Bakakuyata 2 - Libuka Lya Kuyela

Lingeloyi lya Nyambi ya Ngula ku Mbokimu

¹ Lingeloyi lya Nyambi ya Ngula lyakankalalile kufuma ku Ngilingale na kuya ku Mbokima, pe lyambile ku Baishalela ngayi, “Namifumishile mu Engepita, pe namiletele ku litunga liya na kulupishile ku bankakazenu. Niho nambile ngayi, ‘Nifwako kukapokola kulimama kwami nalimamine nanenu.

² Kaliha mu ku fwanina kulimama kami na bantu aba bazika mu litunga lino. Mu ku fwanina kutungula tuula twabo.’ Ngoboni enu mwabulile kwombatala eshe namitongwezele. Hayaboni bishini mwatendele noho?

³ Nohobene haya nikumitongweza ngayi kukatandamo aba bantu ngonehe eshe mu kuya kumbili na kulikaka nifwako. Bakenga bamalamo benu, pe mukamanyikiwa ha kulemesha banyambi babo.”

⁴ Oho lingeloyi lya Nyambi ya Ngula ambile mazu awa ku bantu nimwabo ba Ishalela, batuwile mbingo na kulila,

⁵ pe nisho shuma shiya batumbilile lizina lya mwanya uyo ngayi Mbokima. Kuyo nikwo batupwilile zinkombela kuli Nyambi ya Ngula.

Lufu lwa Yoshuwa

⁶ Yoshuwa wafunzwile bantu ba Ishalela ngayi baboke ku minzi yabo, pe mushobo na mushobo wayile mukwikala ha likona liya aba kulupishile.

⁷ Shikati nimwasho ayoyele Yoshuwa, bantu ba Ishalela batendelelenga milimo Nyambi ya Ngula, pe oho afwile bazaminine kutendela milimo Nyambi ya Ngula hantu noho shikati osho bayoyele bakakutwaminina aba bamonene nibo bamwine nimwabyo biya Nyambi ya Ngula atendelele Ishalela.

⁸ Yoshuwa mwana Nune, mukamulimo wa Nyambi ya Ngula, wafwile oho uli na myaka 110.

⁹ Wafundiwile kumbalila ya shiketu sha limvu lyendi ku Timinati Sheleshi, mu litunga lya binkanda lya Efulemu, ku ncelele ya lipili lya Ngashi.

¹⁰ Pe mukoka nimwawo kami wafwile, pe munyima ya nou mukoka wakulundaminako, babulile kulimuka Nyambi ya Ngula hinge kulimuka byuma biya atendelelele Ishalela.

Baishalela ba kushiya kulemesha Nyambi ya Ngula

¹¹ Niho bantu ba Ishalela babipishilile Nyambi ya Ngula pe batatikile kulemesha Bambaalu.

¹² Balehele kulemesha Nyambi ya Ngula, Nyambi wa bankakazabo, Nyambi ou wabafumishile mu litunga lya Engepita, pe batatikile kulemesha banyambi bamina, banyambi ba bantu aba babazinguluka. Balambilenga ku banyambi aba pe bapilamishile Nyambi ya Ngula.

¹³ Bashiyile kulemesha Nyambi ya Ngula, pe batendelele milimo Bambaalu na Baashitaloti.

¹⁴ Nohobene Nyambi ya Ngula wapilamine shikuma na Ishalela na kwitabilisha bezi kubalwisha na kubapukula. Wetabilile bamalamo nimwabo babazinguluka kubanenehela, pe Baishalela kukatwesha kami kulikoweza nibo bamwine bafwako.

¹⁵ Bikati nimwabyo Baishalela bayilenga mu kulwa, liboko lya Nyambi ya Ngula lya balwishilenga na kubakoma, ngonehe shiya alibezele ngayi nisho akatenda, pe bekalile mu makando amanene.

¹⁶ Nyambi ya Ngula niho apanikile Baishalela batulela kwinga bakakubatwaminina aba babapulwishile ku naba bezi babapukwilenga.

¹⁷ Ngoboni Baishalela kaliha bayuvwililile bakakutwaminina babo. Bengile bakubula kwoloka kuli Nyambi ya Ngula na kulemesha banyambi bashenge. Batatizabo bombatalile ndayano za Nyambi ya Ngula ngoboni ou mukoka washilelo washiyile shawangu kutenda noho.

¹⁸ Shikati nimwasho oho Nyambi ya Ngula apaninenga Ishalela mukakutwaminina, niho Nyambi ya Ngula wamuyavwilenga, pe walamwinine bantu ku bamalamo babo bikati biya ayoyele uya mukakutwaminina. Nyambi ya Ngula wabayuvwilile nceshe ndaba bashungilenga mu kuyanda kwabo namu makando.

¹⁹ Ngoboni oho afwile mukakutwaminina, bantu babokele ku zinzila zabo za mwaka pe batendele byabibi kupitakana batatizabo. Batendelenga na kulemesha banyambi bashenge, pe bakaluhishile mitima yabo na kubula ku shiya zinzila zabo zazibi.

²⁰ Nohobene, Nyambi ya Ngula wapilaminine shikuma Ishalela pe wambile ngayi, “Ndaba bantu aba banabipishi kami banakiluku kulimama kuya natongwezele batatizabo ngayi balame. Ndaba banabulu kunyombatala,

²¹ nifwako kami kukatanda mishobo yiya Yoshuwa ashiyile mu litunga oho afwile.

²² Nikezekelaho Baishalela hahabo na kushingishisha ndi bakakonkanga zinzila zami ngonehe batendelenga batatizabo, hinge ndi bafwako.”

²³ Nohobene Nyambi ya Ngula wetabilishile mikoka yiya kwikala mu litunga, kaliha wapanine Yoshuwa ngovu za kubakoma, hinge niye Nyambi ya Ngula kaliha wabatandilemo shawangu.