Balevi 10 - Libuka Lya Kuyela

Kubipisha kwa Nandabe na Ambihu

¹ Bana ba Aloni ba Nandabi na Ambihu, muntu na muntu washimbile shinzoyo shendi sha ku kalila mundilo, bakalilileho mashanga a mundilo, bafungilileho incence pe bayitwalile kuli Nyambi ya Ngula. Ngoboni ou mundilo kaliha wengile wakuzila, ndaba Nyambi ya Ngula kaliha wabatongwezele kuwu leta.

² Pe babazumukile tuhu Nyambi ya Ngula watumakale mundilo wabahokeshele na kubazihila kuyo ku meho a Nyambi ya Ngula.

³ Niho Moshesha ambile kuli Aloni ngayi, “Eshe nisho ambilenga Nyambi ya Ngula oho ambile ngayi, ‘Nimwabo aba ba kundemesha ba ku fwanina kulemeeka kuyela kwami kwa kuyelelela, nikaholola wuwahe wami ku bantu bami, ngoboni Aloni wamwenene nee.’ ”

⁴ Moshesha wehanine ba Mishayela na Elizafwani, bana ba Uziyelu babalume, kanyantu ka Aloni pe wambile kukwabo ngayi, “Yekenu kuno mushimbe mituntu ya bawushindawenu muyifumishe kumbili ya Ntanda ya shizila pe muyitutwishile ha munkanda wa munkungwa.”

⁵ Nohobene bezile pe babakatwile hinga bavwala bivwalo byabo bya mukankombela pe babatutwishile ha munkanda wamunkungwa, ngonehe eshe abatongwezele Moshesha.

⁶ Niho Moshesha atongwezele Aloni na bana bendi ba Eliza na Itama ngayi, “Shakulenu huki zenu kami hinga mutabula bivwalo byenu kulimonekesha ngayi muli ha malila. Ndi mukutenda noho pe mu kufwa, kami Nyambi ya Ngula ukapilamina shikungulukilo nimwasho. Ngoboni bawushindawenu na bantu nimwabo Baishalela banetabilishiwi kulila lufu luno lu nalete mundilo wakuli Nyambi ya Ngula.

⁷ Hinga mufuma ku menginino a Ntanda ya Shikungulukilo kutina mufwa, ndaba munazilikiwi na kuwabishiwa na mazi a Nyambi ya Ngula.” Batendele ngonehe abatongwezele Moshesha.

Kufundiziziwa kwa Bakankombela

⁸ Nyambi ya Ngula watongwezele Aloni ngayi,

⁹ “Obe na bana bobe hinga mukanwa waine hinge mukuku, oho mukengina mu Ntanda ya Shikungulukilo, kutina mukafwa. Oku kunengi kufundiziza mukalamanga ku bihemwinino byenu nimwabyo.

¹⁰ Mu ku fwanina kutapulula mukati ka nebye binengi bya Nyambi na nebye mu kutendesha nahiya, kami mukati ka byuma bya kuyela na nebye bya kubula kuyela.

¹¹ Kami mu ku fwanina ku longesha bantu ba Ishalela kufundiziza nimwako oku namitongwezele kupitila muli Moshesha.”

¹² Moshesha watongwezele Aloni na bana bendi babili bashalileho, ba Eliza na Itama ngayi, “Shimbenu ntupu ya mpeka yiya yina shala ha ntupu ya byakulya ya kuhokesha na mundilo kuli Nyambi ya Ngula mu yilye ya kubula kuvuba na mumena, pe muyilile ku nciza ya kaala ndaba eye ntupu yinengi ya kuyela shikuma.

¹³ Muyilile mumwanya wa kuyela, ndaba shinengi shitapilo shobe na bana bobe babalume yaku ntupu ya byakulya ya kuhokesha na mundilo kuli Nyambi ya Ngula. Eshe nisho andayelele Nyambi ya Ngula.

¹⁴ Ngoboni obe na ba lupashi lyobe mwanga mukalye kapumpo kaya kakuyengayengesha na bilama biya binaletiwi kwinga nkombela kuli Nyambi ya Ngula ya bakankombela. Mwanga mukayilile mu mwanya nimwawo wa kuyela. Eye nkombela yina panikiwi kukwenu naku bana benu babalume naku bana benu ba bambuyama kwinga shitapilo shenu sha ku zinkombela za kulilumikila za ku bantu ba Ishalela.

¹⁵ Shilama sha nkombela na kapumpo kaya kakuyengayengesha bikaletiwa hamo na bimamo bya mazi bya kuhokesha na mundilo, bikayengayengishiwa kwinga nkombela ya kuyengayengesha kuli Nyambi ya Ngula. Ebye bimamo binengi byenu na bana benu mwaya myaka, ngonehe alayelele Nyambi ya Ngula.”

¹⁶ Oho Moshesha epwile ha mpongo wa ntupu ya ha wubi, pe wamonene unahokeshiwi. Wapilaminine bana ba Aloni bashalileho, ba Eliza na Itama haneshe.

¹⁷ Wepwile ngayi, “Shumangani mwabula kulya ntupu ya ha wubi mu mwanya wa kuyela? Niyo yinengi ya kuyela shikuma, kami Nyambi ya Ngula unamipanayo ngayi mulye, ngayi mwanga mushimbe wubi wa bantu nimwabo ngayi muka ba kulize ku wubi wabo.

¹⁸ Aha mu kubula kuleta mukeza wendi mu Ntanda ya kuyela, mwafwanina kulila nkombela kuyo ngonehe namitongwezele.”

¹⁹ Pe Aloni wakumbwile Moshesha ngayi, “Hayabo ndi shinga ngayi lelo nalya ku ntupu ya ha wubi? Shinga shiya shinawahililishi Nyambi ya Ngula ndi? Bantu banalete zinkombela zabo lelo zaha wubi kuli Nyambi ya Ngula, pe banalete kami zinkombela zabo za kuhokesha, ngoboni nihano byuma ebye binaholoko kukwami.”

²⁰ Moshesha oho ayuvwile eshe, pe wetabilile.