Bakakuyata 3 - Libuka Lya Kuyela

Mishobo yamina yashalile mu litunga

¹ Nohobene Nyambi ya Ngula, washiyile mu litunga mukwezeka Baishalela aba babulile kwikala mu nzita mu Kenaani.

² Watendelenga eshe tuhu ngayi mwanga alongeshe shihemunwino na shihemunwino sha Baishalela bya nzita, shinene obo babulile kwikala mu nzita ha kutatika.

³ Ku nobo bashalile mu litunga, zinkena zengile mutanu za Bafwilishitina na Bakenaani na Bashindoni na Bahivi nimwabo, aba bazikilenga ku mwanya wa mapili a Lembanoni, kubalika ku lipili lya Mbaalu Helimoni kukakuma naku nzila ya Ncinencine yaku Hamati.

⁴ Bashalilile kwinga shezeko hali Ishalela, kushingishisha ndi Baishalela ba kutwesha kwombatala ndayano ziya Nyambi ya Ngula apanikile ku batatizabo kupitila muli Moshesha, hinge ndi bafwako.

⁵ Nohobene bantu ba Ishalela bazikile hakati ka Bakenaani na Bahita na Baamoli na Bapelizi na Bahivi na Bayembushi.

⁶ Pe baliyekelele kami balemeshele banyambi babo.

Bya Otiniyele

⁷ Bantu ba Ishalela bavulamine Nyambi ya Ngula, Nyambi yabo. Babipishile kukwendi, pe balemeshele ba Mbaalu na Ashela.

⁸ Nohobene Nyambi ya Ngula wapilaminine Ishalela pe wetabilishile Kushani Lishatayimi mwene waku Meshopotamiya ku bakoma. Wabalelele mu myaka mutanu na yihatu.

⁹ Niho Baishalela bakalokelele kuli Nyambi ya Ngula, pe watumine muntu ou wabalamwinine. Lizina lyendi wengile Otiniyele, mwana Kenazi mukonzo wa Kalembu.

¹⁰ Moyo wa Nyambi ya Ngula wamupanine ngovu, pe wafutukile kwinga mukakutwaminina Ishalela. Otiniyele wayile ku nzita, pe Nyambi ya Ngula wamupanikile ngovu za kukoma mwene waku Meshopotamiya.

¹¹ Kwekalile ku mwena mu litunga ha myaka makumi anaa. Niho Otiniyele mwana Kenazi wafwile.

Bya Ehundi

¹² Bantu ba Ishalela babipishile kami kuli Nyambi ya Ngula. Ndaba ya shuma eshe, Nyambi ya Ngula washumishile Engiloni, mwene waku Mowambi, kulwisha Ishalela.

¹³ Engiloni walifungilile na Baamoni na Baamaleki, bakomene Baishalela pe bapukwile Yeliko lukena lwa minkomona.

¹⁴ Baishalela bengile bandungo kuli Engiloni mwene waku Mowambi ha myaka likumi na mutanu na yihatu.

¹⁵ Niho Baishalela balililile kuli Nyambi ya Ngula pe watumine muntu mu kubalamwina. Lizina lyendi Ehundi, muntu walimoho, mwana Ngela waku mushobo wa Mbenjamani. Bantu ba Ishalela batumine Ehundi kutwala zintupu kuli Engiloni mwene waku Mowambi.

¹⁶ Ehundi walifulilile mukwale wawutwe kubili, wutali wawo wengile mashentimita 50, wawumangilile ku ntungi yaku shilyo shendi, ku nceto ya bivwalo byendi.

¹⁷ Niho atwalile ntupu kuli Engiloni mwene waku Mowambi ou wengile muntu wa wutambi shikuma.

¹⁸ Oho Ehundi wamupanakale zintupu watongwezele bantu aba babishimbile kuboka ku munzi.

¹⁹ Ngoboni niyemwine Ehundi wakabokelele ku mamanya akubaza kwakwipi na Ngilingale, niho abokele kami kuli Engiloni, pe wambile ngayi, “Hekulu, nili na lizu lya kukutongweza lya maholekela.” Mwene wambile ku bakamilimo bendi ngayi, “Tushiyenu taha ninkayetu!” Niho nimwabo batutikile ha munkanda.

²⁰ Oho mwene ekalile ninkayendi mu kampenci kendi mwakubombola ha kampenci ka hayilu ya shiluli, Ehundi wezile kukwendi pe wambile ngayi, “Nili na lizu kukwobe lya Nyambi ya Ngula.” Mwene wakatukile na kwimana.

²¹ Ehundi wahomwene mukwale na liboko lyendi lya shimoho ku ntungi yendi ya shilyo, wamushwangile ha livumo.

²² Mukwale nimwawo wenginine mukati na shikundo nimwasho shwii na mazi awufwikile. Ehundi wabulile kuwu kokaho ha livumo lya mwene.

²³ Niho Ehundi atutikile ha munkanda pe washinkile bipana na kupatako,

²⁴ pe wayile. Bakamilimo bezile bamonene ngayi bipana bya kupata, bahanganikile ngayi mwene uli mukati nakopele.

²⁵ Batatililile shikuma ngonehi bahanganikile ngayi ba kutwesha kutatilila, ngoboni oho abulile ku shinkulula shihala, bapatunwine kapatisho pe bashinkulwileko, kuwana tuhu hekulyabo muya hanci ngumbanga wakufwa.

²⁶ Ehundi watinine oho bekalile na kutatilila. Wayile kupitakana ku mamanya akubaza, pe watininine ku Sheyila.

²⁷ Oho akumineko, washibile mpandula mu litunga lya binkanda lya Efulemu, mu kulobela balume ba Ishalela ku nzita, niho aba kunkulwishile ku nceto ya binkanda.

²⁸ Wabatongwezele ngayi, “Nkonkenu! Nyambi ya Ngula unamipana ngovu za kukoma bamalamo benu, Bamowambi.” Nohobene bakonkele Ehundi pe bapukwile mwanya oku bashingile kuzabukila Yondana Bamowambi, kaliha betabilile muntu hinge umo kuzabuka.

²⁹ Mutena uyo bazihile banzita ba Bamowambi ba kushuma ba kulingana 10,000. Banzita ba Bamowambi kowa nanou wapanzileko.

³⁰ Mutena uyo Baishalela bakomene Mowambi. Kwekalile ku mwena mu litunga ha myaka 80.

Bya Shamingali

³¹ Munyima ya Ehundi kwezile Shamunga mwana Anati. Kami walamwinine Ishalela nakuziha Bafwilishitina ba kulingana 600 na shitwa sha kuli kwatilila mu zingombe.