Balevi 1 - Libuka Lya Kuyela

Zinkombela za ku fwanina kuhokesha za nzimba

¹ Nyambi ya Ngula niho ehanine Moshesha, wambile kukwendi kufuminina mu Ntanda ya Kuliwanina ngayi,

² “Tongweza Baishalela ngayi, oho muntu hakati kenu akupana ntupu kuli Nyambi ya Ngula, wafwanina kupanika kufuminina ku bimuna alinabyo nehe ku zingombe na bambelele.

³ “Muntu nimwendi ukutupula nkombela ya shimuna, wafwanina kutupula nkunzi wakubula muhendo. Uku fwanina kumuleta ku menginino a Ntanda ya Kuliwanina, ngayi atambuliwe ku meho a Nyambi ya Ngula.

⁴ Pe akayake liboko lyendi hayilu ya mutwe wa nou nkunzi, yikenga nkombela ya ku mu kuliza.

⁵ “Niho akazihe uya nkunzi ya nkombela ku meho a Nyambi ya Ngula, niho bakankombela bana ba Aloni bakashimba mukeza na kuyitila uya mukeza kuzingwilisha kaala kali ku shipana sha Ntanda ya kuliwanina.

⁶ Niho ukayuba uya kayamana na kumuketozola kutenda bituntula.

⁷ Pe bakankombela bana ba Aloni bakawahisha nkuni na kuyibika mundilo.

⁸ Niho bakankombela bana ba Aloni bakayaka biya bituntula na mutwe, hamo na mazi, babiyake ha nkuni za mundilo zili ha kaala ka mamanya.

⁹ Ngoboni bayoweshe bya mu livumo na mawulu a kayamana na mema. Mukankombela ukahokesha nimwabyo ha kaala, kwinga nkombela ya kuhokesha, ntupu ya kutupula ha mundilo, livumba lya neye nkombela likuwahililisha shikuma Nyambi ya Ngula.

¹⁰ “Ndi ntupu yendi yikafuma ku litanga lya bambelele hinge ku bampongo, wafwanina kutupula shikungwe wakubula muhendo.

¹¹ Akamuzihile ku ncelele ya kaala ku meho a Nyambi ya Ngula na bakankombela bana ba Aloni bakayitila mukeza kuzingwilisha kaala.

¹² Muntu ukaziha kayamana, ukamuketula bituntula na mutwe wendi na mazi wendi, pe mukankombela ukabiyaka ha nkuni zili ha kaala.

¹³ Pe bya mukati na mawulu bakabiyoweshe na mema. Pe mukankombela ukatupula nimwabyo na kubiyoha ha kaala, yikenga nkombela ya kuhokesha, nkombela ya ha mundilo, likututwitisha livumba lyaliwahe kuli Nyambi ya Ngula.

¹⁴ “Ndi ntupu yendi kuli Nyambi ya Ngula inengi nkombela ya kuhokesha tuyoni, pe uku fwanina kukombelela nkombela ya katela hinge nkilimba.

¹⁵ Niho mukankombela uku fwanina kutuleta ku kaala naku tukondolola mukoshi na kutu yoha ha kaala, mukeza wato ukayitiwila kunkumo ya kaala.

¹⁶ Mukankombela ukafumisha lihakwilo na mahako wato na kubiyumbila ku mushamuko wa kaala, ku mwanya wa mutoko.

¹⁷ Ukakakwata ku mbando zako na kukatabula hakati kwakubula kukacancozola nimwako. Pe mukankombela ukakahokesha ha kaala, ha mundilo uli ha nkuni, yinengi ntupu ya kuhokesha ha mundilo, yikututwisha livumba lyaliwahe kuli Nyambi ya Ngula.”