Balevi 13 - Libuka Lya Kuyela

Ndayano zaha malweli aha shikonde

¹ Nyambi ya Ngula wambile kuli Moshesha na Aloni ngayi,

² Oho muntu uli na shitombo ha shikonde shendi hinge linzunge, hinge ndi uli na matutwa anatutiki ha lutu hamina akufutuka kwinga wulweli wakuliyambwisha, ukaletiwa kuli mukankombela waku bana ba Aloni babalume.

³ Mukankombela ukahengola shitombo shiku moneka ku kunama kupitakana shikonde sha kunkumo, kami wambo unafutuku kutuba, niwo unengi wulweli wakuliyambwisha, pe mukankombela ukamba ngayi, “Unazilikiwi.”

⁴ Ngoboni ndi shitombo shinatubu kami ku moneka kukunama shifwako kupitakana shikonde sha kunkumo, kami wambo kufutuka kutuba ufwako, mukankombela ukabengula muntu matena mutanu na abili.

⁵ Pe mukankombela ukamuhengola kami ha mutena wa mutanu na abili, pe ndi mushihanganiko shendi shitombo shikwinga sha mushobo umo, ndi kami kututumina shifwako pe ukamubengula ha matena mutanu na abili.

⁶ Mukankombela ukafwanina kami kumuhengola ha mutena wa mutanu na abili, ndi shitombo shinatubuluku na kubula kututumina pe ukamuzilulula. Nisho shinengi tuhu shitombo. Muntu ukayowesha bivwalo byendi, pe mukankombela ukamba ngayi, “Unaziluluku.”

⁷ Ngoboni ndi shitombo shikututumina, mukankombela oho wamuhengolakale na kumutongweza ngayi, “Unazilikiwi.” Pe ukafwanina kuholoka kami kuli mukankombela.

⁸ Mukankombela ukamuhengola kami, pe ndi shinatutumini ukamba ngayi, “Unaziluluku” ndaba wunengi wulweli wakuliyambwisha.

⁹ “Muntu nimwendi uli na wulweli ha lutu wakuliyambwisha ukaletiwa kuli mukankombela,

¹⁰ pe mukankombela ukamuhengola. Ndi hali shitombo sha kutuba ha shikonde shendi eshe shikufutula wambo kutuba kami shikututumina na kuleta wufutu,

¹¹ unengi wulweli wakuliyambwisha, mukankombela ukamuzilika, kowa kami bya kumubengwila kunkumo ya munzi, ndaba mwa shikuma unazilikiwi.

¹² Ndi wulweli wa matutwa unatutiki na kufwika muntu ku mutwe na kukuma ku mawulu,

¹³ Mukankombela ukamuhengola kami, ndi ukamuwana ngayi mwa shikuma wulweli unakonkana lutu nimwalwo, ukamuzilulula uya muntu. Shikonde shendi nimwasho shinafutuku kutuba pe ukenga wa kuyela.

¹⁴ Ngoboni ndi kukupita kashikati pe shitombo hi shikututumina ha lutu lwendi pe ukazilikiwa.

¹⁵ Mukankombela ukamuhengola kami, pe ndi ukamona shitombo sha nyahamine, pe ukamuzilika kami. Shitombo sha nyahamine shi kutontolola ngayi wulweli wakuliyambwisha, pe muntu ukenga wakuzilikiwa.

¹⁶ Ngoboni ndi shitombo shinapolo pe hi shikwinga sha kutuba kami, uya muntu ukaya kuli mukankombela

¹⁷ pe niye ukamuhengola kami, ndi shitombo shikufutuka sha kutuba kami, mukankombela ngayi, ‘Unayele.’

¹⁸ “Oho muntu wekala na linzunge liya linapolo,

¹⁹ pe kami likututumina hinge libala lya kufumbuluka hi liku moneka aha hekalanga linzunge, pe ukaya kuli mukankombela.

²⁰ Mukankombela ukamuhengola, pe ndi libala liku moneka kukunama kupitakana shikonde sha kunkumo pe wambo waho unafutuku hi wakutuba pe ukamuzilika. Niwo wunengi wulweli wakuliyambwisha uya unatatikili ha linzunge.

²¹ Ngoboni, ndi mukankombela aka shihengola, ndi wambo waho kufutuka kutuba ufwako kami kwinga sha ku kunama kupitakana shikonde sha kunkumo shifwako, ngoboni libala lya kutubuluka, pe mukankombela ukamubengula matena mutanu na abili.

²² Ngoboni ndi libala likututumina, mukankombela ukamuzilika uli na wulweli.

²³ Ngoboni ndi libala likwinga lya kubula kufutuka na kubula ku tutumina, nilyo likwinga tuhu libenga lyashala ha linzunge, pe mukankombela ukamuzilulula.

²⁴ “Mu shambo sha muntu ou unahoko mundilo, ndi nyama yayibihu yikufutuka ya kutuba hinge ya kufumbuluka,

²⁵ mukankombela ukamuhengola kami, ndi wambo waha libala unafutuku wakutuba kami shiku moneka shikonde kukunama kupitakana shikonde sha hayilu, niwo unengi wulweli wakuliyambwisha uya unatatikili ha libenga, pe mukankombela uka muzilika.

²⁶ Ngoboni ndi wambo waho kufutuka ufwako kutuba kami kukunama shifwako kupitakana shikonde sha kunkumo, ngoboni libala lya kutubuluka, mukankombela ukamuhengwila kunkumo ya munzi matena mutanu na abili.

²⁷ Niho mukankombela ukamuhengola kami ha mutena wa mutanu na abili, kami ndi nisho shinatutumini niwo wunengi wulweli wakuliyambwisha, pe mukankombela ukamuzilika.

²⁸ Ngoboni ndi libala likubula kufutuka kami kututumina lifwako pe likwinga libala lya kutubuluka, nilyo linengi libenga lya mundilo tuhu linazimbishiho. Kaliha unengi wulweli wakuliyambwisha mukankombela ukamuzilulula, ndaba nilyo linengi tuhu libenga lya mundilo.

²⁹ “Oho mulume hinge mbuyama uli na wulweli ha mutwe hinge ku mumbanga,

³⁰ mukankombela ukamuhengola. Ndi ha ku moneka kukunama kupitakana shikonde sha kunkumo na huki zaho ziku moneka wuhowe na kunyata, niwo unengi wulweli waluyuwila waku mutwe hinge ku mumbanga, pe ukazilikiwa.

³¹ Pe ndi mukankombela unahengolo wulweli wa luyuwila ngayi ku moneka kukunama kupitakana shikonde sha kunkumo ufwako, ngoboni niho hashili ku moneka kubula huki za ku shipa, pe niye ukamubengula matena mutanu na abili.

³² Niho mukankombela ukahengola ha wulweli waluyuwila kami ha mutena wa mutanu na abili, kami ndi luyuwila kututumina lufwako pe kami ndi howa huki za wuhowe na kubula ku moneka kukunama kupitakana shikonde sha kunkumo,

³³ pe muntu ukatewulaho kuzingwilisha wulweli wa luyuwila. Mukankombela boni uka mu bengula matena amina mutanu na abili.

³⁴ Pe ha mutena wa mutanu na abili mukankombela ukahengola wulweli wa luyuwila kami, pe ndi luyuwila shilolo luhanye mu lutu kami lufwako hinge ku moneka kukunama kupitakana shikonde sha kunkumo, pe ukamuzilulula. Muntu ukayowesha bivwalo byendi, pe ukenga waku ziluluka.

³⁵ Ngoboni ndi wulweli wa luyuwila unahanya mulutu oho bamu zilululakale,

³⁶ pe mukankombela ukamuhengola kami. Ndi wulweli wa luyuwila una hanya mulutu, kukashingishisha kami ufwako ha huki za wuhowe, mwa shikuma muntu ukenga wakuzilikiwa.

³⁷ Ngoboni ndi mukankombela mu bihanganiko byendi ngayi wulweli wa luyuwila kuhanyina mu lutu ufwako na huki za ku shipa ziku monekaho pe wulweli wa luyuwila unapolo, pe mukankombela ukamba ngayi, ‘unaziluluku.’

³⁸ “Oho ndi mulume hinge mbuyama uli na mabala a kutuba ha shikonde,

³⁹ mukankombela uku fwanina ku muhengola uya muntu. Ndi libala likutuba tuhu ncishilile, nilyo likwinga likiki linatutiki ha shikonde, muntu ukwinga wa ku ziluluka.

⁴⁰ “Oho mulume ukupulumuka huki ku mutwe pe ha kwinga ntenda, eshe ku mwingisha wa kubula kuyela shifwako.

⁴¹ Ndi huki za muntu zi ku pulumuka ha lupala na mu mbulukutu, pe uli na ntenda yaha lupala, eshe shikamwingisha wa ku ziluluka.

⁴² Ngoboni ndi libala lya kufumbuluka liku moneka mu ntenda, nilyo linengi lya wulweli wakuliyambwisha.

⁴³ Mukankombela ukamuhengola. Ndi kuli libala lya kufumbuluka,

⁴⁴ mukankombela ukamba ngayi, ‘Unazilikiwi.’ Ndaba ya wulweli wakuliyambwisha uli ha mutwe wendi, hinge ha lupala.

⁴⁵ “Muntu uli na wulweli wakuliyambwisha uku fwanina kuvwala bivwalo bya ku taboka na kuleha huki zendi za kubula ku shakula na kufwika ku nceto ya muzulu wendi na kubilika ngayi, ‘Nazilikiwi, Nazilikiwi!’

⁴⁶ Ukazilikiwa oho ushili na wulweli, pe uku fwanina kwikala ninkayendi ha munkanda wa munkungwa.”

Ndayano za ha mankenca

⁴⁷ “Ndi ha shivwalo hali linkenca hingebene shinengi sha wushako, hinge ndi sha likwiza lyaliwahe lya kulelema,

⁴⁸ hinge ndi hambalila nimwayo ya likwiza lya kulelema hinge ndi shivwalo sha wushako, hinge ha shitembe,

⁴⁹ ndi yinengi yankololobya hinge kufubila niyo yinengi ya mbundu-mbundu yili na kuhanya yiku fwanina kutongweziwa kuli mukankombela.

⁵⁰ Mukankombela ukahengola shiya shuma na kushitenteka ha matena mutanu na abili.

⁵¹ Ukashihengola kami ha mutena wa mutanu na abili pe ndi mbundu-mbundu yinahanya pe shiya shuma shikenga sha ku zilikiwa.

⁵² Mukankombela ukashihokesha ndaba shili na wulweli wa mbundu-mbundu. Shiku fwanina kuhokeshiwa nimwasho.

⁵³ “Ngoboni oho akushihengola, mukankombela ukamba ngayi mbundu-mbundu kuhanyina ha shuma lifwako.

⁵⁴ Ukamba ngayi shiyoweshiwe na kushitenteka matena mutanu na abili amina.

⁵⁵ Niho mukankombela ukashihengola kami, pe ndi mbundu-mbundu ku futuka yifwako hinge ndi kuhanya yifwako niyo yinengi ya ku zila, uku fwanina kuhokesha shiya shuma hinge ndi mbalila ya ku bola ili kumbili hinge ndi ku mongo.

⁵⁶ Ngoboni ndi mukankombela ukushihengola kami, ku mona ndi mbundu-mbundu yina bundala ukatompolaho litengelekeza lya mbundu-mbundu ha shivwalo hinge ha shitembe.

⁵⁷ Niho ndi mbundu-mbundu yikamoneka kami na kuhanya, pe mwine washo ukashihokesha.

⁵⁸ Ndi ukuyowesha shuma pe mbundu-mbundu yikabula ku moneka, ukashiyowesha kami pe shi ka ziluluka.”

⁵⁹ Eze haya nizo ndayano zaha mbundu-mbundu ya ha bivwalo, hinge ya ha wushako, hinge ku mbalila nimwayo ya likwiza lya kulelema, hinge ha shivwalo sha wushako, hinge ha shuma sha kutunga ha shitembe. Eshe nisho eze akambe mukankombela ngayi sha ku zilika hinge ndi sha ku ziluluka.