Bakakuyata 6 - Libuka Lya Kuyela

Bya Ngindiyoni

¹ Bantu ba Ishalela babipishilile kami Nyambi ya Ngula, niho Nyambi ya Ngula etabilishile Bamindiyani ngayi babalele ha myaka mutanu na yibili.

² Bamindiyani bekalile na ngovu shikuma kupitakana Baishalela, pe bantu ba Ishalela batininenga na kuholama mu manzolongoma namu mateke namu myanya yakupulukila mu mapili.

³ Shikati osho nimwasho Baishalela ba kuninenga mbuto yabo, Bamindiyani hamo na Baamaleki na mishobo yamu libelelengwa yezilenga na kubalwisha.

⁴ Batulililenga hahepi na mafuba na kulobesha mbuto kukakuma naku mabukubuku anazinguluku shitika sha Ngaza, babulile ku shiya shuma ku Baishalela sha kubayoyesha, hingebene bambelele hinge zingombe hinge bambongolo.

⁵ Bezilenga na bimuna babo na zintanda, wingi wabo ngonehe mikumbi kaliha batweshele kulabiwa, nibo na bakamela babo. Bezile na kulobesha litunga,

⁶ Bamindiyani bashimbile byuma nimwabyo bya Baishalela, niho balililile kuli Nyambi ya Ngula ngayi abayavwe.

⁷ Oho bantu ba Ishalela balililile kuli Nyambi ya Ngula ndaba ya Bamindiyani,

⁸ Nyambi ya Ngula wabatuminine muluwe ou wabaletelele olu lushango ngayi, “Namifumishile mu wulungo ku Engepita.

⁹ Namilamwinine ku Baengepita naku maboko anobo bamiyandishilenga mu litunga lino. Nabatandile oho mwayilenga na kulikaka pe namipanikile litunga lyabo.

¹⁰ Namitongwezele ngayi ami nenga Nyambi ya Ngula, Nyambi yenu, kami namitongwezele ngayi hinga mulemeesha banyambi ba Baamoli bamwine litunga omu mukwikala. Ngoboni mwabulile kuyuvwilila kukwami.”

¹¹ Niho lingeloyi lya Nyambi ya Ngula lyezile ku munzi wa Ofwila na kwikala mu nceto ya mutondo wa Telimbini, ou wengilenga wa Yowashi wa ku livumo lya Ambiyaza. Mwanendi wa mulume Ngindiyoni wekalile na kupumpula loto kuwi mu shizongelo sha shinyanca ngayi mwanga Bamindiyani babule kumumona.

¹² Lingeloyi lya Nyambi ya Ngula waholokele kukwendi pe wambile ngayi, “Obe mulume wakukanca wa ngovu, Nyambi ya Ngula uli hamo na nobe!”

¹³ Ngindiyoni wambile kukwendi ngayi, “Hekulu nikwipula nehi ngayi kati shumangani ebye nimwabyo binatwizilili, ndi mwa shikuma Nyambi ya Ngula uli hamo nanetu? Kati binayi kuti ebye byuma nimwabyo bya kukomokesha biya batutongwezelenga batatizetu, eshe atendelenga Nyambi ya Ngula naneshe abafumishile mu Engepita? Nyambi ya Ngula unatufutamini. Unatushiyi ku maboko a Bamindiyani.”

¹⁴ Niho Nyambi ya Ngula wamwambilile ngayi, “Yanga ukalamwine Ishalela ku Bamindiyani na nyala zobe nimwazo eze uli nazo. Amimwine nili na kukutuma.”

¹⁵ Ngindiyoni wakumbwile ngayi, “Hekulu, kati nikutwesha nahiti kulamwina Ishalela? Mona, livumo lyami linengi lya kupopa shikuma mu mushobo wa Manashe, kami ami nengi kankutala ku ba lupashi lwami.”

¹⁶ Nyambi ya Ngula wakumbwile ngayi, “Ngoboni nikekala hamo na nobe. Pe ukanyokosha Bamindiyani ngo muntu umo.”

¹⁷ Ngindiyoni wakumbwile ngayi, “Ndi unawahilili na nami, mpanike shilimukisho shimo ngayi mwa shikuma obe unengi Nyambi ya Ngula.

¹⁸ Hekulu, hinga taha unciya hantu nakuletele ntupu ya byakulya.” Lingeloyi lya kumbwile ngayi, “Nikekala hantu unaboko.”

¹⁹ Nohobene Ngindiyoni wenginine mu litala lyendi pe watelekele nyama ya mwana mpongo, kami wavumbile mankende a muhunga wa makilo likumi wakubula mumena. Wayakile nyama mu ntumba pe muhozi mu nyungu, kami wabiletele kuli lingeloyi lya Nyambi ya Ngula mu nceto ya mutondo wa Telimbini, pe wabipanikile kukwendi.

²⁰ Niho lingeloyi lya Nyambi lyamutongwezele ngayi, “Yaka nyama na mankende ha limanya elye, kami uyitile muhozi hayilu yabyo.” Pe Ngindiyoni watendele noho.

²¹ Niho lingeloyi lya Nyambi ya Ngula lyakolobelele pe wakwatile nyama na mankende na nkumo ya muwana uya ekalile nawo mu liboko lyendi. Mundilo wabangile mu limanya pe wahokeshele nyama na mankende. Niho lingeloyi waziminine ku lupala lwendi.

²² Niho Ngindiyoni alimukile ngayi lyengile lingeloyi lya Nyambi ya Ngula, ou amonene, pe wambile oku hakanka ngayi, “Makando wami! Tawee! Obe Mwene Nyambi ya Ngula, ndaba namono lingeloyi lyobe lupala na lupala!”

²³ Ngoboni Nyambi ya Ngula wambile kukwendi ngayi, “Kukafwa ufwako. Hinga utina, tula mutima!”

²⁴ Niho Ngindiyoni azikilile kaala ka mamanya Nyambi ya Ngula, kami watumbileko ngayi, “Nyambi ya Ngula wenga ku mwena.” Nisho shishili kwimana ku Ofwila nihano, eshe shenga sha ku livumo lya Ambiyaza.

²⁵ Wushiku uyo Nyambi ya Ngula watongwezele Ngindiyoni ngayi, “Shimba nkunzi wa tatiyobe na nkunzi wamina kami wa myaka mutanu na yibili. Tungula tuula twa tatiyobe bya kuli Mbaalu, pe ketula mpangwa ya Ashela. Owe wekalile kunkumo yasho.

²⁶ Wuzike kaala kakawahe kuli Nyambi ya Ngula Nyambi yobe, hayilu ya lipili. Niho shimba nkunzi wawubili na kumuhokesha wa nzimba kwinga nkombela, ufutule mpangwa ya Ashela watungula kwinga nkuni za kumuhokeshela.”

²⁷ Pe Ngindiyoni washimbile bakamilimo bendi likumi pe watendele ngonehe amutongwezele Nyambi ya Ngula. Watinine shikuma ba lupashi lwendi na bantu bamu munzi ha ku shitenda ku mwaana, nohobene washitendele wushiku.

²⁸ Oho bantu bamu munzi bapindukile lumenemene, bawanine ngayi kaala ka Mbaalu na mpangwa ya Ashela binatunguliwi, kami bawanine ngayi nkunzi wawubili banamuhokeshele ha kaala shiya sha waniwile ngayi shinazikiwili kuyo.

²⁹ Niho balipwile umo na wamina ngayi, “Kati yani unatende eshe?” Bashingishishile pe bawanine ngayi Ngindiyoni, mwana Yowashi, niye natende noho.

³⁰ Niho bantu bamu munzi bambile kuli Yowashi ngayi, “Leta mwanobe hano ha munkanda ngayi tumuzihe! Unatungulu kaala ka Mbaalu na kuketola mpangwa ya Ashela kunkumo yasho.”

³¹ Ngoboni Yowashi wambile kunobo bamulwishilenga ngayi, “Muli na kwimanina Mbaalu ndi? Hinge muli na kumu bibiza ndi? Muntu nimwendi wakumwimanina ukazihiwa oho shilolo kushe. Ndi Mbaalu unengi nyambi, mulehenu alilamwine niyemwine. Kanengi kaala kendi kaya kakutunguliwa.”

³² Niho kubalika haya kutwala kumbili Ngindiyoni walimukiwile na lizina lya Yelumbaalu, ndaba Yehowashi wambile ngayi, “Mulehenu Mbaalu alilamwine niyemwine. Niko kanengi kaala kendi kaya katunguliwile.”

³³ Niho Bamindiyani nimwabo na Baamaleki na mishobo yaku mushamuko yamu libelelengwa bezile hamo, bazabukile mushinzi wa Yondana, kami batulilile mu mukulo wa Yezilelu.

³⁴ Moyo wa Nyambi ya Ngula wapanine ngovu Ngindiyoni. Washibile mu mpandula mukwihana balume ba livumo lya Ambiyeza ngayi bamukonke.

³⁵ Watumine bantumwana mu zimbalila wubili wazo za litunga lya mushobo wa Manashe kuya mu kubaloba ngayi bamukonke. Watumine kami bantumwana ku mishobo ya Asha na Zembuloni na Nafwitali, pe kami bezile mu kuliwana nendi.

³⁶ Niho Ngindiyoni ambile kuli Nyambi ngayi, “Ndi ukushinga ngayi untendeshe kulamwina Ishalela ngonehe shiya wambile,

³⁷ haya nili na kuyaka shitembe sha wushako hanci oku twapumpwilanga loto. Ndi kukuma ku lumenemene mume ukuwila tuhu ha shitembe sha wushako pele, hanci ha nkwaa, niho nikalimuke ngayi mwa shikuma uli na kuncinga nilamwine Ishalela.”

³⁸ Pe eshe shatendiwile. Oho Ngindiyoni apindukile lumenemene wazongele shitembe sha wushako kami wakokwelele mume ku kwasho wakwinzalisha lulonga lwa kukunama.

³⁹ Niho Ngindiyoni ambile kuli Nyambi ngayi, “Hinga umpilamina, shashiwahe nambe kami. Hekulu, ndehe taha nitende kami kamo kwezeka na shitembe sha wushako. Haya shitembe sha wushako shiyume nkwaa. Kami hanci hazabe na mume.”

⁴⁰ Wushiku uya Nyambi watendele eshe, kwashile lumenemene shitembe sha wushako shayumine, ngoboni hanci hazabile na mume.