Bakakuyata 19 - Libuka Lya Kuyela

Kalevi na mukazendi wakwinginina

¹ Ha matena owo, oho Ishalela shilolo ekale na mwene, kwekalile Kalevi ou wazikilenga mu lishaka mukati ka litunga lya binkanda lya Efulemu. Wayekele mbuyama waku Mbetelehema mu litunga lya Yunda kwinga mukazendi wakwinginina.

² Ngoboni mbuyama wengile wakubula kwoloka, pe wavundumukilile ku litala lya tatiyendi mu Mbetelehema mu Yunda. Pe wakekalile kuyo zingonda zinaa.

³ Niho mulume wamukonkele na kwezeka kumubengezeka ngayi amubweshe. Wayile na mukamulimo wendi na bambongolo babili. Niho mbuyama watekeshele Kalevi mu litala lya tatiyendi. Oho tatiyendi amumonene wamushimbawilile shikuma.

⁴ Pe mukowendi washingile ngayi onze, pe niho onzele matena ahatu. Pe balile byakulya na kulanganako.

⁵ Ku lumenemene mutena wawunaa bapindukile lumenemene, pe balongalongele ngayi bakatuke bayenga. Ngoboni tata mbuyama wambile kuli Kalevi ngayi, “Ha kutatika mulye taha byakulya, mwanga bimipane ngovu hakwenda. Nihoboni mutweshe kuya.”

⁶ Nohobene balume babili bekalile hanci na kulya na kunwa hamo. Niho tata mbuyama wambile kukwendi ngayi, “Hekulu, lala wushiku walelo, pe ulikuwe.”

⁷ Mulume washingile kuya, ngoboni mukowendi wamukandikile ngayi ekale, nohobene walalile uya wushiku kami.

⁸ Ha mutena wa mutanu, ha ku sha kwawo, lumenemene wakatukile na kushinga kuya ngoboni tata mbuyama wambile ngayi, “Hekulu, lyako taha byakulya. Tatila taha kwinge mpungumushi.” Nohobene balume babili balile hamo.

⁹ Oho mulume na mukazendi wakwinginina na mukamulimo wendi bashingile kuya, tata mbuyama wambile kukwendi ngayi, “Mona, kwengakale hi mpungumushi, uku fwanina kulala kami uno wushiku. Wuluno kulele, yikala kuno wikale na shikati shashiwahe. Nzona ukutwesha kupinduka lumenemene na kuya ku munzi wobe.”

¹⁰ Ngoboni mulume kaliha washingile kulala kami wushiku wamina, nohobene bakatukile na mukazendi wakwinginina na kuya ha nzila yabo ku Yelushalema. Bekalile na bambongolo babili na zinyangwa zabo ha myongo.

¹¹ Oho shengile shikati sha mazolo shikuma bezile na kukuma ku lukena lwa Yembushi (nilwo lunengi Yelushalema), nohobene mukamulimo wambile kuli hekulyendi ngayi, “Yekenu tutule na kulala wushiku uno muno mu lukena lwa Bayembushi.”

¹² Ngoboni hekulyendi wambile ngayi, “Kutwesha kutulila mu lukena lwa bantu bakubula kwinga Baishalela tufwako. Tukapitakana na kuya ku Ngimbiya.

¹³ Tukaya kumbili shashishe na kulala wushiku umo ku Ngimbiya hinga ku Lama.”

¹⁴ Nohobene bapitakanine Yembushi pe bazaminine ha nzila yabo. Oho bakumine ku Ngimbiya mu litunga lya mushobo wa Mbenjamani, mutena oho walelakale.

¹⁵ Bashanukile mu nzila ngayi baye na kulala kuyo uya wushiku. Bayile mu munzi pe bekalile ha mbanza, ngoboni kowa muntu wabatekeshele ku litala.

¹⁶ Oho bashili ha mbanza, mukulwane wa mulume wezile mazolo oho afuminenga ku mulimo ku mfuba yendi. Wengile waku litunga lya binkanda lya Efulemu, ngoboni wekalilenga ku Ngimbiya. Bantu ba kuyo bengile ba ku mushobo wa Mbenjamani.

¹⁷ Mukulwane watoshele muyeni ha mbanza ya lukena pe wamwipwile ngayi, “Mukufuminina kuti? Pe kami muli na kuya kuti?”

¹⁸ Kalevi wakumbwile ngayi, “Twakekalanga ku Mbetelehema mu Yunda, pe haya tuli na kuya ku mwanya wa kulemeshela Nyambi ya Ngula mu litunga lya binkanda lya Efulemu. Ngoboni hinge noho, muntu wakututekesha uno wushiku kowa.

¹⁹ Tuli na byakulya na mwila wa bambongolo betu na mankende na waine byami nanebye bya mukazami wakwinginina hamo nanebye bya mukamulimo wami. Kowa ebye tunabulu.”

²⁰ Mukulwane wa mulume wambile ngayi, “Shangwe boni enu bayeni! Tuyenu mukatulile ku litala lyami! Nikamifulankana, bambayi hinga mulala ha mbanza uno wushiku.”

²¹ Nohobene wabatwalile ku litala lyendi, pe walishile bambongolo babo. Niho bayoweshele mawulu wabo na kulya byakulya.

²² Oho balikuwilenga byakulya byabo, balume bamo bababi bamu lukena bazingulukile litala, pe batatikile kukama ha shihala. Bambile kuli uya mukulwane wa mulume ngayi, “Tutwishila owo mulume ha munkanda uya weza nendi kuno ku litala! Tukushinga kulala nendi!”

²³ Ngoboni mukulwane wa mulume watutikile ha munkanda pe wambile kukwabo ngayi, “Byo, enu bahoni! Bambayi, hinga mutenda bya kuluwa bya nehe, sha shibi! Ou mulume nengi muyeni wami.

²⁴ Monenu taha! Mukazendi wakwinginina uno na mwanami wa kankanga wakubula kuyekiwa. Nikubatutwishila ha munkanda haya, pe mubatambule. Tendenu eshe mukushinga kutenda kukwabo. Ngoboni hinga mutenda shuma shashibi ku nou mulume!”

²⁵ Ngoboni baya balume kaliha bayuvwilile kukwendi. Nohobene Kalevi wanyakwilile mukazendi wakwinginina ha munkanda oho bekalile. Bamukwatile na mukandikiza kulala nendi wushiku nimwawo tubulu, kami kaliha bakatalile hantu naku lumenemene.

²⁶ Ku lumenemene, mbuyama wezile na kuwila hanci ku shipana sha litala lya uya mukulwane, oku kwekalile mukokwendi. Wekalile kuyo hantu ha kututika kwa mutena.

²⁷ Mukokwendi wapindukile lumenemene, pe oho ashinkwilile ku shipana ngayi aye ha mukala wendi, wawanine mukazendi wakwinginina hinga alala ha shipana sha litala na maboko wendi hinga ashalabala ku shipana.

²⁸ Wambile ngayi, “Pinduka, tuyenga.” Ngoboni kaliha wakumbwile ndaba wakufwa. Nohobene wakambikile lutu lwendi ha mbongolo pe wayile ha mukala wendi ku munzi kukwabo.

²⁹ Oho akumine, pe wenginine mu litala na kutola mpoko. Washimbile lutu lwa mukazendi wakwinginina, waluketwezele bituntula likumi na bibili, pe wabitumine ku mushobo na mushobo wa mishobo likumi na yibili ya Ishalela.

³⁰ Bantu nimwabo aba bashimonene bambile ngayi, “Hinga kwatanga ku moneka shuma sha nehe! Shuma sha nehe hinga shatanga ku moneka ku Baishalela hinga bafuminine mu Engepita! Hanganikenuho! Na kuliyuvwashana! Nakutendaho shuma shamina ha shuma eshe.”