Balevi 16 - Libuka Lya Kuyela

Mutena wakukuliza

¹ Nyambi ya Ngula wambile kuli Moshesha oho bana ba Aloni babalume babili bafwakale, aba bakombelelele mundilo wa wubi kuli Nyambi ya Ngula.

² Pe wambile ngayi, “Tongweza yayiyobe Aloni ngayi hinga ezanga ku nciza ya shibaamba mu Mwanya wa kuyela ha shikati shimo, ndaba ngayi nimo nikamonekelanga mu likumbi hayilu ya muhuko wa nceshe, ou uli hayilu ya Likwati lya Kulimama, kutina akafwa.

³ Aloni tuhu ukengina mu mwanya wa kuyela oho akaleta nkunzi wamushe wa ntupu ya ha wubi na shikungwe wa mbelele ha nkombela ya kuhokesha.

⁴ Niho Nyambi ya Ngula afundizizile ndayano eze, oho Aloni shilolo engine mu Mwanya wa Kuyela, uku fwanina kuyowela na kuvwala bivwalo bya mukankombela, shivwalo sha likwiza lya kulelema lyambangubo, hamo na tuputula na mukunzi na kahoshi ka likwiza lya kuzenga ku mutwe.

⁵ “Pe shikungulukilo sha Ishalela shikapana Aloni babikungwe ba bampongo babili ha ntupu ya ha wubi na shikungwe wa mbelele kwinga nkombela ya kuhokesha.

⁶ “Pe ukakombelela nkunzi kwinga ntupu ya ha wubi na wubi wendi niyemwine na nou wa ba lupashi lwendi.

⁷ Niho akashimba bampongo babili kutwala ku menginino aku Ntanda ya Shikungulukilo.

⁸ Kuyo niko akakuna nyela ya kutendesha mamanya abili, limo lya kumangula ngayi, ‘Lya Nyambi ya Ngula’ lyamina kami ngayi, ‘Lya wa Azazele.’

⁹ Niho Aloni ukakombelela mpongo wakuhatiwa ku nyela kwinga ya Nyambi ya Ngula, kami ukamukombelela kwinga ntupu ya ha wubi.

¹⁰ Ngoboni mpongo wakuhatiwa na nyela kwinga mpongo wa shihingo ukatwaliwa ku meho a Nyambi ya Ngula hayoya, pe ukatandiwila mu libelelengwa kwinga mpongo wa shihingo, wakwambwililisha bantu ku wubi wabo.

¹¹ “Aloni ukakombelela nkunzi kwinga ntupu ya ha wubi na wubi wendi niyemwine na nou wa ba lupashi lwendi.

¹² Pe ukashimba shinzoyo sha kukalila mundilo sha kwinzala na mashanga a mundilo aku kaala, kami maboko abili akwinzala a incence ya kutwa muhungahunga. Pe ukabitwala mu Mwanya wa Kuyela.

¹³ Kuyo ku meho a Nyambi ya Ngula, ukayaka incence ha mundilo ngayi wishe uyo ukaholeke muhuko wa nceshe ou unafwiki Likwati lya Kulimama lili na wupaki wa Nyambi ya Ngula, kutina akafwa.

¹⁴ Pe ukashimba mukeza umo wa nkunzi na kuwu myanzila hayilu ya muhuko wa nceshe na munwe wendi, pe kami na ku myanzilaho umo bikati mutanu na bibili kumbili ya Likwati lya Kulimama.

¹⁵ “Niho ukaziha mpongo waha ntupu ya ha wubi na kuleta mukeza wendi mu Mwanya wa Kuyela na kuwu myanzila ha muhuko wa nceshe, pe kami kumbili ya Likwati lya Kulimama ngonehe atendele na mukeza wa nkunzi.

¹⁶ Muntendelo eye ukayelesha Mwanya wa Kuyela ndaba ya kubula kuyela kwa bantu ba Ishalela na kuluwa kwabo naku wubi wabo nimwawo, uku fwanina kutenda noho ku Ntanda ya Shikungulukilo, ndaba yili mukati ka munkungwa owe wuli mukati ka bantu bakubula kuyela.

¹⁷ Ku balika ku shikati akwingina Aloni mu Mwanya wa Kuyela mukutenda shiheka sha kukuliza kaliha kukafwanina kwikala muntu mu Ntanda kumbili ya Nyambi ya Ngula, hantu unatutiki. Oho watendakale shiheka sha kukuliza niyemwine na ba lupashi lwendi na shikungulukilo nimwasho sha Ishalela,

¹⁸ niho uku fwanina haya kututika ha munkanda ku kaala ka zinkombela za kuhokesha. Pe ukatenda shiheka sha kukuliza kaala. Ukafwanina kushimba mukeza umo wa nkunzi na mukeza umo wa mpongo na ku wu yaka ha mashengo aku zinkomi za kaala.

¹⁹ Pe ukafwanina kumyanzilaho mukeza umo ha kaala na munwe wendi bikati mutanu na bibili. Mu ntendelo eye ukashiyelesha ku kubula kuyela kwa bantu ba ishalela na ku zilulula.

²⁰ “Oho ndi Aloni wamanishakale kutenda shiheka sha kukuliza Mwanya wa Kuyela na wingi wabya Ntanda ya shikungulukilo na kaala, ukatwala mpongo wamumi unahatiwili kwinga mpongo wa shihingo kuli Nyambi ya Ngula.

²¹ Ukayaka maboko wendi wubili wawo ha mutwe wa mpongo uya wa shihingo na kulitabililaho kuluwa kwabo nimwako na wubi nimwawo na mafutufutu a bantu ba ishalela, pe Aloni ukabinungulwila ku mutwe wa nou mpongo, pe ukamutandila mu ngawungawu.

²² Pe mpongo ukashimba wubi wa bantu nimwawo na kuwu twala mu ngawungawu, pe ukaleha mpongo ngayi akaliyile mu libelelengwa.

²³ “Niho Aloni ukaboka ku Ntanda ya Shikungulukilo na kuvwula shivwalo sha likwiza lya kulelema sha mukankombela shiya avwala oho enginanga mu Mwanya wa Kuyela na ku shishiya oho shilolo engine mu Ntanda.

²⁴ Uku fwanina kuyowelela mu mwanya umo washizila na kuvwala bivwalo byamina. Ha kumanisha, ukaya ku kaala oku akatenda nkombela ya kuhokesha ya kukuliza na kuliyelesha niyemwine nanobo bantu.

²⁵ Pe ukahokeshela mazi a shimuna wa ntupu ya ha wubi ha kaala.

²⁶ “Mulume ou watwala mpongo wa shihingo uku fwanina kuyowesha bivwalo byendi na kuyowela oho shilolo aboke ku munkungwa.

²⁷ Nkunzi na mpongo baya batendeshiwa ku ntupu ya ha wubi, bamwine mukeza uya waletiwile mu Mwanya wa Kuyela mu kukuliza ku wubi, bakabatutwishila ha munkanda wa munkungwa na kubahokesha. Shitembe na nyama na wutoko nimwabyo bikahokeshiwe na mundilo.

²⁸ Muntu wakubihokesha uku fwanina kuyowesha bivwalo byendi na kuyowela oho shilolo aboke ku munkungwa.”

Kulama mutena wakukuliza

²⁹ “Kufundiziza oku kukalamiwenga kubikati bikeza kumbili nimwabyo. Ha mutena wa likumi wa ngonda wa mutanu na zibili ba ishalela nimwabo na mapukwenda bazika hakati kabo ba ku fwanina kuzila byakulya na kubula kutenda mulimo umo,

³⁰ Ha mutena uyo shiheka shikatendiwa sha kumi kuliza ku wubi wenu nimwawo mu kumiyelesha pe mwanga mukenge ba kuyela.

³¹ Mutena uyo ukenga mutena wakukatala, umo ou wakuzilanga kulya na kubula kutenda mulimo umo, oku kufundiziza kukalamiwenga kubikati bikeza kumbili nimwabyo.

³² Mukulwane wa bakankombela nimwabo, ou nahenguliwi na kuzilikiwa mu kushwana tatiyendi, ukatenda shiheka sha kukuliza. Ukavwala bivwalo bya mukankombela bya likwiza lya kulelema,

³³ na kutenda mu kukuliza Mwanya wa Kuyela na mwanya nimwawo wa Ntanda ya Shikungulukilo na kaala na bakankombela na bantu nimwabo ba shikungulukilo.

³⁴ Oku kufundiziza ku kalamiwenga kubikati bikeza kumbili nimwabyo. Eshe shiheka shiku fwanina kutendiwa kamo ha mwaka mu kukuliza bantu ba ishalela ku wubi wabo nimwawo.” Pe Moshesha watendele ngonehe amutongwezele Nyambi ya Ngula.