Balevi 22 - Libuka Lya Kuyela

Kuyela kwa zintupu

¹ Nyambi ya Ngula wambile kuli Moshesha ngayi,

² “Tongweza Aloni na bana bendi ngayi, kaliha mwafwanina kuleta lihandu ha lizina lyami lya kuyela. Nohobene tendenu na lileema zinkombela zami za kuyela, eze bafungwilile bantu ba Ishalela kukwami. Ami Nyambi ya Ngula.

³ Ndi umo waku bazukulyobe oho hinga abula kuzila, akwiza kwakwipi na zinkombela za kuyela eze bantu ba Ishalela banafungwili kukwami, pe ukafumishiwa ku meho wami. Eshe shikekala ku bihemwinino byobe nimwabyo. Ami Nyambi ya Ngula.

⁴ “Waku bazukulya Aloni ou uli na wulweli wakuliyambwisha hinge wakuvwa ku lutu kaliha wafwanina kukalya ku zinkombela nimwazo za kuyela hantu nayele. Mukankombela nimwendi na bipi ndi ukukwata shuma shinengi sha shibi, sha kukwata mutuntu, hinge ndi ou navwishili mukeza wendi hanci.

⁵ Hinge ndi unakwata kayamana wakubula kuyela hinge muntu una bipi.

⁶ Mukankombela nimwendi ukubipa uku fwanina kwikala hinga abula kuyela kukuma naku mazolo, kami hinge noho kaliha wafwanina kulya ku zinkombela nimwazo za kuzila hantu na yowele.

⁷ Oho mutena wawakale ukwinga wakuzila, kami niho alye zinkombela za kuzila, ndaba ebye binengi byakulya byendi.

⁸ Hinga ukalya nyama ya kayamana wakulifwila ku malweli hinge wakuliwa ku twanza twa lishaka, pe bikamubipisha. Ami Nyambi ya Ngula.

⁹ Bakankombela nimwabo bakalama kufundiziza oku nimwako namitongwezele, kutina bakawana mulandu na kufwa ndaba banabulu Kubipisha mazu wami. Ami Nyambi ya Ngula, pe ami nikubayelesha.

¹⁰ “Muntu wa ha nkumo ya muhoko wa lupashi lwa bakankombela, hinge muyeni, hinge mukakubatendela mulimo kaliha ukutwesha kulya zinkombela za kuzila.

¹¹ Ngoboni bandungo ba mukankombela alandile na mali wendi niyemwine hinga nimwendi wahemuwila mu litala lyendi hinge bana ba bandungo, ba kutwesha kulya byakulya ebye akatambula mukankombela.

¹² Mwana mukankombela wa mbuyama wakuyekiwa ku muntu wa ha nkumo ya bakankombela, wakubula kwinga mukankombela ku fwanina kulya zinkombela nimwazo za kuyela ufwako.

¹³ Ngoboni mwanendi wa mbuyama wa mfwile hinge wakulubula, ou wakubula bana pe kami naboko kami mukwikala mu litala lya tatiyendi kwinga wakulamiwa uku fwanina kulya byakulya atambulanga tatiyendi. Ndele tuhu muntu wa ha muhoko waha lupashi lwa bakankombela uku fwanina ku lyako.

¹⁴ “Muntu nimwendi ou wakubula kwinga waha muhoko waha lupashi lwa bakankombela ukalya zinkombela za kuzila na mapuza uku fwanina kuhingisha kuli mukankombela ndando yabyo nimwabyo na kuyakaho nkambiko makumi abili ha mwanda na mwanda.

¹⁵ Bakankombela kukabipisha zinkombela za kuyela eze baishalela banakombelele kuli Nyambi ya Ngula bafwako,

¹⁶ na kwitabilisha muntu wakubula kupanikiwa ngovu ngayi alyebyo. Eshe shikaleta mulandu na kashushwilo ku muntu wa noho Ami Nyambi ya Ngula, ou wazilikanga.”

¹⁷ Nyambi ya Ngula wambile kuli Moshesha ngayi,

¹⁸ “Tongweza Aloni na bana bendi na bantu nimwabo ba Ishalela ndayano eze ngayi, oho Kaishalela hinge lipukwenda akaleta nkombela ya kuhokesha hinge kuhahulula luhaho, hinge ntupu ya kupana na kufunga.

¹⁹ Shimuna uku fwanina kwinga wa mulume wakubula muhendo ngayi nkombela yikatambuliwe.

²⁰ Ndi ukakombelela shimuna uya uli na muhendo, Nyambi ya Ngula kukamutambula ufwako.

²¹ Ndi muntu nimwendi ukakombelela nkombela ya kulilumikila kuli Nyambi ya Ngula, hinge kuhahulula luhaho hinge ntupu ya kupana na kufunga, shimuna uku fwanina kwinga wakubula muhendo ngayi mwanga atambuliwe.

²² Hinga mukakombelela kuli Nyambi ya Ngula shimuna wakufwa meho hinga wakupenga, hinge waku shunkuta, hinge wawulweli waluyuwilila, hinge wakuhutuka shikonde hinge wa likwanya. Hinga mukankombelela babimuna banoho kwinga nkombela ya byakulya ya kukombelela na mundilo.

²³ Muntu ukutwesha kukombelela nkunzi hinge shikungwe kwinga ngonehe ntupu ya kupana na kufunga. Ufwako kuleta kwinga nkombela mu kuhalulula luhaho ndi uya shimuna wakutinta hinge wakubula kuvumbiwa shiwahe.

²⁴ Hinge mukakombelela nkombela kuli Nyambi ya Ngula, shimuna wakutibika bya ha lutu, hinge wakuketuka, hinge ndi wa mabenga hinge ndi ntatula. Eshe kushitabilisha bafwako mu litunga lyenu.

²⁵ “Hinga mukakombelela nkombela ya byakulya washimuna wakufweka ngo uyo wakutambula ku lipukwenda, ndaba babimuna banehe ba kuhanganikiwila ngo bali na muhendo, pe kukatambuliwa bafwako.”

²⁶ Nyambi ya Ngula wambile kuli Moshesha ngayi,

²⁷ “Oho kana ka ngombe hinge kana ka mbelele hinge kana ka mpongo kaya ka nahemuwu kaliha mwafwanina kukashimba kukafumisha kuli mandiyako oho shilolo kupite matena mutanu na abili. Pe niko kakatambuliwa kwinga ntupu ya kukombelela ha mundilo wa byakulya.

²⁸ Hinga mukakombelela ngombe na mwanendi hinge mbelele na mwanendi hinge mpongo na mwana nendi ha mutena umo.

²⁹ Oho mukakombelela nkombela ya kukambilila kuli Nyambi ya Ngula, kombelelenu ngayi mwanga yikatambuliwe.

³⁰ Mukamulye mutena umo kami hinga mukashiyaho kukuma naku lumenemene. Ami Nyambi ya Ngula.

³¹ “Mukwombatale mazu wami, Ami Nyambi ya Ngula,

³² hinga mu handwisha lizina lyami lya kuyela, ngayi Ami ninge wa kuyela hakati ka bantu ba Ishalela, Ami Nyambi ya Ngula kami nikumiyelesha.

³³ Kami namifumishile mu Engepita ngayi mwanga ninge Nyambi yenu, Ami Nyambi ya Ngula.”