Bakakuyata 21 - Libuka Lya Kuyela

Baishalela ba kushingila mushobo wa Mbenjamani bakazi

¹ Oho balume Baishalela bakungulukilile ku Mizipa balibezele kuli Nyambi ya Ngula ngayi, “Hakatiketu howa ou uketabila muka Mbenjamani kuyeka umo ha banabetu ba bambuyama.”

² Nohobene haya, bantu ba Ishalela bayile ku Mbetele, pe bekalile kuyo ku meho a Nyambi kukuma naku mazolo. Balilile na kukuwa shikuma.

³ Bambile ngayi, “Nyambi ya Ngula, Nyambi wa Ishalela, kati eshe shuma shinamoneke nahiti? Shumangani mushobo wa Mbenjamani ukushingila kuzima mu Ishalela?”

⁴ Oho kwashile lumenemene shikuma, bantu bapindukile pe bazikile kuyo kaala. Batupwile zinkombela za kuhokesha na zinkombela za kulilumikila ku meho a Nyambi ya Ngula ku Mizipa.

⁵ Pe Baishalela bepwile ngayi, “Kati kuli bantu aba babulile kuya ku shikungulukilo ku meho a Nyambi ya Ngula ku Mizipa ndi?” Ndaba bakulupishile ngayi muntu nimwendi wabulile kuya ku shikungulukilo ku meho a Nyambi ya Ngula ku Mizipa wafwanina kuzihiwa.

⁶ Ngoboni bantu ba Ishalela bayuvwile nceshe ha bawushinda wabo baka Mbenjamani. Pe bambile ngayi, “Lelo Ishalela unayongesheho umo ha mishobo yendi.

⁷ Tukwinga nahiti ngayi tuwanine bambuyama kunaba balume ba Mbenjamani banashalaho? Twalihahile kuli Nyambi ya Ngula ngayi kukayekiwisha banabetu ba bambuyama ku baka Mbenjamani tufwako.”

⁸ Niho baliyipwezele ngayi, “Kati ha mishobo ya Ishalela bayani aba babulile kuya ku shikungulukilo sha ku meho a Nyambi ya Ngula ku Mizipa?” Bawanine ngayi ku Yambeshi mu Ngiliyande kowa muntu wafumineko.

⁹ Oho bantu behaniwile hamo, kowa muntu wafumine ku Yambeshi mu Ngiliyande wekalileko.

¹⁰ Nohobene shikungulukilo shatumine banzita babo 12,000 ba kukanca na kubatongweza ngayi, “Yenunga mukazihe bantu nimwabo ku Yambeshi Ngiliyande, hamo na bambuyama na batwanuke.

¹¹ Tendenu eshe, zihenu balume nimwabo, pe mukazihe kami bambuyama nimwabo baya balalaho mwaka na balume.”

¹² Bawanine tunkanga 400 hakati ka bantu bamu Yambeshi Ngiliyande, babula kulalaho na balume babaletele ku munkungwa ku Shilo, munzi ou wekala mu litunga lya Kenaani.

¹³ Niho shikungulukilo nimwasho shatumine lizu ku baka Mbenjamani ku limanya lya Limoni na kulyambwilila mu kumanisha nzita.

¹⁴ Baka Mbenjamani babokele, pe Baishalela bamo babapanikile tunkanga ba ku Yambeshi Ngiliyande aba babulile kuzihiwa. Ngoboni kaliha babalinganine nimwabo.

¹⁵ Pe bantu bayuvwilile nceshe baka Mbenjamani, ndaba Nyambi ya Ngula watendele limpulwa hakati ka mishobo ya Ishalela.

¹⁶ Nohobene bakakutwaminina shikungulukilo bambile ngayi, “Haya, tukwinga nahiti ngayi tuwanine bambuyama balume ba Mbenjamani aba banashalaho, ndaba bambuyama ba mushobo wa Mbenjamani kowa?

¹⁷ Ishalela kaliha wafwanina kuyawa umo ha mishobo likumi na yibili. Tuku fwanina kuwana nzila yaha mushobo wa Mbenjamani ngayi ushanguke,

¹⁸ Ngoboni etu kutwesha kubetabila ngayi bayeke banabetu tufwako.” Ndaba Baishalela balihahile ngayi, “Kowa wakwitabila muka Mbenjamani kuyekaho umo ha banabetu.”

¹⁹ Nohobene bambile ngayi, “Shimbo shaha mwaka ha mwaka sha Nyambi ya Ngula ku Shilo wuluno shikume.” Shilo wekalila ku ncelele ya Mbetele, ku mabukubuku a Lembona, kami ku mushamuko wa nzila ya mukati ka Mbetele na Shekemu.

²⁰ Batongwezele baka Mbenjamani ngayi, “Yenunga mukaholame mu mafuba a mikabo ya shinyanca,

²¹ na kubelamina. Oho batunkanga ba ku Shilo bakatutika mu kushinda ha shikati sha shimbo, nenu kami mukatutike mu mafuba a mikabo ya shinyanca. Muntu na muntu hakati kenu akahukuleho kankanga na kuya nendi ku litunga lya Mbenjamani.

²² Ndi batatizabo hinge bawushinda wabo bakeza na kulihohoma kukwetu pe tukatwesha kubatongweza ngayi, ‘Hekulu, tuyuvwilenuko nceshe, ndaba kaliha twabashimbile kukwenu shikati sha nzita ngayi benge bakazetu. Kami kaliha mwabapanikile kukwetu, nohobene mulandu wakupokola lubeza lwenu mufwawo.’”

²³ Baka Mbenjamani batendele eshe, muntu na muntu hakati kabo wahatile mbuyama ha batunkanga baya bashindilenga ku Shilo pe wamuhukwile. Niho babokele ku likona lyabo na kutendulula minzi yabo, pe bazikile kuyo.

²⁴ Niho bantu Baishalela bakatukile, pe balume nimwabo babokele ku mishobo yabo naku ba lupashi lwabo naku makona wabo nibo bamwine.

²⁵ Ku shikati shiyo mu Ishalela mwabulile mwene. Bantu nimwabo batendelenga eshe yashingilenga mitima yabo.