Balevi 18 - Libuka Lya Kuyela

Kukanisha bya wunjenge

¹ Nyambi ya Ngula wambile kuli Moshesha ngayi,

² “Tongweza bantu ba Ishalela ngayi, Ami Nyambi ya Ngula, Nyambi yenu.

³ Hinga muhembwiliza biheka bya bantu bamu Engepita omu mwekalilenga mwaka, hinge bya bantu bamu litunga lya Kenaani omu nili na kumitwala.

⁴ Konkenu kufundiziza kwami na mazu wami na kutenda ebye nikumitongweza. Ami Nyambi ya Ngula, Nyambi yenu.

⁵ Konkenu mazu awa nikumipanika Muntu ukutenda ebye byuma, ukayoya nabyo. Ami Nyambi ya Ngula.

⁶ “Hinga ulala na umo waha bawushinda wobe ndaba kunengi kuvwula kawushinda wobe.

⁷ Hinga ukahandula tatiyobe na kulala na mandiyobe wakubeleka. Kaliha uku fwanina kuhandula mandiyobe waku kubeleka. Ndaba kunengi kuvwula kawushinda wobe,

⁸ Hinga ukahandula tatiyobe na kulala na umo waku bakazendi.

⁹ Hinga ukalala na mpanzobe waku wana, hinge ou wahemuwa nendi, tatiyenu umo na mandiyenu umo.

¹⁰ Hinga ukalala na muzukulyobe, shiya shikukubulisha maleema.

¹¹ Hinga ukalala na mpanzobe waku wu tate, hinge waku wu mawa, ndaba niye nengi mpanzobe.

¹² Hinga ukalala na tatiyobe wa mukazi ndaba nengi mpanza tatiyobe wakuhemuwa nendi.

¹³ Hinga ukalala na mandiyobe wakanuke ndaba nengi mukonzo wa mandiyobe wakuhemuwa nendi.

¹⁴ Hinga ukalala na mukaza kanyantu kobe ndaba unengi tatiyobe wa mukazi.

¹⁵ Hinga ukalala na mukaza mwanobe, ndaba unengi mukowobe,

¹⁶ hinge kulala na mulamu wobe ndaba kunengi kuvwula kawushinda wobe.

¹⁷ Hinga ukalala na mbuyama na kulala kami na mwanendi, hinge muzukulyendi, mwana mwanendi wa mulume hinge mwana mwanendi wa mbuyama. Nibo banengi bawushinda wobe, eshe shinengi sha lisheni.

¹⁸ Hinga ukayeka mulamu wobe, kubapalikisha na yayiyendi oho mukazobe ushili kuyoya.

¹⁹ “Hinga ukalala na mbuyama oho ushili ku nciza ya munzi, ndaba wa kubula kuyela.

²⁰ Hinga ukalala na mukaza muntu wamina ndaba ngayi shika Kubipisha.

²¹ Hinga mukapana bana benu mu kubakombelela ha mundilo kuli nyambi Moleki, ndaba ngayi shikaleta lihandu ku lizina lya Nyambi yenu. Ami Nyambi ya Ngula.

²² Kowa mulume ukalala na minendi mulume ku mwinga mukazi, Nyambi ya Ngula wazimba eshe. Kaloombe kanengi shuma sha wunyengwe.

²³ Kowa mulume hinge mbuyama ukalibipisha ha kulala na shimuna, wubi wa noho ukuleta wunyengwe.

²⁴ “Hinga mukalibipisha na biheka bya nehe, eshe nisho balibipishilenga aba bantu, aba bekalilenga mu litunga ha kutatika enu oho shilolo mukume. Nisho shuma shiya Ami Nyambi ya Ngula nili na kubatandilamo ngayi enu mwanga mutweshe kuyamo.

²⁵ Biheka byabo bya bipishile litunga, nohobene Ami Nyambi ya Ngula na shushula litunga, pe nisho shaleteshele ngayi litunga libakane bantu bekalamo.

²⁶ Ngoboni mu ku fwanina ku lamanga zintambo zami na kufundiziza kwami, pe hinga mukatenda byuma ebye bya wunyengwe, hinge enu mwahemuwila mu litunga lino hinge lipukwenda wazika hakati kenu,

²⁷ ndaba bantu ba litunga batendele byuma ebye bya wunyengwe, nimwabyo nibyo byabipishile litunga.

²⁸ Pe ndi mu Kubipisha litunga, likamikana, ngonehe lyakanine baya bantu bekalilengamo ha kutatika.

²⁹ Mu kulimuka ngayi muntu nimwendi wakutenda byuma bya wunyengwe ukafumishiwa hakati ka baminendi.

³⁰ Kami Nyambi ya Ngula wambile ngayi, ombatala kufundiziza oku namipana na kubula kukonka biheka ebye batendelenga aba bekalilenga mu litunga ha kutatika oho enu shilolo mwizemo. Kami hinga muli bipisha enu bamwine na kutenda bimo ha byuma ebye. Ami Nyambi ya Ngula, Nyambi yenu.”