Bakakuyata 9 - Libuka Lya Kuyela

Ambimeleki

¹ Ambimeleki mwana Yelumbaalu wayile ku munzi wa Shekemu oku kwekalilenga bawushinda wa mandiyendi nimwabo. Pe wabatongwezele ngayi,

² “Yenu mukahonge balume nimwabo ba ku Shekemu ngayi, ‘Kati shiti eshe mukushinga? Kuleliwa na bana nimwabo 70, hinge ndi kuleliwa tuhu ku muntu umo.’ Anukenu ngayi Ambimeleki nanenu wenga mukeza umo.”

³ Bawushinda wa mandiyendi bamwambilileko ku bantu ba ku Shekemu haneshe. Bahanganikile kukonka Ambimeleki ndaba wenga kawushinda wabo.

⁴ Bamupanine muwayawaya 70 wa shiliva wafumine ku litala lya Mbaalu Mbeliti na mali awa atambwilenga. Ambimeleki watapishilile bihulahuli byowa ngayi bamukonke.

⁵ Wayile ku litala lya tatiyendi ku Ofwila, wakazihilile bakonzobendi ha limanya, bana ba Yelumbaalu ba balume 70 ha shikati shimo. Ngoboni Yotamu mwana Yelumbaalu wa mulume wa kanuke, waholamine, pe wabulile kuzihiwa.

⁶ Niho bantu nimwabo ba ku Shekemu nanaba ba ku Mbetimilo baliwanine hamo, kami bayile ku mutondo wakutulila wa Oka ku Shekemu, oku bakakwatilile Ambimeleki kumwinga mwene.

⁷ Oho Yotamu ayuvwile ha shuma eshe, wayile pe wemanine hayilu ya lipili lya Ngelizima, pe wabilikizile kukwabo ngayi, “Yuvwililenu kukwami enu bantu ba ku Shekemu, pe Nyambi mwanga ayuvwilile kukwenu.

⁸ Kwekalile shikati shimo mitondo yakungulukile hamo na kulihatila mwene niyoyine. Byambile ku mutondo wa olive ngayi, ‘Winge mwene yetu.’

⁹ Mutondo wa olive wambile ngayi, ‘Ndi mukushinga ami ngayi mwanga nimilele, ndele nilehe kututwishanga mazi wami, awa aletanga maleema ku banyambi naku bantu.’

¹⁰ Niho mitondo yambile ku mutondo wa mukuyu ngayi, ‘Yeka winge mwene yetu.’

¹¹ Ngoboni mutondo wa mukuyu wakumbwile ngayi, ‘Ndi mukushinga ami ngayi mwanga nimilele, ndele nilehe kututwisha mikabo yami yayiwahe yayitobe.’

¹² Nohobene mitondo haya yambile ku mukolobozi wa shinyanca ngayi, ‘Yeka mukwinga mwene yetu.’

¹³ Ngoboni mukolobozi wa shinyanca wakumbwile ngayi, ‘Ndi mukushinga ami ngayi mwanga nimilele, ndele nilehe kututwisha waine yami, aya aleteshanga banyambi na bantu ngayi bakeyuke.’

¹⁴ Niho mitondo nimwayo yambile ku lipukumuna lya mukona ngayi, ‘Obe yeka mukwinga mwene yetu.’

¹⁵ Lipukumuna lya mukona lya kumbwile ngayi, ‘Ndi mwa shikuma mukushinga kunyingisha mwene yenu, niho yekenu muholame mu mubombola wami. Ndi mu kukana, pe mundilo ukayanduka ha myahi yami ya mapukumuna a muhengela na kuhokesha mitondo ya shinda yamu Lembanoni.’ ”

¹⁶ Yotamu wambile kami ngayi, “Hayaboni, mwa shikuma mwengile na maleema na kwoloka oho mwakwata Ambimeleki ngayi enge mwene ndi? Kati mwaleemekele shanukilo sha Yelumbaalu na kwinga ku ba lupashi lwendi shiwahe, ngonehi eshe yekalile ntendelo yendi ndi?

¹⁷ Anukenu ngayi tate wamilwililile. Wayakile wumi wendi mu malamo mu kumilamwina ku Bamindiyani.

¹⁸ Ngoboni lelo munafutulukili ba lupashi lwa tate. Mwaziha bana bendi babalume 70 ha limanya hashikati shimo, bishini mwatendela noho, ndaba ngayi mwanendi Ambimeleki, wakubelekela ku mukamulimo wendi wa mushimbi nengi kawushinda wenu, munamukwata kwinga mwene waku Shekemu.

¹⁹ Hayaboni, ndi ebye munatende kuli Yelumbaalu na ba lupashi lwendi lelo binengi byakwoloka na maleema, pe wahililenu muli Ambimeleki, pe kami niye awahililenga mumwenu.

²⁰ Ngoboni ndi kaliha noho, mwanga mundilo uyanduke kuli Ambimeleki na kuhokesha bantu ba ku Shekemu naku Mbetimilo. Mwanga mundilo uyanduke ku bantu ba ku Shekemu naku Mbetimilo na kuhokesha Ambimeleki.”

²¹ Niho Yotamu wetukilile mukwikala ku Mbeeli, ndaba watinine yayiyendi Ambimeleki.

²² Ambimeleki walelele Ishalela myaka yihatu.

²³ Niho Nyambi atendele Ambimeleki na bantu ba ku Shekemu kwikala na mitima ya kulizimba umo na wamina, pe bantu ba ku Shekemu bafutulukilile mu kulwisha Ambimeleki.

²⁴ Eshe shamonekele noho ngayi, mwanga Ambimeleki na bantu ba ku Shekemu aba bamushumishilenga ku ziha bana ba Yelumbaalu babalume 70, mwanga bayumbe mulandu wabo.

²⁵ Bantu ba ku Shekemu bayakile bantu mu kubelamina Ambimeleki hayilu ya mapili, pe bapukwilenga bantu nimwabo aba bapitilenga iyo nzila. Ambimeleki bamutongwezele haneshe.

²⁶ Niho Ngaalu, mwana Embendi wa mulume, wezile hamo na bawushinda wendi ku Shekemu, pe bantu ba ku Shekemu bamukulupilile.

²⁷ Nimwabo bayile mu mafuba wabo a shinyanca na kubuya mikabo ya shinyanca bazongeleko waine, pe bapingile shimbo. Bayile mu litala lya nyambi yabo, omu balililile na kunwinamo, kami bahandwilenga Ambimeleki.

²⁸ Ngaalu mwana Embendi wambile ngayi, “Kati tunengi bantu ba mushobo ngani muno mu Shekemu? Shumangani kati eshe tukutendela milimo Ambimeleki? Kami ou nengi yani? Nengi mwana Yelumbaalu! Pe Zembula ukutambula ndayano kukwendi, ngoboni shumangani tukumutendela milimo? Mwinge tuhu bakulunga kuli nkaka yenu Hamole, ou watutwishile mukoka wenu!

²⁹ Shinga ngayi ami nengi mukakutwaminina aba bantu! Shinga na kwata Ambimeleki! Shinga namutongweze ngayi, ‘Loba na kukunkakanya nzita yobe, pe wize tulwe!’ ”

³⁰ Zembula kalela wamu munzi, wapilamine oho ayuvwile ebye ambile Ngaalu mwana Embendi.

³¹ Watumine ntumwana kuli Ambimeleki ku Aluma na kumutongweza ngayi, “Mona, Ngaalu mwana Embendi na bawushinda wendi banezi ku Shekemu, kukwitabilisha kwingina mu munzi bafwako.

³² Nohobene, obe na bantu bobe mu ku fwanina kuya wushiku, pe mukaholame mu mafuba.

³³ Mwakapinduka nzona lumenemene ha kututika kwa mutena, pe muka balwishe na kubabazumuna mu lukena. Niho Ngaalu na bantu bendi bakatutika kwiza mu kumilwisha, kabatendenu mwomu mu kutweshela!”

³⁴ Nohobene Ambimeleki na bantu bendi nimwabo bayile wushiku, pe baholamine ha munkanda wa Shekemu mu tunzunga tunaa.

³⁵ Oho Ambimeleki na bantu bendi bamonene Ngaalu mwana Embendi ha tutikila ha munkanda na kwimana ku shipana sha lukena, niye na bantu bendi baholomokele mu myanya omu baholaminenga.

³⁶ Oho Ngaalu abamonene wambile kuli Zembula ngayi, “Mona! Kuli bantu bali na kukunkuluka hayilu ya mapili!” Zembula wakumbwile ngayi, “Obyo bikwinga mimvulu yaha mapili, kaliha bantu.”

³⁷ Ngaalu wambile kami ngayi, “Tilamina! Kuli bantu ba kukunkuluka ku lipili, pe likunge limo likwizilila ku mutondo wa Oka wakutulila bakakwawula!”

³⁸ Niho Zembula ambile kukwendi ngayi, “Haya biya wonzela kubwaya bili kuti? Nka obe muntu uya wepwilenga ngayi kati shumangani eshe tukutendelanga milimo ou muntu Ambimeleki. Aba banengi bantu baya wahandwilenga. Tutika haya uyenga na kubalwisha.”

³⁹ Ngaalu watwamikile bantu ba ku Shekemu, pe balwishile Ambimeleki.

⁴⁰ Niho Ambimeleki amutandile, pe Ngaalu watinine, wingi wabo balemanine na kukuma ku shipana sha munzi,

⁴¹ Ambimeleki wabokele ku Aluma, pe Zembula watandile Ngaalu na bawushinda wendi, nohobene kaliha batweshele kuzika kami ku Shekemu.

⁴² Oho kwashile Ambimeleki wawanine ngayi bantu ba ku Shekemu bekala na kuyongola kuya ku mafuba.

⁴³ Nohobene washimbile bantu bendi wabatapulwile mu tunzunga tuhatu, pe baholamine mu mafuba na kubabelamina. Oho amonene bantu hibeza na kututika mu munzi, waholomokele oku aholamine mu kubaziha.

⁴⁴ Shikati osho Ambimeleki na likunge lyendi banyankupilile kumbili na kulama ku shipana sha munzi, matanga amina abili alwishile bantu mu mafuba pe babazihile nimwabo.

⁴⁵ Ngunga yatwalilileho mutena nimwawo. Ambimeleki wapukwile munzi kami wazihile bantu bamo, wanyemwine. Niho akubile mushele hanci.

⁴⁶ Oho bakakutwaminina ba ku Shekemu bayuvwile haneshe, bayile ku linkwina lya ku litala lya Eli Mbeliti.

⁴⁷ Ambimeleki bamutongwezele ngayi banakungulukili kuyo.

⁴⁸ Nohobene Ambimeleki wayile na kukankalala ku lipili lya Zalumoni na bantu bendi. Kuyo washimbile kazembe na kuketwisha mwahi wa mutondo, pe wawuyakile ha shifuzi shendi. Watongwezele bantu bendi kutenda ngonehi shiya anatende.

⁴⁹ Nohobene balume nimwabo batemene myahi ya mutondo, niho bakonkele Ambimeleki na kuyibungika ku linkwina. Bahokeshele mundilo na bantu hinga bekala mukati, pe bantu nimwabo ba ku linkwina lya ku Shekemu bafwile. Bengile 1,000 balume na bambuyama.

⁵⁰ Niho Ambimeleki ayile ku Tembezi, wazingulukile uya munzi, pe balupukwile.

⁵¹ Kuyo kwekalile kapeshi kakushuma, pe balume nimwabo, hamo na bambuyama nimwabo mu munzi, kufungilako na bakakutwaminina, betukilileko. Balipatilililemo nibo bamwine, pe bakandamine ha shiluli.

⁵² Oho Ambimeleki ezile na kulwisha kembi, wakandamine ku shihala mu kuhokesha kapeshi.

⁵³ Ngoboni mbuyama wandumwinine limanya lya kupelela ha mutwe wendi pe lyacancwele kangawe Ambimeleki.

⁵⁴ Niho anyankupile kwihana ndumbana ou washimbilenga bilwisho byendi, pe wamutongwezele ngayi, “Homona mukwale wobe pe unzihilile. Nifwako kushinga kwambiwe ngayi nanzihi mbuyama.” Nohobene ndumbana wamuzihilililile.

⁵⁵ Oho Baishalela bamonene ngayi Ambimeleki unafu, nimwabo bayile kukwabo.

⁵⁶ Nohobene mu nzila eye Nyambi wayumbilile Ambimeleki ha mulandu ou atendele kuli tatiyendi ha kuziha bakonzobendi 70.

⁵⁷ Nyambi kami wayandishile bantu ba ku Shekemu ha wubi wabo ngonehe ambile Yotamu mwana Yelumbaalu ngayi, nisho bakenga ngonehe aba kutile.