Bakakuyata 4 - Libuka Lya Kuyela

Ndembola na Mbalaki

¹ Oho Ehundi wafwakale, bantu ba Ishalela babipishilile kami Nyambi ya Ngula.

² Nohobene Nyambi ya Ngula wetabilile ngayi bakomiwe kuli Yambini mwene wa Bakenaani ou walelele lukena lwa Hazola. Mukulwane wa nzita yendi wengile Shishela, ou wazikilenga ku Halosheti wa Bakamatunga.

³ Yambina wekalile na makoloyi a byondo 900, kami walelelenga bantu ba Ishalela na nguma na mushunga ku myaka makumi abili. Niho bantu ba Ishalela balililile kuli Nyambi ya Ngula ngayi abayavwe.

⁴ Ndembola mukaza Lapindoti wengile muluwe wa Nyambi. Pe watendelenga mulimo wakulela Baishalela ha shikati shiyo.

⁵ Ndembola wekalilenga na kuyatila byambo mu nceto ya mutondo wa munkomona wa mukati ka Lama na Mbetele, mu litunga lya binkanda lya Efulemu, kami bantu ba Ishalela bezilenga kukwendi mu kubayata.

⁶ Mutena umo watuminine Mbalaki mwana Ambinoyama ku munzi wa Kendeshi mu Nafwitali, pe wambile kukwendi ngayi, “Nyambi ya Ngula Nyambi wa Ishalela unakukulayelela ngayi, ‘Katula bantu 10,000 ba ku mishobo ya Nafwitali na Zembuloni, ubatwale ku lipili lya Tambola.

⁷ Nikaleta Shishela mukakutwaminina nzita ya Yambini, mu kumilwisha ku mushinzi wa Kishoni. Ukekala na makoloyi wendi na banzita ngoboni nika kupana ngovu za kumukoma.’”

⁸ Mbalaki wakumbwile ngayi, “Nikaya ndi obe ukaya na nami, ngoboni ndi kuya hamo na nami ufwako, pe ami kami kuya nifwako.”

⁹ Ndembola wakumbwile ngayi, “Shinawaha, nikaya nobe, ngoboni ufwako kukaya mpupo ha kukoma, ndaba Nyambi ya Ngula ukapana Shishela ku liboko lya mbuyama.” Niho akatukile pe bayile hamo na Mbalaki ku Kendeshi.

¹⁰ Mbalaki wehanine mishobo ya Zembuloni na Nafwitali ku Kendeshi, kami 10,000 balume bamukonkele. Ndembola wayile nendi.

¹¹ Haya Hemba wa Kakeneta wemikile ntanda yendi kwakwipi na Kendeshi kwakwipi na mutondo wa Oka mu Zananimu. Watuntukile kufuma ku Bakeneta bamina, bazukulya Hombambu, mulamu wa Moshesha.

¹² Shishela watongwezele ngayi Mbalaki mwana Ambinoyama unakankalalili ku lipili lya Tambola,

¹³ niho Shishela ehanine makoloyi wendi a byondo bya kulingana 900 na bantu bendi nimwabo, kami wabatumine ngayi baye ku Halosheti wa Bakamatunga kukakuma naku mushinzi wa Kishoni.

¹⁴ Pe Ndembola wambile kuli Mbalaki ngayi, “Yanga! Nyambi ya Ngula uli na ku kutwaminina! Lelo unakupana kukoma Shishela.” Mbalaki wayile wakunkulukile ku nceto ya lipili lya Tambola na 10,000 bantu bendi.

¹⁵ Oho Mbalaki na banzita bendi bakatukilile mutakwe, Nyambi ya Ngula wavulanganyine Shishela hamo na makoloyi wendi na bantu bendi. Shishela washulukile mu koloyi yendi pe wetukile na mawulu.

¹⁶ Mbalaki watandile makoloyi na nzita ku Halosheti wa Bakamatunga, nzita ya Shishela nimwayo yazihiwile, kowa muntu washalileko.

¹⁷ Shishela wetukilile ku ntanda ya Yayelu, mukaza Hemba wa Kakenaani, ndaba mwene Yambini, mwene wamu Hazola, wekalile mu ku mwena na lupashi lwa Hemba.

¹⁸ Yayelu watutikile wayile mu kushimbawila Shishela, pe wambile ngayi, “Ingina mukati hekulu, ingina mu ntanda yami. Hinga utina boha.” Nohobene wengininemo, pe wamuholekele ku shibaamba.

¹⁹ Shishela wambile kuli Yayelu ngayi, “Hekulu mpeko mema akunwa, nili na linyontwa.” Wafwikwilile mu mbokoshi ya shitembe sha kunyuka sha mahwe, wamupanikile pe wanwine, niho amuholekele kami.

²⁰ Niho Shishela amutongwezele ngayi, “Yimana ku shipana sha ntanda kami ndi kukwiza muntu umo na kukwipula ngayi munamonene muntu kuno, wambe ngayi byo.”

²¹ Shishela wakwangile shikuma pe wakupukilile mu tulo. Niho Yayelu mukaza Hemba ashimbile shikoma na mpimpi yaku ntanda pe wayile kukwendi na kumubembelela, pe wapampalile mpimpi mukati ka mutwe, nimwayo yenginine shwii namu limvu. Pe Shishela wafwile.

²² Oho Mbalaki ezile mukushinga Shishela, Yayelu watutikile wayile mu kumushimbawila, pe wambile kukwendi ngayi, “Yeka kuno! Nikakumoneshe ou muntu uli na kushinga.” Nohobene wayile nendi, oku ekalile Shishela ngumbanga hanci wakufwa na mpimpi hinga yamunwa mu mutwe.

²³ Ha mutena uyo Nyambi wapanine Baishalela kukoma Yambini, mwene wa Bakenaani.

²⁴ Baishalela bayandishile Yambini shikuma na ngovu na kumulwisha kutwala noho bamulobeshele.