Balevi 19 - Libuka Lya Kuyela

Ndayano za ha kuyela na kulunga

¹ Nyambi ya Ngula wambile kuli Moshesha ngayi,

² “Tongweza shikungulukilo sha Baishalela ngayi, yingenu ba kuyela, ndaba Ami Nyambi ya Ngula, Nyambi yenu nili wa kuyela.

³ Muntu na muntu uku fwanina kulemeeka tatiyendi na mandiyendi na kulama Mutena wakukatala ngonehe namitongwezele. Ami Nyambi ya Ngula, Nyambi yenu.

⁴ “Hinga umfutamina na kulemesha tunankishi, kami hinga utenda banyambi ba wutale. Ami Nyambi ya Ngula, Nyambi yenu.

⁵ “Oho ukuziha shimuna wa nkombela ya kulilumikila lama mazu aya nakupanikile ngayi nkombela yobe mwanga yitambuliwe.

⁶ Nyama nimwayo yiku fwanina kuliwa wowo mutena wa ku kombelela shimuna, hinge kukuma ku mutena wakuziha shimuna, hinge kukuma ku mutena wa wubili. Nyama yamina ya kukuma ku mutena wa wuhatu yiku fwanina kuhokeshiwa,

⁷ ndaba yinabipi. Kami ndi muntu ukulyayo, pe nkombela kukayitambula nifwako.

⁸ Muntu nimwendi ukalyayo ukalileyekamo niyemwine, ndaba unafutulu byuma bya Nyambi ya Ngula bya kuyela kubingisha bya kubula kuyela, kami ukafumishiwa hakati ka baminendi.

⁹ “Oho mu kuteza mafuba wenu, hinga mukateza mbuto ya kunkumo ya mfuba, kami hinga mukaboka munyima na kuteza mapumpwa a mbuto yiya ya ku shalamo.

¹⁰ Hinga mukaboka munyima na kupita mu mfuba ya shinyanca na kubuya mikabo yiya mwashiyanga hinge kutola mikabo yiya yinawu, bishiyenu binge bya bantu ba kuyanda na mapukwenda. Ami Nyambi ya Ngula, Nyambi yenu.

¹¹ “Hinga uyiba, hinga ukeyela, hinge kubangila muntu mahalo.

¹² Hinga ulibeza na kwongeza mu lizina lyami, shikaleta lihandu ku lizina lyami. Ami Nyambi ya Ngula.

¹³ Hinga uyandisha muntu, hinge kumupukula. Hinga ukemika ncuungu ya muntu shikati sha kuhola kwendi, uya wehana ku mulimo, hingebene lushiku lumo.

¹⁴ Hinga utukana muntu wakubula matu, hinge kuyaka shuma shimo kumbili ya kashishitwa ngayi mwanga alituntuleho. Tinenu Ami Nyambi ya Ngula.

¹⁵ “Hinga muyata na shihota, hakati ka bakakuyanda na bakakuheta, ngoboni mu bayate mu kupwisha.

¹⁶ Hinga wendesha mahalo, mukati ka bandambo bobe, hinge kufutulukila ndambo yobe, ou ukushinga kulilamwina. Ami Nyambi ya Ngula.

¹⁷ Hinga wikala na linkotwa ku muntu, ngoboni mu liyuvwashane na ndambo yobe ngayi mwanga ubule kutenda wubi ndaba yendi.

¹⁸ Hinga ubwesha wubi ku wubi ku muntu nimwendi hinge kwikala na nkoko ku minobe, ngoboni haka ndambo yobe ngonehe walihaka obe mwine. Ami Nyambi ya Ngula.

¹⁹ “Ombatala ndayano zami. Hinga ufutakanya tuyamana twa kulela. Hinga ukuna mikabo ya mishobo yibili mu mfuba yimo. Hinga uvwala bivwalo bya kupohela na wanda wa mishobo yibili.

²⁰ “Ndi muntu unakulupishi kulandisha ndungo yendi wa mbuyama kuli minendi kwinga mukazendi, ngoboni uyo minendi shilolo amuyumbile ndando ya ku mushobolola, ndi uyo hekulyendi ukulala nendi, kukazihiwa bafwako bakashushuliwa tuhu ndaba ushili kwinga ndungo yendi.

²¹ Pe hekulyendi ukaleta shikungwe wa mbelele ku menginino a Ntanda ya Shikungulukilo kwinga ntupu ya kukuliza.

²² Kami niye mukankombela ukatenda shiheka sha kukuliza sha ntupu ya nkunzi ha kuliyelesha ha wubi anatende, pe Nyambi ya Ngula ukamuyatila.

²³ “Oho mukengina mu litunga lya Kenaani pe mukakuna mitondo ya mikabo ya mishobo nimwayo hanganikenu shikuma ngayi mikabo ya kutatika ku myaka yihatu yikenga ya kukanishiwa. Ha shikati shiya kaliha mu ku fwanina kulyayo.

²⁴ Mu mwaka wa wunaa mikabo nimwayo yikenga ya kufunguliwila kwinga ntupu yenu ya kuyemeza kukwami, Ami Nyambi ya Ngula.

²⁵ Ngoboni mu mwaka wa mutanu mu ku fwanina kulya mikabo. Ndi mukatenda nehe, mitondo yenu yikayima mikabo shikuma. Ami Nyambi ya Ngula, Nyambi yenu.

²⁶ “Hinga mukalya nyama yili na mukeza. Hinga mukakundama ku bya wulozi hinge bakamalele.

²⁷ Hinga mukasheha huki za ku mbalila ya mitwe yenu na ku shiya mancunkili hinge kutewula lipupi lya milevu yenu.

²⁸ Hinge kulishata, hinge kulitana zimpemba ha malila. Ami Nyambi ya Ngula.

²⁹ “Hinga mukahandula bana benu ba bambuyama kubengisha balwiholwiho ku tuula twa banyambi bashenge. Ndi mukatenda noho, pe mukatengulukila ku banyambi bashenge kami litunga likenzala na lwiholwiho na kuluwa.

³⁰ Mukalame matena ami aku katala, kami lemeekenu mwanya ou bandemeshelanga. Ami Nyambi ya Ngula.

³¹ “Hinga mukaya kubakakukwata bapashi naku bya wulozi. Ndi mukatenda noho pe mukabipa. Ami Nyambi ya Ngula, Nyambi yenu.

³² “Moneshenu maleema ku bakulwane nakubaleemeka. Pe mu nyombatale na kuntina. Ami Nyambi ya Ngula.

³³ “Hinga mukekalisha mapukwenda aba bakazika mu litunga lyenu na shilala.

³⁴ Mukabekalike ngonehe mukwikalika minenu wa Kaishalela, kami muka bahake nehe mu kulihaka enu bamwine. Anukenu ngayi enu ku shikati shimo mwengile mapukwenda mu litunga lya Engepita. Ami Nyambi ya Ngula.

³⁵ “Hinga mukeyela muntu nimwendi ha kwezekesha kutendesha bifwanikizo bya mahalo, ha kufwanikiza wutali, hinge kwezeka bya wulemu, hinge bya wingi wa byuma.

³⁶ Mukatendeshe bifwanikizo bya kupwisha na mamanya a wulemu akupwisha na zintumba na zinkomoki za bifwanikizo za kupwisha. Ami Nyambi ya Ngula, Nyambi yenu, ou wamifumishile mu litunga lya Engepita.

³⁷ Mukombatale mazu wami na kufundiziza kwami nimwako. Ami Nyambi ya Ngula.”