Balevi 12 - Libuka Lya Kuyela

Kuliyelesha kwa bambuyama oho banashalaho

¹ Nyambi ya Ngula wambile kuli Moshesha ngayi,

² “Tongweza bantu ba ishalela ngayi, oho mbuyama washalahokale mwana wa mulume, ukekala wa kubula kuyela ku matena mutanu na abili, ngonehe shiya ekalanga oho unatini mundilo.

³ Ha mutena wa mutanu na ahatu kanuke akatwaliwe ku mukanda.

⁴ Niho mbuyama ukafwanina kwikala matena 33 akuliyelesha, kaliha wafwanina kukwata shuma nimwasho shinengi sha kuyela hinge kwingina mu mwanya wa kuyela, hantu shikati sha kuliyelesha shinamana.

⁵ Ngoboni ndi ukabeleka mwana wa mbuyama, niho ukenga wa kubula kuyela matena likumi na anaa, ngonehe shiya ekalanga oho unatini mundilo, pe ukafwanina kwikala matena 66 akuliyelesha.

⁶ “Oho shikati shendi sha kuliyelesha shinamana, hinge ku mwana wa mulume hinge ku mwana wa mbuyama ukaleta mwana mbelele wa mwaka umo wa nkombela ya kuhokesha na nkilimba hinge katela ka ntupu ya ha wubi ku bakankombela ku menginino a Ntanda ya Shikungulukilo.

⁷ Mukankombela ukaleta nkombela yendi kuli Nyambi ya Ngula yaku kuliza ku walakazi wendi, pe ukayela. Eshe boni, nisho aku fwanina kutenda mbuyama ha ku shalaho.

⁸ “Ndi mbuyama kukatwesha kuleta mwana mbelele ufwako, pe ukaleta matela abili hinge bana ba bankilimba babili, umo wa nkombela ya kuhokesha pe wamina wa ntupu ya ha wubi. Pe mukankombela uka mu kuliza kuwalakazi wendi, pe ukayela.”