Balevi 14 - Libuka Lya Kuyela

Kuliyelesha ku wulweli wakuliyambwisha

¹ Nyambi ya Ngula wambile kuli Moshesha ngayi,

² “Kufundiziza oku kwa kuzilulula muntu unapolo ku wulweli waha shikonde wakuliyambwisha ngayi, ha mutena wakumuzilulula ukaletiwa kuli mukankombela.

³ Mukankombela ukaya ha munkanda wa munkungwa, pe uya muntu bakamutwala kuli mukankombela kuya bakamuhengola. Ndi wulweli unapolo,

⁴ pe mukankombela ukamba ngayi kukaletiwe tuyoni tubili twa kuyela, hamo na shimbimbitwa sha mutondo wa Shinda na lunyimbwa lwa kufubila na mwahi wawushe wa hishopu.

⁵ Mukankombela ukamba ngayi kayoni kamo ha tuyoni kakazihiwile ha lulonga lwa lima muli mema amawahe aku kaheloke.

⁶ Ukakwata kayoni kamina na kukazubika, hamo na mutondo wa shinda na lunyimbwa lwa kufubila na mwahi wawushe wa hishopu mu mukeza wa kayoni kaya kana zihiwi.

⁷ Ukamyanzila mukeza bikati mutanu na bibili ha muntu ou ukuzilululiwa ku wulweli wendi wakuliyambwisha, pe ukaziluluka. Ukaleha kayoni kakomi ngayi katukile mu mbuwa.

⁸ Muntu ukayowesha bivwalo byendi na ku sheha huki zendi nimwazo na ku yowela pe ukaziluluka. Ukatwesha kwingina mu munkungwa, ngoboni ukafwanina kwikala ha munkanda wa ntanda yendi matena mutanu na abili.

⁹ Ha mutena wa wu mutanu na abili ukashehiwa ku mutwe na mulevu na bikuku byendi nimwabyo na wambo waha lutu lwendi nimwawo. Ukayowesha bivwalo byendi na kuyowela, pe ukaziluluka.

¹⁰ “Ha mutena wa wu mutanu na ahatu ukaleta babikungwe babili ba bana ba bambelele na mwana mbelele wa mwaka umo wa shitole, baya bakubula muhendo, hamo na muhunga ukupimiwa makilo ahatu, waku vwela na mazi a olive na shitika sha lita sha mazi a olive.

¹¹ Mukankombela ukatwala muntu ku menginino a Ntanda ya Shikungulukilo hamo na neye nkombela.

¹² Niho mukankombela ukashimbaho umo ha babikungwe ba bana babambelele na ku mu tupula ngo ntupu ya kukuliza hamo na shitika sha lita sha mazi. Ukabiyengayengesha kwinga nkombela ya ku yengayengesha kuli Nyambi ya Ngula kwinga ya mukankombela.

¹³ Pe ukaziha mwana mbelele mu mwanya wa shizila omu bazihilanga babimuna ba zintupu zaha kuliyelesha na zintupu za kuhokesha. Uku fwanina kutenda eshe ndaba ntupu ya kukuliza ya fweka ngo ntupu yaha wubi, yikwinga ya mukankombela kami yinengi ya kuyela shikuma.

¹⁴ Mukankombela ukashimbaho mukeza umo wa mwana mbelele na ku wu yaka ku litu lyendi lya shilyo naha shala sha ku liboko lya shilyo naha linyenca lya ku liwulu lya muntu uya ukazilululiwa.

¹⁵ Niho mukankombela ukashimba mazi amo a olive na kuwayitila mu liboko lyendi mwine lya shimoho,

¹⁶ pe ukashonkamo munwe wendi waku liboko lyendi lya shilyo na ku myanzila umo kubikati mutanu na bibili kuyo ku meho a Nyambi ya Ngula.

¹⁷ Mukankombela ukashimbaho kami mazi amo aya ashala mu liboko lyendi na ku wayaka kunkumo ya litu lya shilyo naha shala sha liboko lya shilyo naku linyenca lyalinene lya ku liwulu lyendi lya shilyo hayilu ya mukeza wa ntupu ya ku yelesha.

¹⁸ Pe ukayaka mazi aya akushala mu liboko lyendi ha mutwe wa uya muntu. Mu ntendelo eye uka mu kuliza ku meho a Nyambi, pe ukaziluluka.

¹⁹ “Niho mukankombela ukakombelela ntupu ya ha wubi wa uya muntu ku mu yelesha, ha kumanisha pe ukaziha shimuna wa nkombela ya kuhokesha,

²⁰ na kuyikombelela na ntupu ya mpeka ha kaala. Muntendelo eye mukankombela uka mu kuliza, pe uya muntu ukaziluluka.

²¹ “Ndi muntu wenga waku shepwa na kubula kuwana byuma ebye, ha kulizilulula kwendi ukaleta shikungwe sha mwana mbelele umo kwinga nkombela ya kukuliza yiya yikayengayengeshiwa ya kumwambwililisha kuli Nyambi ya Ngula kwinga ya mukankombela. Ukaleta tuhu kilo yimo kami ya muhunga waku vwela na mazi a olive ha ntupu ya mpeka na shitika sha mazi a olive sha lita yimo,

²² kami ukaleta matela abili hinge bankilimba babili, umo waha ntupu ya ha wubi na wamina waha nkombela ya kuhokesha.

²³ Ha mutena wa mutanu na ahatu wakulizilulula kwendi, ukabileta kuli mukankombela ku menginino a Ntanda ya Shikungulukilo.

²⁴ Mukankombela ukashimba mwana mbelele na mazi a olive naku biyengayengesha kwinga nkombela yaku yengayengesha kuli Nyambi ya Ngula kwinga ya mukankombela.

²⁵ Ukaziha mwana mbelele naku shimbaho mukeza umo na kuwulamba kunkumo ya litu lya uya ukushinga kuyeleshiwa lya shilyo naha shala sha ku liboko lyendi lya shilyo naha linyenca lyalinene lya ku liwulu lyendi lya shilyo.

²⁶ Niho mukankombela ukayitila mazi amo mu liboko lyendi niyemwine lya shimoho,

²⁷ kami ukamyanzilaho mazi amo na munwe wendi waku liboko lyendi lya shilyo ku meho a Nyambi ya Ngula bikati mutanu na abili.

²⁸ Kami mukankombela ukayaka mazi amo ha zimbalila zimo nehe ayaka mukeza wa mwana mbelele ha nkumo ya litu lya uya ukushinga kuyeleshiwa lya shilyo naha shala sha ku liboko lyendi lya shilyo naha linyenca lyalinene lya ku liwulu lyendi lya shilyo.

²⁹ Wingi wa mazi anashala mu liboko lya mukankombela ukawayaka ha mutwe wa uya muntu uya ukushinga ku yeleshiwa, mu ntendelo eye kami ukamwambwililisha ku meho a Nyambi ya Ngula.

³⁰ Pe ukakombelela kamo ha matela hinge ha bankilimba,

³¹ kwinga ntupu ya ha wubi na yamina kwinga nkombela ya kuhokesha, hamo na ntupu ya mpeka. Muntendelo eye mukankombela uya ukushinga ku yeleshiwa ukamukuliza ku meho a Nyambi ya Ngula.”

³² Eze nizo ndayano ku muntu uli na wulweli wakuliyambwisha, ngoboni ukukwanga kuwana nkombela shiwahe yikushingiwa ha kumuzilulula.

Mbundu Mbundu ya mu matala

³³ Nyambi ya Ngula wambile kuli Moshesha na Aloni ngayi,

³⁴ “Tongweza Baishalela oho benginakale mu litunga lya Kenaani elye nikabapana kwinga likona lyabo. Ndi nikayaka wulweli wa mbundu-mbundu mu litala lya mu litunga liyo,

³⁵ pe mwine litala ukafwanina kuya na kutongwezako mukankombela ngayi, ‘Shiku moneka ngayi kuli wulweli mu litala lyami.’

³⁶ Pe mukankombela ukamba ha byuma nimwabyo bya mu litala ngayi bitutwishiwe ha munkanda oho shilolo aye na kuhengola mbundu-mbundu, ndelewa byuma nimwabyo bya mu litala bikabilikiwa ngayi binabipi. Nihoboni akaye ku litala,

³⁷ na kuhengola mbundu-mbundu. Ndi niyo yikwinga ya nkololobya hinge ya mabala a kufubila, aya aku moneka kulya limota lya litala,

³⁸ pe mukankombela ukashiya litala na kulipata matena mutanu na abili.

³⁹ Ha mutena wa mutanu na abili ukaboka na kulihengola kami. Ndi mbundu-mbundu yiya yinanenehe,

⁴⁰ mukankombela ukamba ngayi mamanya akawaniwa na mbundu-mbundu yifumishiwe na kuwayumbila ku lilala ha munkanda wa munzi.

⁴¹ Pe ukabatongweza ngayi bapale limota haya ha limota nimwalyo na kuyumbila ndoba ku lilala ha munkanda wa munzi.

⁴² Niho bakahingishamo mamanya amina akatendeshiwa kubweshelamo mu mamanya aya afumishiwa na ku mataho ngayi limota lya litala likalambululiwe.

⁴³ “Ndi oho bafumishakale mamanya na kupala limota lya litala na kuli lambulula, pe mbundu-mbundu hiyikututika kami mu litala,

⁴⁴ niho mukankombela ukaya na ku mona. Ndi mbundu-mbundu yinahanya, pe litala lika zilikiwa.

⁴⁵ Nilyo litala liku fwanina kunyemuniwa, kami mamanya walyo na bitondo na ndoba yalyo nimwabyo bishimbiwe na kubitutwishila ha munkanda wa munzi ku lilala.

⁴⁶ Muntu nimwendi ou wakwingina mu litala oho lya kupata ukabipa kukuma naku mazolo.

⁴⁷ Muntu nimwendi wakulala mu liya litala hinge ku lila mu liya litala uku fwanina kuyowesha bivwalo byendi.

⁴⁸ “Ngoboni ndi mukankombela unezi na kuhengola litala kami, mbundu-mbundu ku moneka yifwako oho litala linalambululiwi, ukazilulula litala ngayi linaziluluku, pe mukankombela ukamba ngayi, ‘Liyele.’

⁴⁹ Ha kuzilulula liya litala ukashimba tuyoni tubili na bitondo bimo bya shinda na lunyimbwa lwa kufubila na mwahi wawushe wa hishopu.

⁵⁰ Pe ha tuya tuyoni ukazihilaho kamo ha lulonga luli na mema amawahe aku kaheloke.

⁵¹ Niho ukashimba bitondo bya shinda na hishopu na lunyimbwa lwa kufubila na kayoni kakomi na kubizubika mu mukeza wa kayoni kaya kazihiwa na mema amawahe aku kaheloke. Pe ukawumyanzila ha litala bikati mutanu na bibili.

⁵² Pe niye ukazilulula liya litala na mukeza wa kayoni na mema amawahe aku kaheloke na kayoni kakomi na bitondo bya shinda na hishopu na lunyimbwa lwa kufubila.

⁵³ Niho ukaleha kayoni kakomi ngayi kafume mu lukena katukile mu mbuwa, pe ukambwililisha litala, pe nilyo likaziluluka.”

⁵⁴ Eze nizo ndayano zaha malweli akuliyambwisha nimwawo a wulweli wa luyuwila,

⁵⁵ hinge mbundu-mbundu yaha shivwalo hinge yamu litala,

⁵⁶ hinge lizimbwazimbwa, hinge wulweli wa matutwa, hinge libala.

⁵⁷ Ndayano eze ziku monesha byuma binazilikiwi oho kami binazilululiwi. Eze nizo ndayano zaha malweli akuliyambwisha nimwawo.