Bakakuyata 8 - Libuka Lya Kuyela

Kukomiwa kwa Bamindiyani kwamamanishililo

¹ Bantu ba Efulemu bambile kuli Ngindiyoni ngayi, “Shumangani kati eshe wabulila kutwihana oho wayanga na kulwisha Bamindiyani? Shumangani kati eshe ukutwingilanga nehe?” Balihohomene shikuma ha shambo eshe.

² Ambiyeza wabatongwezele ngayi, “Eshe natenda ami shashishe, kufwanikiza naneshe munatende enu shifwako. Hinge ku shashishe shiya bantu ba Efulemu mwatendele shinengi shashinene kupitakana nimwabyo biya batendele bamu livumo lyami.

³ Nyambi wamipanine bamyene ba Bamindiyani, Olembu na Zeembu. Ami natenda bishini bya kufwanikiza na biya mwatendele?” Oho ambile eshe, pe kaliha bapilamine kami.

⁴ Ngindiyoni na bantu bendi 300 ku shikati eshe bakumine ku mishinzi wa Yondana kami oho bazabukile. Hinge ngayi bakwangile shikuma ngoboni batwalilileho kutanda bamalamo babo.

⁵ Oho bakumine ku Shukota, Ngindiyoni wambile ku bantu ba ku munzi wa Shukota ngayi, “Enu bahekulyami penuko bantu bami mankende. Banakwanga bali na nzala, pe nili na kutanda Zemba na Zalimuna, bamyene ba Bamindiyani.”

⁶ Ngoboni bakakutwaminina ba ku Shukota bambile ngayi, “Shumangani kati tukupanikila banzita bobe byakulya? Shilolo ukwate Zemba na Zalimuna.”

⁷ Nohobene Ngindiyoni wambile ngayi, “Nimwamo mwamuwahe! Oho Nyambi ya Ngula akampanika Zemba na Zalimuna, nikamikamisha mihengela na mitwampuku yamu libelelengwa!”

⁸ Ngindiyoni wayile kuli Penuwele, pe wakanyepele kami shuma shimo ku bantu ngoboni bantu ba Peniwele bakumbwile nkumbwile yimo ngonehe bantu ba ku Shukota.

⁹ Nohobene Ngindiyoni wambile kukwabo ngayi, “Oho nikabokamo shiwahe, ndi shikenga noho, pe nikanyemwina hanci aka kapeshi!”

¹⁰ Zemba na Zalimuna bekalile ku Kalikola hamo na nzita yabo. Ha nzita nimwayo ya mishobo ya bantu ba ku mushamuko bamu libelelengwa ya kumine ha 15,000 bashalileho, pe 120,000 ya banzita bazihiwile.

¹¹ Ngindiyoni wayile mu nzila yaku nkumo ya libelelengwa, ku mushamuko wa Nombahi naku Yongimbeha na kulwisha banzita kubabazumuna.

¹² Bamyene babili ba Bamindiyani, Zemba na Zalimuna, betukile, ngoboni wabatandile na kubakwata. Washandwele banzita babo nimwabo.

¹³ Ngindiyoni mwana Yowashi oho abokelenga, kufuma mu kulwa wapitile nzila yaku Heleshi.

¹⁴ Wakwatile ndumbana waku Shukota pe wamwipwizizile. Ndumbana watikitilile Ngindiyoni mazina a babilolo na bakulwane 77 ba ku Shukota.

¹⁵ Niho Ngindiyoni ayile kubantu ba ku Shukota pe wambile ngayi, “Anukenu oho mwakanine kunyavwa? Mwambile ngayi kutwesha mufwako kupana byakulya ku banzita bami bakwangile na nzala ndaba ngayi nabulile kukwata Zemba na Zalimuna. Shashiwahe bano nabaletakale!”

¹⁶ Niho ashimbile mihengela na mitwampuku kushushula bakakutwaminina ba ku Shukota.

¹⁷ Pe kami watungwile kapeshi kaku Penuwele pe wazihile bantu ba munzi uyo.

¹⁸ Niho Ngindiyoni epwile Zemba na Zalimuna ngayi, “Balikuti aba bantu mwazihile ku Tambola?” Bakumbwile ngayi, “Balifwekele na nobe. Bantu nimwabo bakufweka ngonehe mwana mwene wa mulemu.”

¹⁹ Ngindiyoni wambile ngayi, “Bengile bakonzobami babalume, bana ba bamawa ba kumbeleka. Nili na kulibeza ku meho a Nyambi ya Ngula ngayi, shinga kaliha mwabazihile shinga kami kukamiziha nifwako.”

²⁰ Wambile kuli Yeta mwanendi wa mweli ngayi, “Katuka ubazihe.” Ngoboni ndumbana wabulile kuhomona mukwale wendi. Washintazalile, ndaba oho niye ushili ndumbana.

²¹ Ngoboni Zemba na Zalimuna bambile kuli Ngindiyoni ngayi, “Yekanga bene obe utuzihe. Ndaba eshe ekala muntu na nyala zendi niho za kuma.” Nohobene Ngindiyoni wazihile Zemba na Zalimuna, pe washimbile bya kuliyenga biya byekalilenga mu zincingo za makamela wabo.

²² Kufuma hayo, bantu ba Ishalela bambile kuli Ngindiyoni ngayi, “Winge kalela wetu, obe na bazukulyobe ba kumbili. Ndaba unatupulwishi ku Bamindiyani.”

²³ Ngindiyoni wakumbwile ngayi, “Kukenga kalela wenu nifwako, hinge mwanami. Nyambi ya Ngula ukenga kalela wenu.”

²⁴ Ngoboni Ngindiyoni wazaminine kwamba ngayi, “Ndehenu nipule shuma shimo kukwenu. Bantu nimwabo kukwenu bampane mankunda aku matu owo mwashimbilenga.” (Bamindiyani bavwalilenga mankunda a ngolinde ku matu, ngonehe baka ishimaele.)

²⁵ Baishalela bakumbwile ngayi, “Tukawahilila shikuma kukupanikawo.” Bayalile likwiza hanci, pe bantu nimwabo balubwile mankunda aku matu aya bashimbile.

²⁶ Mankunda aku matu a ngolinde aya ashimbile Ngindiyoni wafwanikiziwilewo kwinga wulemu wa makilongilamu makumi abili. Eshe kaliha kuyakako bya kuliyenga mikali yamu zincingo na makwiza akufumbuluka aya bavwalilenga bamyene ba ku Mindiyani, hinge bikongo biya byekalilenga mu zincingo za bakamela babo.

²⁷ Ngindiyoni watendele kanankishi ha ngolinde, pe wakayakile mu munzi wendi wa Ofwila. Baishalela nimwabo bengile bakubula kwoloka pe bayilengako na kukalemesha. Nisho shengile ngonehe kanyimbwa kuli Ngindiyoni na ba lupashi lwendi.

²⁸ Mindiyani wakomiwile ku Baishalela, kaliha batinishiwile kami. Litunga lyekalile mu ku mwena myaka makumi anaa, kutwala ku kufwa kwa Ngindiyoni.

Lufu lwa Ngindiyoni

²⁹ Yelumbaalu mwana Yowashi wabokele kukwabo na kwikala mu litala lyendi.

³⁰ Ngindiyoni wekalile na bana babalume makumi mutanu na abili, ndaba wekalile na bakazi babengi.

³¹ Kami wekalile na mukazendi wakwinginina mu Shekemu, wamubelekelele mwana wamulume pe wamutumbile lizina lya Ambimeleki.

³² Ngindiyoni mwana Yowashi, wafwile ku wukulwane pe bamufundile mu shinzimbi sha tatiyendi Yehowashi, ku Ofwila lukena lwa livumo lya Ambiyaza.

³³ Oho Ngindiyoni wafwakale, bantu ba Ishalela kami bengile bakubula kwoloka kuli Nyambi pe kami balemeshelenga Bambaalu. Bafutwile Mbaalu Mbeliti kwinga nyambi yabo.

³⁴ Kaliha balemeshelenga kami Nyambi ya Ngula, Nyambi yabo, ou wabapulwishile ku bamalamo babo nimwabo aba babazinguluka.

³⁵ Kami kaliha baholwele nceshe ku ba lupashi lwa Yelumbaalu niye kami Ngindiyoni, ku wuwahe nimwawo uya atendelele Ishalela.