Bakakuyata 20 - Libuka Lya Kuyela

Ishalela ukuliwahishila kuya ku nzita

¹ Niho bantu nimwabo ba Ishalela, kubalika ku litunga lya Ndani lya ku ncelele, kutwala naku Mbelishemba ku mabukubuku naku litunga lya Ngiliyande ku mushamuko, bakumbwile ku lukuwa. Bakungulukile ngo muntu umo ku Mizipa ku meho a Nyambi ya Ngula.

² Bakakutwaminina nimwabo ba mishobo ya Ishalela bekalileko oku kwakungulukilile bantu ba Nyambi. Kwekalile 400,000 banzita bakwenda hanci.

³ Haya bantu ba Mbenjamani bayuvwile ngayi baminabo Baishalela nimwabo banakungulukili ku Mizipa. Baishalela bepwile ngayi, “Tutongweze, kati eshe shambo shinatendiwi nahiti?”

⁴ Kalevi ou wekalilenga na mukazendi wafwile ku mponde, wakumbwile ngayi, “Mukazami wakwinginina na nami twezile ku Ngimbiya mu litunga lya Mbenjamani, mu kulalilako wushiku umo.

⁵ Balume ba ku Ngimbiya bezile mu kundwisha, pe bazingulukile litala wushiku. Bashingile kunziha, niho bakwatile mukazami wakwinginina na ku mukandikiza kulala nendi pe niho afwile.

⁶ Nashimbile lutu lwendi na kuluketola bituntula na kubituma ku mbalila na mbalila ya litunga lya mishobo likumi na yibili ya Ishalela. Aba bantu banatende byabibi na bya wumambe mukatiketu.

⁷ Nimwenu muli kuno munengi Baishalela. Kati haya tukatenda nahiti ha shuma eshe?”

⁸ Bantu nimwabo bakatukile ngo muntu umo, pe bambile ngayi, “Kowa muntu wakuboka ku munzi hakatiketu, hinge walangananga mu ntanda hinge mu litala.

⁹ Eshe nisho tukatenda, tukakuna nyela, pe tukahata bantu bamo bakalwishe Ngimbiya.

¹⁰ Shitika sha wulikumi sha bantu bamu Ishalela bakenga bakakupana byakulya ku banzita. Bamina bakaya mu kushushula Ngimbiya, litunga lya ku Mbenjamani ha wumambe uya banatende mu Ishalela.”

¹¹ Nohobene bantu nimwabo bamu Ishalela bezile hamo na mutima umo na kukunguluka ha shihanganiko shimo mu kulwisha munzi.

¹² Mishobo ya Ishalela yatumine bantumwana mu litunga nimwalyo lya mushobo wa Mbenjamani na kwamba ngayi, “Kati okwe kuluwa munatende kwa nahiti?

¹³ Haya baletenu obo balume bababi bamu Ngimbiya, ngayi mwanga tubazihe na kufumisha byabibi mu Ishalela.” Ngoboni bantu ba Mbenjamani kaliha batulumanine ngayi bayuvwilile ku baminabo Baishalela.

¹⁴ Pe bantu ba Mbenjamani bafumine ku minzi nimwayo, bezile ku Ngimbiya mu kulwisha Baishalela.

¹⁵ Baka Mbenjamani balobele banzita 26,000 ha mutena uyo ku minzi yabo, kubula kuyakako aba bamu munzi wa Ngimbiya, aba ba kungwile bantu 700.

¹⁶ Hakati kanaba banzita 700 hekalile balimoho, muntu nimwendi watweshelenga kupuha limanya hinge ha luhuki lumo kwakubula kuhweta.

¹⁷ Wingi wa mishobo ya Ishalela kufumishako baka Mbenjamani ba kungwile banzita 400,000 ba kulilongesha. Aba nimwabo bengile bantu ba kutwesha nzita.

Nzita ya kulwisha Bambenjamani

¹⁸ Baishalela bayile ku mwanya wakulemeshela ku Mbetele. Kuyo bakepwile Nyambi ngayi, “Mushobo ngani ukutatika kukatukila mutakwe na kulwisha Baka Mbenjamani?” Nyambi ya Ngula wakumbwile ngayi, “Mushobo wa Yunda.”

¹⁹ Nohobene Baishalela bapindukile lumenemene bayile, pe bakatulilile kwakwipi na munzi wa Ngimbiya.

²⁰ Bayile mu kulwisha banzita ba Mbenjamani na kuyaka banzita mu muhoko kupenza munzi wa Ngimbiya.

²¹ Banzita ba Mbenjamani batutikile ha munkanda wa munzi, kami oho mutena shilolo ulele, bazihile banzita ba Ishalela 22,000.

²² Nohobene banzita ba Ishalela bashumankanine, pe bayakile banzita babo mu mwanya wowo umo kami, oku bekalile ha mutena wakutatika.

²³ Ngoboni bantu ba Ishalela bayile ku mwanya wakulemeshela pe balililile ku meho a Nyambi ya Ngula kukuma naku mazolo. Pe bamwipwile ngayi, “Kati tukutwesha kuya mu nzita na kulwisha bawushinda wetu baka Mbenjamani kami ndi?” Nyambi ya Ngula wakumbwile ngayi, “Ee, yenunga.”

²⁴ Baishalela bayile mu kulwisha mushobo wa Mbenjamani shikati sha wubili.

²⁵ Pe ha shikati sha wubili, baka Mbenjamani batutikile ha munkanda wa munzi wa Ngimbiya, kami shikati shino bazihile banzita ba Ishalela ba kulilongesha 18,000.

²⁶ Niho bantu ba Ishalela nimwabo bayile ku Mbetele na kulila. Bekalile kuyo ku meho a Nyambi ya Ngula, pe bazilile kulya kukuma naku mazolo. Batupwile zinkombela za kulilumikila na zinkombela za kuhokesha za nzimba ku meho a Nyambi ya Ngula.

²⁷ Niho bantu ba Ishalela bepwile kami kuli Nyambi ya Ngula, ndaba Likwati lya Kulimama kwa Nyambi lyekalile kuyo ku Mbetele ha matena ayo,

²⁸ pe Fwinihashi, mwana Eliza wa mulume muzukulya Aloni, wengile mukulwane wa bakankombela nimwabo. Bantu bepwile ngayi, “Kati etu tukutwesha kuya na kulwisha bawushinda wetu baka Mbenjamani kami, hinge ndi tulehesho?” Nyambi ya Ngula wambile ngayi, “Kalwenu! Nzona nikamipana ngovu za ku bakoma.”

²⁹ Nohobene Baishalela bayakile banzita ba kuholeka, kuzinguluka Ngimbiya.

³⁰ Niho ha mutena wawuhatu bayile mu kulwisha banzita ba Mbenjamani, pe bayakile banzita babo mu mwanya wa nzita kupenza ku Ngimbiya, ngonehe batendele ha kutatika.

³¹ Baka Mbenjamani batatikile kuziha Baishalela bamo mu mbuwa ha nzila ya kuya ku Mbetele naha nzila ya kuya ku Ngimbiya. Bazihile makumi ahatu a Baishalela.

³² Pe baka Mbenjamani bambile ngayi, “Tunabapitakana ngonehe shiya twatendele ha kutatika.” Ngoboni Baishalela batatikile kuyongola na kwamba ngayi, “Tokonoko tulyongeze kwituka na kubafumisha mu munzi na kubatwala ha zinzila.”

³³ Nohobene oho banzita yayinene ya Baishalela bashintulukile kunyima na kubungana ku Mbaalu Tama, bantu baya baholamine kuzinguluka munzi, kubazumuka tuhu batutikakale mu myanya yabo baholamine yazinguluka munzi wa Ngimbiya.

³⁴ Niho makulukazi likumi lya balume bawunongi ba kuhatiwa ha Baishalela nimwabo, balwishile Ngimbiya, pe ngunga yengile yayikalu. Bambenjamani kaliha balimukile ngayi bekalile hahepi na kulobeshiwa.

³⁵ Nyambi ya Ngula wapanikile Ishalela ngovu za kukoma banzita ba Mbenjamani. Baishalela bazihile 25, 100 bamalamo ha mutena uyo,

³⁶ nohobene Bambenjamani balimukile ngayi bakomiwakale. Banzita yayinene ya Baishalela balyongezele kwituka ku baka Mbenjamani ndaba bakulupilile ha bantu baya babelaminine kuzinguluka Ngimbiya.

Eshe Bakomene Baishalela

³⁷ Aba bantu betukilile wanguwangu ku Ngimbiya, bapanzaninine mu munzi nakuziha bantu nimwabo.

³⁸ Banzita yayinene ya Baishalela na bantu aba baholaminenga bemikile shilimukisho. Oho bamonene likumbi lyalinene lya wishe lya kakumukilenga mu munzi kukakuma na kuyilu,

³⁹ Baishalela aba bekalile kwakutali na lifuku lya nzita bafwaninine kutenguluka na ku boka. Baka Mbenjamani ha shikati shino, oho bazihahokale makumi ahatu ku Baishalela. Balyambishile nibo bamwine ngayi, “Ee, tunabapitakana ngonehe shiya twatendele ha kutatika.”

⁴⁰ Niho shilimukisho shamonekele mu munzi, likumbi lya wishe lyatatikile kukakumuka mu munzi. Baka Mbenjamani batilaminine kunyima yabo, pe bakomokele ha ku mona munzi nimwawo hiukulasheka mu milangi.

⁴¹ Niho Baishalela batengulukile, pe baka Mbenjamani batampwile shikuma ndaba balimukile ngayi bali hahepi na kulobeshiwa.

⁴² Nohobene baka Mbenjamani betukile kutina Baishalela, pe betukilile na kulumbalala mulibelelengwa, ngoboni kaliha batweshele kupanza. Bakwatiwile mukati ka banzita yayinene na nzita ya naba bafuminenga mu munzi, pe balobeshiwile.

⁴³ Baishalela bamanyikile bamalamo babo baka Mbenjamani na kubatandila kwakutali kukakuma naku mushamuko wa Ngimbiya, kami bayilenga na kubazihila mu nzila oho babatandilenga.

⁴⁴ Banzita 18,000 ba kukanca ba Mbenjamani bazihiwile.

⁴⁵ Bamina batengulukile pe betukilile na kulumbalala mulibelelengwa kukakuma naku limanya lya Limoni, pe kami bantu 5,000 bazihiwilile ha nzila. Ngoboni Baishalela bazaminine kutanda wingi wa nobo bashalileho kuka bakumisha ku Ngindomi, bazihileho bantu 2,000.

⁴⁶ Ha mutena uyo bantu nimwabo ba Mbenjamani bazihiwile bengile 25,000 bengile banzita ba kukanca.

⁴⁷ Ngoboni bantu 600 batweshele kwitukila mu libelelengwa kukakuma naku limanya lya Limoni, pe bekalileko zingonda zinaa.

⁴⁸ Baishalela babokele mu kulwisha baka Mbenjamani aba bashalileho pe bazihile balume bamu munzi na bambuyama na batwanuke, hamo na bimuna. Bahokeshele minzi nimwayo.