Balevi 11 - Libuka Lya Kuyela

Batuyamana na tuyoni baya ba ku fwanina kuliwa

¹ Nyambi ya Ngula wambile kuli Moshesha na Aloni ngayi,

² “Tongwezenu bantu ba ishalela ngayi, mu kutwesha kulya batuyamana nimwabo ba hano hanci,

³ baya bali na mpazi za kulitapa, kami batafunyanga mwila naku shekula, nibo mukalyanga.

⁴ Ngoboni batuyamana ba kutafunyanga mwila naku shekula na kubula kutapuluka mpazi hinga muka balya, tuyamana aba ndaba banengi ba mazilo. Bakamela banengi bababi, ndaba batafunyanga mwila waku shekula ngoboni kutapuluka mpazi bafwako.

⁵ Masheha banengi ba mazilo kukwenu ndaba batafunyanga mwila, ngoboni kutapuluka mpazi bafwako.

⁶ Batulumba banengi ba mazilo kukwenu ndaba batafunyanga mwila waku shekula ngoboni kutapuluka mpazi bafwako.

⁷ Hinga mukalyanga bangulube, ndaba banengi bakubula kuyela, bali na mpazi za kulitapa ngoboni ku shekula bafwako.

⁸ Hinga mukalyanga aba batuyamana hinge tuhu kukwata mituntu yabo ya kufwa banengi mazilo.

⁹ “Mukutwesha kulya zinci nimwazo, eze zili na manzangulu na mayazi.

¹⁰ Ngoboni byuma nimwabyo hinge biya byekala mu mema, hinge mu mushinzi bya kubula manzangulu hinge mayazi hinga bikaliwa ndaba binengi bya wunyengwe kukwenu.

¹¹ Biku fwanina kuhanganikiwila kwinga bya wunyengwe. Kaliha mu ku fwanina kubilya hinge kukwata mituntu yabyo ya kufwa.

¹² Kaliha mu ku fwanina kulya byuma nimwabyo byekala mu mema kami bya kubula manzangulu hinge mayazi. Binengi bya wunyengwe kukwenu.

¹³ “Kaliha mu ku fwanina kulya tumo ha notwe tuyoni, tunengi twa wunyengwe hakati ka tuyoni. Hinga mukalya bangonga, hinge makubi, hinge milombwe,

¹⁴ hinge bipungu, hinge binkwehe na mishobo yabo nimwayo,

¹⁵ hinge makwangala na mishobo yabo nimwayo,

¹⁶ hinge bayimpye, hinge makungulu, hinge bankwanyi na tunkozi na mishobo yabo nimwayo.

¹⁷ Hinge makwika, hinge ba minkumbiti, hinge makungulu,

¹⁸ hinge byoyo, hinge mapanza, hinge mashambankozi,

¹⁹ hinge tunyange, hinge ba mpombo na mishobo yabo nimwayo. Hinge bamfwekeshe na ba milima.

²⁰ “Tulongolo nimwato twa mbando tuya twendanga na mawulu anaa tunengi twa wunyengwe kukwenu.

²¹ Mukalyanga tulongolo tuli na mbando tuya tukwenda na mawulu anaa, tuya twambotozokanga,

²² mukalyanga mikumbi na mishobo yayo nimwayo na manzenze na mishobo yawo nimwayo, hinge bambimba na mishobo yabo nimwayo na mabongolo na mishobo yabo nimwayo.

²³ Ngoboni byuma nimwabyo byabishebishe biya bili na mbando kami bili na kulikoka hanci biku fwanina kuhanganikiwila kwinga bya wunyengwe.

²⁴ “Nimwendi ou ukakwata ku mituntu ya byuma ebye ukenga wakubula kuyela kukuma naku mazolo.

²⁵ Muntu nimwendi ou ukashimba mituntu yatwo ukafwanina kukayowesha bivwalo byendi ngoboni ushili wakubula kuyela kukuma naku mazolo.

²⁶ Batuyamana nimwabo ba kutapuluka mpazi, ngoboni mpazi zabo zabula kulitapulula habili kami kaliha batafunyanga mwila waku shekula banengi bakubula kuyela kukwenu.

²⁷ Kami tunzama nimwato twa mafumbo twa mawulu anaa tunengi twa kubula kuyela kukwenu. Nimwendi ou ukakwata ku mituntu yatwo ya kufwa ukenga wakubula kuyela kukuma naku mazolo.

²⁸ Pe nimwendi ou ukashimba mituntu yatwo ya kufwa uku fwanina kukayowesha bivwalo byendi, ngoboni ushili kwinga wakubula kuyela kukuma naku mazolo. Tunzama tuya tunengi twa kubula kuyela kukwenu.

²⁹ “Kutuyamana nimwato twa hanci twa mazilo kukwenu hakati ka byuma bya kukalaba, banengi bampumba na bampuku na batungongwe, hinge miholobozi

³⁰ na bikubiku na mikuma na byolobyomba na mibulu na bandongono.

³¹ Ebye binengi bya kubula kuyela kukwenu hakati ka byuma nimwabyo bya kukalaba. Nimwendi ou ukabikwata oho binafu, ukenga wakubula kuyela kukuma naku mazolo.

³² Kami ndi mituntu yabyo yinawili ha shuma shinge shumangani hinge shumangani pe shikenga sha kubula kuyela. Eshe shikwinga tuhu ku shuma sha bitondo, hinge likwiza hinge shitumba hinge mpamba, howa ndaba hinge ndi bashitendeshanga bishini. Shikazubikiwa mu mema, ngoboni shikekala sha kubula kuyela kukuma naku mazolo, niho shikenga sha kuyela.

³³ Kami ndi mituntu yabyo yinawili mu nyungu ya lima, pe byuma nimwabyo biya bilimo bikenga bya kubula kuyela, pe mu ku fwanina kupabula nyungu.

³⁴ Kami hinge byakulya ngani biya bikatwesheka ku liwa, ngoboni mema a muya mu nyungu ndi akunungululiwa, pe byakulya biya bikabula kuyela kami shinge shumangani hinge shumangani sha kunwiwa shili mu nyungu eye shinengi sha kubula kuyela.

³⁵ Ha byuma nimwabyo ebye hakawila mituntu yabyo ya kufwa bikenga bya kubula kuyela. Kavulu ka lima hinge kavulu tuhu bikapabozoliwa ndaba binabulu kuyela bikenga bya kubula kuyela kukwenu.

³⁶ Ngoboni kaheloke hinge shikongelo sha mema bikekala bya kuyela, hinge noho shinge shumangani shashenge shiya shika kwata mituntu yabyo ya kufwa shikenga sha kubula kuyela.

³⁷ Ndi mituntu hakati kayo umo ukawila ha mbuto yiya yikakuniwa, pe mbuto yikenga ya kuyela.

³⁸ Ngoboni ndi mbuto yinazabikiwi mu mema kami ndi umo mutuntu hakati kayo ukawilaho, pe mbuto yikenga ya kubula kuyela kukwenu.

³⁹ “Pe ndi uya kayamana balyanga unafu, muntu nimwendi ukamukwata ukenga wakubula kuyela kukuma naku mazolo.

⁴⁰ Muntu nimwendi ukalya shituntula sha uya kayamana wakulifwila, uku fwanina kuyowesha bivwalo byendi, ngoboni ushili kwinga wakubula kuyela kukuma naku mazolo. Ndi muntu ukashimba mutuntu wa muntu kufwa ukafwanina kuyowesha bivwalo byendi, ngoboni ukenga wakubula kuyela kukuma naku mazolo.

⁴¹ “Kaliha mu ku fwanina kulya kenge kayamana ngani hinge kayamana nimwendi wamushe uya ukukalaba hanci, wunengi wa wunyengwe,

⁴² hinge ndi walikokanga hanci na livumo lyendi, hinge wendanga na mawulu anaa, hinge wekala na mawulu amengi.

⁴³ Hinga muli bipisha enu bamwine ha byuma ebye bya kukalaba.

⁴⁴ Ami Nyambi ya Ngula, Nyambi yenu, pe mu ku fwanina kulilama kwinga ba kuyela, ndaba Ami nengi wa kuyela hinga muli bipisha enu bamwine.

⁴⁵ Ami Nyambi ya Ngula, ou wamifumishile mu Engepita ngayi mwanga nitweshe kwinga Nyambi yenu. Mu ku fwanina kwinga ba kuyela ndaba Ami nenga wa kuyela.”

⁴⁶ Eze haya nizo ndayano ha tuyamana naha tuyoni naha byuma nimwabyo biya byekalanga mu mema, hinge bya kukalaba hanci.

⁴⁷ Mu ku fwanina kwinga ba kukeya mu kutapulula mukati ka nebye bya kuyela na nebye bya kubula kuyela na mukati ka tuyamana tuya twa ku fwanina kulya na tuyamana twa kubula kulya.