Balevi 21 - Libuka Lya Kuyela

Kuyela kwa Bakankombela

¹ Nyambi ya Ngula wambile kuli Moshesha ngayi, “Tongweza bakankombela Aloni na bana bendi ngayi, mukankombela kaliha wafwanina kulizilulula ha kuwungika zintande ha malila oho kawushinda wendi unafu,

² ndele banengi bamandiyendi, hinge batatiyendi, hinge mwanendi wa mulume hinge wa mbuyama, hinge yayiyendi wa mulume,

³ hinge mpanzendi wakubula kuyekiwa wekala mu litala lyendi.

⁴ Mukankombela kaliha wafwanina kulibipisha ha lufu lwa kawushinda wakuyekela kumo.

⁵ “Mukankombela kaliha wafwanina ku sheha ku mutwe wendi hinge kutewula mulevu wendi, hinge kulitabozola ha lutu lwendi mu ku monesha ngayi uli ha malila.

⁶ Ukenga wa kuyela kami kaliha wafwanina kuhandula lizina lyami. Niye watupulanga zintupu za kuhokesha za byakulya kukwami, nohobene uku fwanina kwinga wakuzila.

⁷ Mukankombela hinga akayeka mbuyama walwiholwiho, hinge wakubula nkaanga, hinge mbuyama ou banalubulu, ndaba mukankombela wenga wa kuyela kuli Nyambi yendi.

⁸ Bakankombela banengi ba kuzila ndaba nibo batupulanga zintupu za byakulya kukwami. Bakenga ba kuzila kukwenu ndaba Ami Nyambi ya Ngula wamiyeleshanga, nenga wa kuyela.

⁹ Ndi mwana mukankombela wa mbuyama ukenga walwiholwiho, ukuhandwishako tatiyendi, pe ukahokeshiwa.

¹⁰ “Mukulwane wa bakankombela nimwabo, ou wa wabishiwile mazi ha mutwe wendi, kami wafunguliwile ngayi avwalenga bivwalo bya mukankombela, kaliha wafwanina kuleha huki za kubula ku shakula hinge kutabozola bivwalo byendi mu ku monesha ngayi uli mu malila.

¹¹ Hinga akengina mu litala omu muli mutuntu, hinge kuli bipisha niyemwine, hinge ndi tatiyendi wakumubeleka, hinge ndi mandiyendi,

¹² hinge kututikila ha munkanda wa mwanya wakuzila, ngayi hinga abipisha mwanya wa kuyela wa Nyambi yendi, ndaba unafunguliwili kuli Nyambi ha kuwabishiwa mazi. Ami Nyambi ya Ngula.

¹³ Akayeke kankanga.

¹⁴ Hinga akayeka mfwile, hinge mbuyama wakulubula, hinge mbuyama ou walibipishile na balume. Ukayeka tuhu kankanga wa ku livumo lyendi.

¹⁵ Mukankombela kaliha wafwanina Kubipisha bana bendi hakati ka bantu bendi. Ndaba Ami Nyambi ya Ngula, Ami namufungulu ngayi enge wakuzila.”

¹⁶ Nyambi ya Ngula wambile kuli Moshesha ngayi,

¹⁷ “Tongweza Aloni ngayi, kowa waku bazukulyobe wa muhendo ha lutu waku fwanina kuleta ntupu ya byakulya kukwami. Eshe shikekala naku bihemwinino byabo nimwabyo.

¹⁸ Mukankombela wa muhendo ha lutu kaliha wafwanina kukombelela nkombela. Kushimbawila kumo na kashishitwa, hinge wakupenga, hinge wakutengama lupala, hinge wa shifwekesha sha shibi.

¹⁹ Hinge wakupenga liboko hinge liwulu,

²⁰ hinge wa ntunda ha mongo, hinge kanyipinyipi, hinge wa lupwe, hinge wa wulweli waluyuwila ha lutu, hinge ntatula.

²¹ Muzukulya Aloni mukankombela wa muhendo ha lutu kaliha wafwanina kutupula ntupu ya kuhokesha ya byakulya kukwami.

²² Muntu wanehe ukutwesha kulya byakulya binakombeleliwi kukwami bya kuyela nebye bya kuzila.

²³ Ngoboni, ndaba ya muhendo ha lutu. Kaliha uku fwanina kwiza kwakwipi na shibaamba sha kuzila hinge kuhenyena ku kaala. Kaliha uku fwanina Kubipisha byuma ebye bya kuyela, ndaba Ami Nyambi ya Ngula, pe nikubiyelesha.”

²⁴ Eshe nisho Moshesha afundizizile Aloni na bana bendi na bantu nimwabo ba Ishalela.