Balevi 24 - Libuka Lya Kuyela

Mwa kulamina mimuni

¹ Nyambi ya Ngula wambile kuli Moshesha ngayi,

² “Tongweza ba Ishalela ngayi, mukaletenga mazi a olive akuyengula shiwahe amu zimuni zamu ntanda ya shikungulukilo, nohobene ngayi zimuni mwanga zikabangenga shikati nimwasho.

³ Ku mazolo na mazolo, Aloni mwanga akazimunikenga na kuzileha hizibanga kukuma ku lumenemene kuyo ku meho a Nyambi ya Ngula, ha munkanda wa shibaamba sha kumbili ya Likwati lya Kulimama elye lili mu mwanya wakuzilila. Oku kufundiziza kukalamiwenga ku bihemunwino byenu nimwabyo.

⁴ Aloni ukafulankana zimuni zaha lyeyeko lya ngolinde ya yayiwahe na ku mona ngayi zikubanganga ku meho a Nyambi ya Ngula shikati nimwasho.”

Mankende akutupula kuli Nyambi

⁵ “Mukashimbe muhunga wakulembuka wa makilo likumi na abili kami mukavube mipumpa likumi na yibili ya linkende.

⁶ Mukayake mipumpa ya mankende ha tebulu ya ngolinde yayiwahe mu mihoko yibili, mutanu na limo muhoko na muhoko. Eye tebulu yikekale ku meho a Nyambi ya Ngula mu mwanya wakuzila.

⁷ Mukayake incence yayiwahe ha muhoko na muhoko wa mipumpa ya mankende, kwinga shitapilo sha shanukisho. Eye yikenga ntupu ya kuhokesha kuli Nyambi ya Ngula kuhinga mu mwanya wa mankende.

⁸ Matena nimwawo aku Katala, kubikati bikeza kumbili nimwabyo, mankende akafwanina kukayakiwa ku meho a Nyambi ya Ngula kwimanina bantu ba Ishalela ngayi kwinge kulimama kwakubula kumana.

⁹ Mankende akenga a Aloni na bana bendi, pe bakawalilanga mu mwanya umo wa kuyela, ndaba shinengi shitapilo sha kuyela shikuma sha byakulya binakombeleliwi kuli Nyambi ya Ngula, kwinga bya mukankombela. Kufundiziza oku kwa bikati nimwabyo.”

Bya kushushula kwakuwahe

¹⁰ Kwekalile mulume ou wekalile na tatiyendi wa Kaengepita na mandiyendi wa kaishalela. Muyo mu munkungwa uya muntu walyambile na kaishalela,

¹¹ oho balyambilenga, pe uya mulume wahandwile Nyambi ya Ngula, nohobene bamutwalile kuli Moshesha (lizina lya mandiyendi wa kaishalela Shelomiti, mwana Ndimbili wa mushobo wa Ndani).

¹² Bamulaminenga kutatilila kuli Nyambi ya Ngula ngayi abatongweze mwa kumutendela.

¹³ Nyambi ya Ngula wambile kuli Moshesha ngayi,

¹⁴ “Shimba uya muntu umututwishe mu munkungwa. Bantu aba bayuvwile ha tukana bakakambike maboko wabo ha mutwe wa uya muntu na ku mona ngayi uli na mulandu. Pe niho likunge nimwalyo likamuzihe na mamanya.

¹⁵ Pe utongweze bantu ba Ishalela ngayi muntu nimwendi wakutukana Nyambi ya Ngula uku fwanina kulileyekamo niyemwine,

¹⁶ pe ukazihiwa. Enge ka Ishalela hinge lipukwenda wazika mukati kabo, ou wakutukana Nyambi ya Ngula ukazihiwa na mamanya ku bantu nimwabo ba shikungulukilo.

¹⁷ “Muntu nimwendi ou wakuziha minendi naye kami bakamuziha.

¹⁸ Pe muntu nimwendi wakuziha shimuna sha minendi wamina uku fwanina kuhingishamo washenge. Shambiwile ngayi wumi ku wumi.

¹⁹ “Ndi muntu ukulemeka minendi, nimwasho anatende shikatendiwa kukwendi kami.

²⁰ Ndi ukupokola shifupa shaminendi, naniye kukapokoliwa shimo ku bifupa byendi. Kami ukutiba liho lya minendi, niniye kami bakatibako liho limo ku meho wendi. Ndi ukashokola liyewe lya minendi, niye kami bakamushokolako limo ku mayewe wendi. Nimwabyo ebye akulemeka ku minendi bikatendiwa kukwendi kami.

²¹ Nimwendi ou ukaziha shimuna ukamuhingishamo, ngoboni nimwendi ukuziha minendi naye kami ukazihiwa.

²² Oku kufundiziza kuna kundama kukwenu nimwenu, ku Baishalela naku mapukwenda bazika hakati kenu, ndaba ami Nyambi ya Ngula, Nyambi yenu.”

²³ Oho Moshesha ambile ku bantu ba Ishalela pe batutwishile uya muntu ha munkanda wa munkungwa, pe bamuzihile na mamanya. Nisho shiya bantu ba Ishalela batendele ebye abatongwezele Nyambi ya Ngula kupitila muli Moshesha.