandisha kukwenu, hinga mukamupana mulimo wa kwinga ndungo.

⁴⁰ Mukekala nendi kwinga ngo muntu wakuleta na kumitendela milimo kukuma ku mwaka wawu 50 myaka ya ku shoboloka.

⁴¹ Ku shikati shiyo niye na bana bendi ukamishiya na kuboka kukwabo naku wuheti wa ba lupashi lwendi.

⁴² Bantu ba Ishalela benga bandungo bami, aba nabafumishile mu litunga lya Engepita. Kaliha ba ku fwanina kulandishiwa kwinga bandungo.

⁴³ Hinga mubekalika na shilala, ngoboni mukatine Nyambi yenu.

⁴⁴ Ndi mukashinga bandungo mukatwesha kubalanda ku matunga anamizinguluku.

⁴⁵ Mukutwesha kami kulanda ba mapukwenda, aba bazika hakati kenu na mapashi wabo mwekala nabo. Shinene batwanuke aba bahemuwila mu litunga lyenu mwanga bakenge wuheti wenu.

⁴⁶ Kami mukatwesha kuka bashiya kwinga likona lya bana benu aba bakenga bandungo mu kuyoya kwabo nimwako. Ngoboni enu kaliha mwafwanina kwikalika na shilala baminenu Baishalela.

Kulilandisha kwa Kaishalela ku lipukwenda

⁴⁷ Ndi muyeni hinge lipukwenda ou mwazika nendi ukwinga wakuheta, hamina minenu wa kaishalela ukenga waku shepwa, pe ukalilandisha niyemwine kwinga ndungo ku uya lipukwenda hinge ku umo wa lupashi lwendi.

⁴⁸ Niho oho walilandishakale, ukalishobolola, umo ha bayayizendi na bakonzo bakamushobolola,

⁴⁹ hinge kanyantu kendi, hinge mufwala wendi hinge wamina ku bawushinda wendi baha mutima bakatwesha kumushobolola.

⁵⁰ Niye na muntu uya wa mulandile bakafwanina kulaba myaka kubalika shikati shiya alilandishile kutwala ku mwaka wakushobolola wakumbili, kami ukatoya ndando ya kumushobolola kwezeka ngo ndando bapananga ku mukamulimo.

⁵¹ Hinge kunashala myaka yayingi uku fwanina ku shimba shitapilo sha ndando ya kuhetiwa kukuma ha wingi wa myaka yinashala.

⁵² Hinge kunashala myaka yayishe hantu mwaka wakushoboloka, bakalaba hamo nendi na kuhingisha ndando ya myaka yinashalako.

⁵³ Ukekala nendi ngo muntu wa milimo ya kuhola ha mwaka ha mwaka, hekulyendi ku fwanina ku mwikalisha na shilala ufwako.

⁵⁴ Ndi kumushobolola mu zinzila zanehe ufwako niye na bana bendi bakafwanina kushoboloka ku mwaka wawu 50 wakushoboloka wakumbili.

⁵⁵ Kaishalela kutwesha kwinga ndungo ufwako ndaba bantu ba ishalela banengi bandungo bami. Banengi bandungo bami baya nafumishile mu litunga lya Engepita, Ami Nyambi ya Ngula, Nyambi yenu.